Նախարար, նախկին ու ներկա պատգամավորներ ու գյուղապետեր. ովքեր են Շիրակի մարզում առաջադրված ռեյտինգային թեկնածուները

Աժ արտահերթ ընտրություններին մասնակցող կուսակցությունների Շիրակի մարզի վարկանիշային ցուցակները  պատրաստ են: Դրանցում նախորդ ընտրություններին մասնակցած թեկնածուներ են, գործող պատգամավորներ, գյուղապետեր, դպրոցի տնօրեններ,  ինչպես նաև նոր դեմքեր: Ռեյտինգային ընտրակարգը պահպանվեց ու ինչպես նախորդ ընտրություններում՝ կարևորվում է անձերի ընտրությունը: Նրանք քարոզարշավի ընթացքում աշխատելու են անհատապես իրենց ու կուսակցությանը քվե ապահովելու համար: «Ծառուկյան» դաշինքն իր թեկնածուներին ընտրել է՝ նախորդ ընտրությունների արդյունքները հաշվի առնելով: Ցուցակում պատգամավորներ Վարդևան Գրիգորյանն է, Վարդան Ղուկասյանը, նրանց կողքին նաև ավագանու անդամ Արմեն Բադեյանն է: Յուրաքանչյուր թեկնածու աշխատելու է անհատապես, դրա համար էլ կուսակից-մրցակիցների հետ նույն հարկի տակ չեն աշխատում:

«Նախորդ ընտրություններին Շիրակի մարզի տարածքային բոլոր կառույցների ղեկավարներն առաջադրվել էին: Այս անգամ ևս բոլորը թեկնածուներ են: Ես նույնպես թեկնածության իմ հայտը ներկայացրել եմ: Գյումրիի ավագանու անդամ եմ: Եթե հարկ լինի, պատրաստ եմ ավագանու կազմում խմբակցության ղեկավարի պաշտոնից ու մանդատից հրաժարվել ու մասնակցել խորհրդարանական ընտրությունների»,- Shantnews.am-ի հետ զրույցում ասել է ԲՀԿ Գյումրիի խորհրդի նախագահ Արմեն Բադեյանը:

«Սասնա ծռեր» կուսակցությունը Շիրակի մարզում ռեյտինգային 5 թեկնածու է ունենալու: Նոր կուսակցություն են, բայց իրենց հնարավորությունները մարզում չեն թերագնահատում:

«Շիրակի մարզն այն մարզն է, որտեղ ոչ մեկը ռեալ հաշվարկ չի կարողացել  անել: Շիրակցիները միշտ կարողացել են բոլորի հաշվարկները խառնել: Մեր թեկնածուների նկատմամբ կան սկզբունքներ: Մարդիկ, ովքեր կասկածելի անցյալ ունեն կամ ոչ մաքուր, նրանք չեն կարող լինել մեր ցուցակներում»,- Shantnews.am-ին ասել է «Սասնա ծռեր» համահայկական կուսակցության անդամ Վարազդատ Մանուկյանը:

Հանրապետականները Շիրակի մարզում բոլորին անհայտ անուններով են հանդես գալիս:  Կուսակցությունը սերնդափոխության է գնում:  Անգամ շրջանային կառույցների գրասենյակներն են փակել ու բոլորով մարզային գրասենյակ տեղափոխվել:  Շատ կուսակցականներ դադարեցրել են իրենց անդամակցությունը և այլեւս ծանրաբեռնված չեն աշխատում:

«Սերնդափոխության ենք գնում: Կուսակցությունը երիտասարդանում է, ՀՀԿ-ն այսօր, կարելի է ասել, վերածնվում է, վերածնվում է երիտասարդ կադրերով: Սա անհրաժեշտ պայման է հիմա: Ժողովրդի ցասումը ստիպեց, որ հետհայացք նետենք մեր անցած ճանապարհին և զգանք, թե ինչ սխալներ ենք թույլ տվել: Ավելի լավ է կես ճանապարհին դուրս գալ և ընդունել սխալները, քան թե մնալ համառ»,- ասել է ՀՀԿ-ի Գյումրիի 3 շրջանային կազմակերպության խորհրդի նախագահ Բորիս Ալեքսանովը:

Մարզպետ, փոխմարզպետներ,  մարզպետի խորհրդական ու օգնական, ինչպես նաև 1 ու կես տարի առաջ հանրապետականների ռեյտինգային թեկնածու Ֆելիքս Ցոլակյան… այսպիսին է քաղաքացիական պայմանագիր կուսակցության ռեյտինգային մասնակցությունը Շիրակի մարզում: Առավելագույն՝ 15 թեկնածուներով են մասնակցում:

«Շիրակի մարզի տարածքային ցուցակում ընդգրկված են երիտասարդներ, որի կորիզը ՔՊ անդամներ են: Կան նաև անկուսակցականներ: Բավականին հավակնոտ թիմ է, գուցե, բոլորի անունները չէ, որ հայտնի են հանրությանը, բայց հավակնոտ թիմ է»,- Shantnews.am-ին ասել է ՔՊ կուսակցության Գյումրիի գրասենյակի պատասխանատու Կարապետ Մխչյանը:

Ներկուսակցական պայքարը ՔՊ-ում արտահայտված է, իսկ Հայ Հեղափոխական Դաշնակցությունում թեկնածուների ընտրության հարցում երկար չեն մտածել՝  նոր դեմքերի կողքին ընտրողներին ծանոթ անուններ են: ՀՅԴ վարկանիշային ցուցակում են ԱԺ պատգամավոր Ռոմիկ Մանուկյանը, Ախուրյան և Մարմաշեն համայնքների ղեկավարները, նախկին պաշտոնյաներ ու դպրոցի տնօրեններ:

«Մի լավ բան, որ մեր բնակչությունն այլևս ընտրակաշառքի չի սպասելու: Սա դրական է: Հին, թե նոր օրենքով՝ յուրաքանչյուր կուսակցություն կստանա իր քվեն: Այստեղ խանգարող միակ հանգամանքն այն ալիքն է հեղափոխական, որը գործող իշխանությանը տալիս է առավելություն»,- Shantnews.am-ին ասել է ԱԺ պատգամավոր Ռոմիկ Մանուկյանը:

ՀԱԿ, «Ժառանգություն» և «Օրինաց երկիր» կուսակցությունները չեն մասնակցի արտահերթ ընտրություններին:  Այս կուսակցությունների անդամներից, թե ովքեր այլ քաղաքական ուժերի ռեյտինգային ցուցակներում կհայտնվեն, պարզ կդառնա բոլորի ցուցակների հրապարակումից հետո:  Թեկնածուների փաստաթղթերը կենտրոնական ընտրական հանձնաժողովն ուսումնասիրելու է մինչև նոյեմբերի 19-ը: