Թբիլիսիում շարունակվում է ադրբեջանցիների բողոքի ակցիան ընդդեմ հայ ազատամարտիկի արձանի տեղադրման

Թբիլիսիում` Վրաստանի խորհրդարանի շենքի դիմաց, ազգությամբ ադրբեջանցիների բողոքի ակցիան ավարտվել է, սակայն  մասնակիցները դեռ չեն ցրվել: «Ալիք մեդիայի» փոխանցմամբ` ցուցարարների թիվն ավելանում է: Նույն աղբյուրի հավաստմամբ` ադրբեջանաբնակ Մառնեուլիի շրջանից ավտոշարասյուններով բնակիչներ են ուղևորվել Թբիլիսի:

Նշենք, որ ադրբեջանցիների բողոքի ակցիայի պատճառը հունվարի 20-ին Ախալքալաքի Բուղաշեն գյուղում Արցախյան պատերազմի ազատամարտիկ Միքայել Ավագյանի արձանի վերաբացումն էր: Առաջինը փաստին արձագանքել էր տեղական ադրբեջանական կայքերը, այնուհետև շղթայական ռեակցիայով արձագանքել էր նաև վրացական մամուլը:

Բողոքի պատճառն Ախալքալաքիի Բուղաշեն գյուղում Արցախյան պատերազմի ազատամարտիկ Միքայել Ավագյանի արձանի վերաբացումն էր: «Ֆեյսբուք» սոցիալական ցանցում ստեղծվել էր միջոցառում՝ «Վրաստանի խորհրդարանի առջև՝ Աբխազիայի և Լեռնային Ղարաբաղի հակամարտությունների մասնակից հայ սեպարատիստ Միքայել Ավագյանի պատվին տեղադրված արձանի դեմ բողոքի ակցիա» անվանումով:

Վրաստանի խորհրդարանում ադրբեջանցի պատգամավոր Ազեր Սուլեյմանովը խորհրդատվական մարմնից պահանջել էր անհապաղ ապամոնտաժել Ավագյանի արձանը` վրաց-ադրբեջանական հարաբերությունները չսրելու համար` հիշեցնելով, որ Միքայել Ավագյանը` «որպես անջատողական», մասնակցել է ոչ միայն Ղարաբաղի, այլև Աբխազիայի պատերազմին`ընդդեմ Վրաստանի: Այս միտքը բազմիցս բարձրաձայնվել է նաև այսօրվա բողոքի ակցիայի ժամանակ: Ելույթ ունեցողների խոսքերով` Վրաստանի տարածքում երկու երկրների անջատողականի  կիսանդրու գոյությունը կարող է բացասաբար է ազդել վրաց-ադրբեջանական բարեկամության վրա: Մասնավորապես, շեշտվել է այն հանգամանքը, որ արձանի բացմանը  Բուղաշենում ներկա է եղել Ախալքալաքի քաղաքապետը, Վրաստանում ՀՀ դեսպանն ու Վրաստանի պատգամավոր:

Ադրբեջանական կողմի բուռն արձագանքի պատճառներից մեկն էլ այն է, որ հունվարի 20-ին` արձանի բացման օրը, Ադրբեջանում սգո օր էր: Բուղաշենի բնակիչները հայտարարել են, որ իրադարձությունները ժամանակի առումով  պարզապես համընկել են:

«Մենք որևէ սադրիչ գործողություն չենք կատարել: Հուշարձանը տեղադրված է եղել 1995 թվականից: Մենք որոշեցինք մեր միջոցներով բարեկարգել  հուշարձանի տարածքը և հին հուշարձանը»,- նշել են Բուղաշենի բնակիչները:

Միջադեպի կապակցությամբ պաշտոնական Բաքուն ԱԳՆ էր հրավիրել այդ երկրում Վրաստանի դեսպանին: Արձագանքել էր նաև Վրաստանի ԱԳՆ-ն` գրավոր մեկնաբանություն տալով Ադրբեջանի համապատասխան գերատեսչությանը:

«Ադրբեջանը Վրաստանի ռազմավարական գործընկերն է և չկան թեմաներ, որոնց շուրջ  մենք չունենանք հաղորդակցություն, դա հաղորդակցության նորմալ ձև է և դրա շուրջ աժիոտաժն ավելորդ է»,- ասված էր Վրաստանի արտաքին գործերի նախարարության հաղորդագրության մեջ:

Վրաստանի քաղաքական դաշտում համոզված են, որ միջադեպը Վրաստանի և Ադրբեջանի հարաբերություններում սեպ չի խրի: Ընդդիմությունն իր հերթին համոզմունք է հայտնել, որ միջէթնիկ հարաբերությունների սրմամբ շահագրգռված է երրորդ, մասնավորապես ռուսական կողմը, որը մշտապես աշխատում է այդ ուղղությամբ:

Ավելի վաղ հայտնել էինք, որ Վրաստանի մի խումբ ադրբեջանցիներ պահանջում են ապամոնտաժել Միքայել Ավագյանի արձանը:

Հիշեցնենք՝ հունվարի 20-ին Ախալքալաքի Բուղաշեն գյուղում վերաբացվել է արցախյան պատերազմի ազատամարտիկ Միքայել Ավագյանի կիսանդրին: Ինչից հետո ադրբեջանական և վրացական մամուլում, ինչպես նաև սոցցանցերում սկսեցին տարածվել հակասական տեղեկություններ Ավագյանի ինքնության մասին, իբրև վերջինս մասնակցել է Աբխազիայի պատերազմին ևս, եղել է Բաղրամյանի գումարտակի անդամ, ինչը չի համապատասխանում իրականությանը: