Ինչո՞ւ է ձգձգվում Վրաստանում ԱՄՆ դեսպանի նշանակումը

Վերջին 8 ամիսների ընթացքում ԱՄՆ-ը Վրաստանում դիվանագիտական ներկայացուցիչ չունի: ԱՄՆ դեսպանի պաշտոնը Վրաստանում թափուր էր մնացել  2018-ի մարտից՝ ԱՄՆ վերջին դեսպան Յան Քելիի հրաժարականից հետո, երբ վրացական մամուլը նրան մեղադրել էր լրտեսության մեջ:

Վրաստանում վերջերս կայացած նախագահական ընտրոթյունների ժամանակ ԱՄՆ-ը Վրաստանում չի ունեցել իր «բարձրաստիճան դիվանագիտական ​​ներկայությունը»: Այն մասին , թե ինչու է այսքան երկար ձգձգվում Վրաստանում  ԱՄՆ դեսպան նշանակելը, անդրադարձել է  Foreign Policy-ի հոդվածագիր Ռոբի Գրեմերը: Նա միանշանակ ընդգծել է, որ  ԱՄՆ դեսպանն «առավել նշանակալից դերակատարություն ունի» Վրաստանում, քան այլ երկրներում, քանի որ Վրաստանը միակ երկիրն է, որտեղ ԱՄՆ դեսպանի տեղը երկար ժամանակ մնացել է թափուր:

Ռոբի Գրեմերը Վրաստանում դեսպան նշանակելու ձգձգվող գործընթացի մեջ մեղադրել է Վրաստանի իշխանություններին, որոնք արգելակում են երկրում ԱՄՆ դեսպանի պաշտոնում կադրային դիվանագետ Բրիջիթ Բրինքի նշանակումը: Հղում անելով դիվանագիտական շրջանակներում սեփական աղբյուրին՝ Գրեմերը հիմնական պատճառը համարել է այն, որ Վրաստանի կառավարության որոշ անդամներ գտնում են, թե Բրինքը չափազանց բարեհաճ վերաբերմունք ունի արևմտամետ նախկին նախագահ Միխեիլ Սաակաշվիլիի նկատմամբ:

Բրինքի հենց այդ ենթադրյալ քաղաքական համակրանքի պատճառով վրացական իշխանություններն իբր հրաժարվում են ստորագրել նրա՝ Վրաստանում դեսպան նշանակվելու ագրեմանը: Մինչդեռ Բրիջիդ Բրինքն ունի դիվանագետի անբիծ  կենսագրություն: 20 տարվա աշխատանքային ստաժով, բարձր որակավորում ունեցող դիվանագետ է, որը երկար տարիներ աշխատել է Վրաստանում  ԱՄՆ-ի դեսպանատանը: 2015թ․-ից առ այսօր նա ԱՄՆ պետքարտուղարի Եվրոպայի և Եվրասիայի հարցերով օգնականի տեղակալն է:

Հոդվածագրի հավաստմամբ՝ ԱՄՆ պետդեպը հրաժարվել է մեկնաբանել հիմնախնդիրը: Մինչդեռ ԱՄՆ նախագահի վարչակազմի բարձրաստիճան պաշտոնյաներից մեկը հայտարարել է.

«Թրամփի վարչակազմը դեսպանների պաշտոնում առաջադրում է ուժեղ, բարձր որակավորում ունեցող թեկնածուների, և բոլոր ուժերը ներդնում է, որ նշանակումները հնարավորինս արագ կյանքի կոչվեն, այդ թվում՝ Վրաստանում»:

Այդուամենայնիվ, ինչու է ձգձգվում Վրաստանում ԱՄՆ պաշտոնական ներկայացուցչի նշանակումը, անհայտ է:

Ռոբի Գրեմերը ուշադրություն է սևեռում բացարձակ արևմտամետ Սաակաշվիլիի հեռանալուց հետո երկրում ստեղծված քաղաքական իրադրությանը, երբ 2012 թ․-ից ի վեր իշխող«Վրացական երազանք» կուսակցությունը շարունակում  է երկրի արևմտյան ուղղվածությունը՝ լրացնելով այն Մոսկվայի հետ բարելավված կապերով: Ապա, հղում անելով  ամերիկյան ու վրացական բազմաթիվ աղբյուրների, Գրեմերը գալիս է այն եզրահանգման, թե իբր Բրինքի նշանակումը Վրաստանում կասեցվել է երկրում ամենահարուստ ու ամենաազդեցիկ  մարդու, «Վրացական երազանք» կուսակցության հիմնադիր Բիձինա Իվանիշվիլիի կողմից:

Վրաստանում իշխող կուսակցությունն «անլուրջ ու անհիմն» է համարել հոդվածագրի հիմնավորումները՝ զգուշորեն ակնարկելով, թե՝ ո՞վ կարող է վիճարկել ԱՄՆ բարձրագույն իշխանության, տվյալ դեպքում՝ նախագահ Թրամփի կարգադրությունը, եթե նա որոշի Վրաստանում դեսպան նշանակել Բրիջիթ Բրինքին :