Գյումրեցի արվեստագետի շնորհիվ ամեն օր աշխարհում չկրակած փամփուշտ է պակասում

Զենքերը զարդերի վերածելու գյումրեցի արվեստագետի կոչը համախմբում է մարդկանց աշխարհի տարբեր ծայրերում: «Հանուն խաղաղության». այսպիսի կարգախոս է կրում Արտակ Թադևոսյանի անհատական ցուցահանդեսը, որն անցկացվել է Մոսկվայում՝ Հայ Առաքելական եկեղեցու «Տապան» թանգարանում: Ցուցահանդեսը նախաձեռնել է Մոսկվայի «Շիրակ» ասոցիացիան:

Խաղաղության գաղափարի տարածումը Ռուսաստանի մայրաքաղաքում խորհրդանշական է՝ ինտերնացիոնալ այս քաղաքում կողք կողքի ապրում են հակամարտող շատ ազգերի ներկայացուցիչներ: Իսկ խաղաղությունը բոլոր երկրներին ու ազգերին է պետք, այն ազգային ու կրոնական պատկանելություն չունի: Արտակի արվեստանոցում զարդերը զուտ ոսկերչական ու դիզայներական մտքի արդյունք չեն: Դրանցից յուրաքանչյուրն իր մեջ խորհուրդ է կրում: Քրիստոնեությունը, տարբեր ազգերի միջև համագործակցությունը,  ներդաշնակությունը խորհրդանշող, բայց բոլոր աշխատանքնեում արվեստագետի կոչը մեկն է՝ խաղաղությունը:

Մեկ տարի առաջ Արտակի աշխատանքները հետաքրքրել էին Ֆրանսիայում կազմակերպված միջազգային ցուցահանդեսին, իսկ վերջին հրավերը Մոսկվայի «Շիրակ» ասոցիացիայից էր: Արվեստագետին ու նրա աշխատանքներին կազմակերպիչները ծանոթացել էին «Շանթ»-ի տեսանյութերի միջոցով, իսկ արդյունքը արվեստագետի անհատական ցուցահանդեսն էր Մոսկվայում:

«Ցուցահանդեսի խորագիրն այսպիսին էր՝ «Հանուն խաղաղության»: Խաղաղությունը կարևոր է, որ լինի ոչ միայն ազգերի ու երկրների միջև, այլ այն պետք է տեղ գտնի ամեն մարդու մեջ: Ցուցահանդեսի գաղափարը նաև Մոսկվայի ազգերի տանը ներկայացվեց: Տարբեր ազգերի  ներկայացուցիչներ ու անգամ մեզ թշնամի համարող ազգերը շատ ոգևորված էին»,- SHANTNEWS.am-ին ասել է գյումրեցի արվեստագետ Արտակ Թադևոսյանը:

Արվեստագետը նշում է՝ խաղաղությունն իր մուսան է: Այն ոգեշնչում է ամեն անգամ փամփուշտներին երկրորդ կյանք տալիս՝  ստեղծագործել,  դիզայներական նոր միտք հաղորդել: Փամփուշտներից ու պարկուճներից ստացված զարդի մեկ օրինակ, որը կոչվում է  «Խաղաղության խաչ», այժմ արդեն ցուցադրվում է Մոսկվայի Հայ Առաքելական եկեղեցու թանգարանում՝ բոլոր ժամանակների հայ լավագույն ստեղծագործողների աշխատանքների կողքին:

Արտակ Թադևոսյանի աշխատանքները Հայաստանի վարչապետի տիկնոջ՝ Աննա Հակոբյանի գլխավորությամբ անցկացվող «Կանայք հանուն խաղաղության» արշավի խորհրդանիշն են:  Իր աշխատանքների նկատմամբ ուշադրությունը արվեստագետը համարում է խաղաղության պահանջ ու կարիք:

«Երբ 2 տարի առաջ ես նոր էի սկսում, մենակ էի: Հիմա տարբեր կողմերից, տարբեր ոլորտներ ներկայացնող մարդիկ՝ քաղաքականության, արվեստի, սպորտի մարդիկ, միանում են խաղաղության իմ կոչին: Ինձ համար կարևոր է, որ ես մենակ չեմ խաղաղության համար պայքարում»,- նշել է արվեստագետը:

Հիմա ստեղծագործությունների նոր շարք է սկսել: Պարկուճներն ու փամփուշտներն արվեստագետը վերամշակում է ու ստանում այնպիսի կախազարդեր, որոնք Գյումրիի կոլորիտն են ներկայացնում:

Գյումրիի հին դռների տեսքով ու բնական քարերով զարդերի հավաքածուների թիվն ամեն օր ավելանում է: