Ոսկրածուծի դոնորների հայկական ռեեստրի շնորհիվ 30-ից ավելի կյանք է փրկվել

«Ոսկրածուծի դոնորների հայկական ռեեստրը» նշում է հիմնադրման 20-ամյակը: Այն տարածաշրջանային եզակի կենտրոն է, որտեղ հավաքագրվում են ոսկրածուծի դոնորները: Նրանց թիվն արդեն հասնում է 30 հազարի: Կենտրոնի բոլոր դոնորները հայ են՝ Հայաստանից ու տարբեր երկրներից: Այս տարի առաջին անգամ դոնորներից մեկն իր ցողունային բջիջներն է հանձնել, որոնք ուղարկվելու են Իսպանիա:

Հայաստանից Իսպանիա՝ 7-ամյա Արենի կյանքը փրկելու համար

Բջիջները Հայաստանից Իսպանիա են տեղափոխվելու 7-ամյա Արենին փոխպատվաստելու համար: Փոքրիկը հիվանդ է լեյկոզով, իսկ փոխպատվաստումը հույս է՝ հիվանդությունը կարող է նահանջել: Ցողունային բջիջներն առավելագույնը 48 ժամվա ընթացքում պետք է հասնեն Իսպանիա. անգամ շատ կարճ ուշացումը կարող է ճակատագրական լինել: Արենի դոնորը հարազատ մորաքույրն է:

«Իրար հետ կապի մեջ ենք: Որ երեկ էլ զանգեցինք, ասաց՝ սպասում եմ մորքուրին: Մորքուրի բջիջները գալու են (ժպտում է)»,- ասել է Արենի մորաքույրը՝ Քրիստինա Գևորգյանը:

Փրկության հույս. ոսկրածուծի 30 հազարից ավելի դոնոր

Ոսկրածուծի դոնորների հայկական ռեեստրում դոնորների թիվն անցնում է 30 հազարը, գրեթե  բոլորը հայ են՝ Հայաստանից, Արցախից ու աշխարհի տարբեր երկրներից:

«Քաղցկեղն ամբողջ աշխարհում աճ է գրանցում, ցավոք սրտի: Հայաստանը չի առանձնանում հիվանդացության բարձր ցուցանիշներով, բայց քաղցկեղը քանի գնում՝ ավելանում է, և պատճառները բազմաթիվ են: Դրա համար մենք պետք է պատրաստ լինենք, պարզապես: Ամեն մարդ, ով հիվանդ է արյան քաղցկեղով, և՛ կազմակերպությունները, և՛ այն գերատեսչությունները, որոնք զբաղվում են այդ հարցով, պետք է իմանան՝ կա մի կառույց, որը պատրաստ է տրամադրել փրկության այդ հույսը»,- ասել է «Ոսկրածուծի դոնորների հայկական ռեեստր» բարեգործական հիմնադրամի գործադիր տնօրեն Սևակ Ավագյանը:

Հույս տալիս են ոչ միայն հայերին: Կենտրոնը ցողունային բջիջներ անվճար տրամադրում է նաև օտարերկրացիներին: Ոսկրածուծի փոխպատվաստումը տարբեր հիվանդությունների բուժման գործում արդյունավետության տարբեր մակարդակներ է ունենում:

«Այրան հիվանդություններ կան, որոնք 90%-ով ապաքինվում են, լեյկոզների պարագայում դրանց արդյունավետությունը հասնում է 60%-ի», – ասել է Ավագյանը:

Հայաստանյան ռեեստրի շնորհիվ 30-ից ավելի կյանք է փրկվել

Ոսկրածուծի դոնորները չեն վճարվում, իսկ շահառուներին էլ ցողունային բջիջներն անվճար են հասնում: Ցողունային բջիջների հավաքագրման հայաստանյան կենտրոնի շնորհիվ 20 տարիների ընթացքում 30-ից ավելի կյանք է փրկվել:

«Որևէ գումար չի փոխանցվում դոնորին, ամենը հիմնված է մարդասիրական հիմունքների վրա, և ամեն մարդ շատ հպարտ է, որ առիթ ունի մեկի կյանքը փրկելու»,- ասել է «Ոսկրածուծի դոնորների հայկական ռեեստր» բարեգործական հիմնադրամի նախագահը:

Ոսկրածուծի դոնոր դառնալը բարդ գործընթաց չէ

Չնայած տարածված կարծրատիպին՝ ոսկրածուծի դոնոր դառնալն ու այլ մարդու կյանքը փրկելու համար սեփական ցողունային բջիջները տրամադրելը բարդ գործընթաց չէ և չի վնասում դոնորին:

Ցողունային բջիջներ կարող են հանձնել մինչև 50 տարեկան առողջ մարդիկ: Կենտրոնում ընդգծում են՝ վիրահատական միջամտություն պետք չէ, պարզապես մի քանի ժամ և վերջ: Գործընթացը նույնն է, ինչ արյուն հանձնելու դեպքում:

Կենտրոնը դեռ էլի դոնորների կարիք ունի. որքան շատ լինեն նրանք, այնքան շատ կյանքեր կփրկվեն: Ի դեպ, ոսկրածուծի ռեեստրն այսօր ևս մեկ դոնորով ավելացավ:

Պատրաստեց՝ Արտակ Խուլյանը