Պետք է ստեղծենք ինստիտուտներ, որպեսզի երբևէ ՀՀ քաղաքացիները չմնան իշխանության բարի կամքի հույսին. Սամսոնյան

Այսօր խորհրդարանում լրագրողները հետաքրքրվել են «Լուսավոր Հայաստան» խմբակցության անդամներից, թե արդյո՞ք կողմ են կառավարության կառուցվածքի վերաբերյալ նրանք վարչապետ Նիկոլ Փաշինյանի առաջարկներին:

«Միանշանակ է, որ ուժային կառույցները պետք է բերվեն խորհրդարանական վերահսկողության դաշտ: Ժամանակին Ռոբերտ Քոչարյանը դրանք տարավ կառավարության կառուցվածք՝ ունենալով երկու նպատակ՝ վարչապետի վերահսկողությունից հանելու և միայն իր ենթակայության տակ թողնելու, երկրորդ՝ կոալիցիաներ կազմելիս ուժայինները բանակցությունների գործիք կամ մաս չդառնանա: Հետագայում, երբ անցնում էինք խորհրդարանական կառավարման, իներցիայի ուժով Սերժ Սարգսյանի համար այդ ամենը բերվեց և կարվեց իր ենթակայության տակ, որպեսզի նախագահի վարչապետ դառնալիս Սերժ Սարգսյանը որևէ լծակ չկորցնի»,- խորհրդարանում հայտարարել է «Լուսավոր Հայաստան» խմբակցության Գևորգ Գորգիսյանը՝ հավելելով, որ չլինելով խորհրդարանական վերահսկողության տակ, այդ կառույցների ղեկավարները պարտավորված չեն լինում պատասխանել պատգամավորների հարցերին, ինչը նշանակում է, որ քաղաքական պարտավորվածությունից դուրս են մնում:

Նրա խոսքերով՝ պատասխանատվությունն ընկնում է վարչապետի վրա, ինչը շատ վատ է: Այդ համակարգերը չպետք է մեկ անձի ենթակայության տակ լինեն:

«Լուսավոր Հայաստան» խմբակցության անդամ Անի Սամսոնյանն էլ հավելել է, որ կա մտայնություն, որ ուժային կառույցների, դեսպանների ինստիտուտների հաշվետվողականությունը պետք է թողնել իշխանության բարի կամքի վրա, բայց այդպես չի լինում, պետք է հասկանալ, որ դա շատ կարևոր է։

«Այն ինչ թույլատրելի էր ՀՀԿ-ին, չի կարող թույլատրելի լինել «Իմ քայլը» դաշինքի համար: Այն, ինչը թույլատրելի չէր Սերժ Սարգսյանի համար, չի կարող թույլատրելի լինել Նիկոլ Փաշինյանի համար: Մենք պետք է ստեղծենք ինստիտուտներ, համակարգը պետք է աշխատի, որպեսզի երբևէ ՀՀ քաղաքացիները չմնան իշխանության բարի կամքի հույսին»,- ասել է Սամսոնյանը:

«Լուսավոր Հայաստան» խմբակցության անդամները հիշեցրել են ՀՀ ԱԺ նախագահ Արարատ Միրզոյանի՝ մեկ տարի առաջ արված այն հայտարարությունը, որ եթե ուժային կառույցները չեն ենթարկվում խորհրդարանական վերահսկողությանը, կարող են վարչապետի կողմից օգտագործվել՝ ընդդիմությանը ճնշելու համար:

«Հիմա ես չեմ կարծում, որ մենք պետք է հույս ունենք, որ նոր կառավարությունը չի փորձի դա անել: Մենք շարունակում ենք մնալ այն կարծիքին, որ դա կարող է լինել և դա չպետք է թույլ տալ»,- հավելել է Գևորգ Գորգիսյանը՝ կրկնելով, որ չի կարելի կառավարության բարի կամքի վրա հույս դնել: