Պերմյակովի կողմից Ավետիսյանների սպանության 4-րդ տարելիցն է․ ի՞նչ է փոխվել դեպքից հետո

2015 թվականի հունվարի 12-ին Գյումրիում տեղակայված ռուսական ռազմաբազայի ժամկետային զինծառայող Վալերի Պերմյակովը մտել է նույն քաղաքում բնակվող Ավետիսյանների ընտանիքի տուն, ինքնաձիգով դաժանաբար սպանել ընտանիքի 6 անդամներին։ Ավետիսյանների մանկահասակ երեխան էլ նույն Պերմյակովի կրակոցներից վիրավորվելուց հետո մահացել է մեկ շաբաթ անց հիվանդանոցում։

Սա շոկային իրադարձություն էր Հայաստանի համար, և լայն արձագանք ստացավ հանրության կողմից, ինչը պայմանավորված էր ոչ միայն սպանությունների դաժանությամբ, այլև դրանք իրականացնողի անձով:

Այս դեպքից հետո բողոքի ակցիաներ սկսվեցին Գյումրիում, որոնց նպատակն էր մարդասպանին հանձնել Հայաստանի արդարադատությանը, դատապարտել ու բանտ նստեցնել Հայաստանում, որպեսզի կասկած չմնա, որ նա իր պատիժը կկրի մինչև վերջ։

Ի վերջո, սակայն, Պերմյակովը տեղափոխվեց Ռուսաստան և այնտեղ է կրում իր 10 տարվա ազատազրկումը։ Այս ողբերգական դեպքը նաև հարցեր բարձրացրեց, որոնք ժամանակ առ ժամանակ նորից ակտիվանում են․ մասնավորապես հասարակական մի խումբ պարբերաբար պահանջում է ռազմաբազան դուրս բերել Հայաստանից, և այս դեպքը ևս մեկ անգամ հիշեցրեց այդ պահանջը։

Եղան նաև ավելի մեղմ պահանջներ, որոնք վերաբերում էին ռազմաբազայի և հանրության հարաբերություններում անվտանգության ապահովմանը։ Մասնավորապես ավելի վաղ երկու երեխա էլ մահացել էր ռազմաբազայի զորավարժարաններից մեկում չպայթած զինամթերքի հետ խաղալու հետևանքով առաջացած պայթյունից։ Ռուսական կողմը հիմա էլ շարունակում է պնդել, որ իրենք ամեն զորավարժությունից հետո տարածքը մաքրում են չպայթած զինամթերից, այնուամենայնիվ տարածքը ներկայում ցանկապատված չէ, և միջադեպերի հավանականությունը պահպանվում է։

Մեկ այլ խնդիր էր զինծառայողների ընտրությունը։ Պերմյակովը ժամկետային զինծառայող էր, իր նախնական պատրաստությունն անցել էր Ռուսաստանի զորամասերից մեկում, ապա տեղափոխվել էր Գյումրի։ Ռուսական մամուլում սպանության հաջորդած շրջանում տեղեկություններ տարածվեցին, թե Ռուսաստանի պաշտպանության նախարարությունը որոշել է բազայում ծառայության նշանակել միայն պայմանագրայիններին։ Մոտիվն այն է, որ պայմանագրայիններն ավելի հասուն են, և նրանց մասնակցությամբ հանցագործություններն ավելի քիչ հավանական են։ Չնայած դրան՝ Ռուսաստանի ՊՆ հաղորդագրությունների համաձայն՝ բազան մասամբ շարունակում է համալրվել ժամկետային զինծառայողներով։

Ռազմաբազայի զինծառայողների կատարմամբ հանցագործությունների վիճակագրություն, ըստ հայաստանցի ակտիվիստներից մեկի, չկա։ Միայն հայտնի է, որ բազայի ու դրա զինծառայողների հետ կապված միջադեպերի հետևանքով մինչև հիմա մահացել է Հայաստանի 12 քաղաքացի։

Եվ վերջին նման դեպքը եղել է բոլորովին վերջերս՝ դեկտեմբերին։ Ռուսական բազայի մեկ այլ զինծառայող ծեծելով սպանել է Գյումրիի փողոցներում աշխատող հավաքարարներից մեկին։ Նրա գործը դեռ քննվում է, սակայն այս զինծառայողը նույնպես պահվում է բազայում և չի հանձնվել հայկական արդարադատությանը։