ARM TVs հավելվածի նկատմամբ հետաքրքրությունը ավելանում է նաև Սփյուռքում

Ինչպես ավելի վաղ հայտնել էր SHANTNEWS.am-ը, ARM TVs հավելվածը դեկտեմբերի 20-ից սկսած հասանելի է լինելու բաժանորդագրված օգտատերերի համար:

«Շանթ» ՀԸ-ն տարբեր ռեպորտաժների տեսքով ներկայացրել է թե՛ իր տեսակի մեջ աննախադեպ այս հավելվածի առանձնահատկություններն ու ուղղվածությունը, թե՛ բաժանորդագրվելու կարգն ու պայմանները՝ օգնելով հեռուստադիտողներին ստանալ իրենց հուզող հարցերի պատասխանները: Այս օրերին մենք հարյուրավոր արձագանքներ ենք ստանում Հայաստանից և Սփյուռքից:

ARM TVs հավելվածը մեծ հետաքրքրություն ու պահանջարկ է առաջացրել ոչ միայն Հայաստանում, այլև Սփյուռքում: Մեզ հետ կապ են հաստատում աշխարհի տարբեր անկյուններում ապրող բազմաթիվ սփյուռքահայեր: Նրանցից ոմանք, պարզվում է՝ հավելվածը վաղուց են օգտագործում, մյուսների համար էլ այն նոր ու հաճելի անակնկալ է:

Տեսանյութը, որ ձեր ուշադրությանն ենք ներկայացնում, ԱՄՆ-ում, Ֆրանսիայում, Լիբանանում և Սիրիայում ապրող մեր հայրենակիցների մասին է:

Մեր հայրենակից Վահե Սարգսյանը ապրում է Հալեպում, դեղագործ է: Ասում է, որ նույնիսկ պատերազմի ամենաթեժ պահերին չի լքել քաղաքը և այդ ընթացքում միշտ կապը պահել է Հայաստանի հետ: Իսկ արդեն մի քանի ամիս է, ինչ այդ կապի ամենահուսալի միջոցը ARM TVs հավելվածն է: Օգտվում է հատկապես SHANT Music և SHANTNEWS ալիքներից:

Արմենակ Թոքմաջյանն էլ Սիրիայից է, հիմա Լիբանանում է գտնվում: Մասնագիտությամբ քաղաքագետ է: Ներկայումս միջազգային կազմակերպությունների համար ուսումնասիրություններ է իրականացնում սիրիահայ փախստականների թեմայով, ակտիվ կապ է պահում Հայաստանի հետ:

Բժիշկ Րաֆֆի Փոլադյանը լիբանանահայ է: Բեյրութում հայտնի դոկտոր Րաֆֆին նաև բազմաթիվ միջազգային գիտաժողովների մասնակից է, ակտիվ քաղաքական գործիչ: Բժշկական թեմաներով ռադիոհաղորդումներ է վարում: ARM TVs  հավելվածից օգտվում է արդեն մի քանի ամիս: Նշում է, որ այն ավելի հետաքրքիր դարձավ շուրջօրյա լրատվական ալիքի մուտքով, իսկ հիմա սպասում է հավելվածի նոր առաջարկներին:

Ժիրայր Ավետիսյանն արդեն շուրջ 10 տարի բնակվում է Լոս Անջելեսում: Դերասան է, հոդվածագիր, բլոգեր: ARM TVs հավելվածից վաղուց է օգտվում, խորհուրդ է տալիս նաև ընկերներին, ծանոթներին, մի խոսքով, բոլոր նրանց, որոնք հայկական լրատվական, ժամանցային և ամենակարևորը՝ օրինական ու որակյալ եթերային նյութն են նախընտրում:

Երեք ամիս արդեն հավելվածից օգտվում է Մարսելում բնակվող մեր համերկրացի Սերժ Բահաքլիհին: Սերժը IT ոլորտի մասնագետ է և թերևս նաև դրանով պայմանավորված՝ ավելի լավ է պատկերացնում ARM TVs  հավելվածի առավելությունները սփյուռքում ապրող մեր հայրենակիցների համար:

Հավելվածի մասին իր կարծիքը ներկայացնելու յուրատեսակ ձև ընտրած Արա Խաչատուրյանին շատերն են հիշում: Արարատն ու Էվերեստը հաղթահարած ֆրանսահայ լեռնագնացն այս տարի Մարսելից վազքարշավով հասավ Հայաստան: ARM TVs-ը հիմա խորհուրդ է տալիս սփյուռքի բոլոր հայերին:

Ընդհանրապես, վերջին շրջանում հավելվածի հանդեպ հետաքրքրության շեշտակի աճ է գրանցվել, ինչի ապացույցն է թերևս այն, որ ARM TVs-ը շարունակում է մնալ առավել շատ որոնված և ներբեռնված հավելվածը AppStore-ի և Playmarket-ի հայկական տիրույթներում: