Հրդեհից հետո Սարատակի դպրոցում դասերը վերսկսվել են

Արթիկի  տարածաշրջանի Սարատակ գյուղի միջնակարգ դպրոցում երեք օր առաջ բռնկված հրդեհի պատճառով դասերը դադարեցվել են: Հրդեհից այրվել է մոտ 50 քմ տարածք, բայց հետևանքները երկհարկանի դպրոցում ավելի մեծ են: Շենքն ամբողջությամբ վնասվել է։ Այժմ դպրոցում մանկավարժների հետ նաև աշակերտներն ու նրանց ծնողները մաքրման աշխատանքներ են կատարում:

Պատերից մրոտված ու վնասված ծեփաշերտը գյուղի դպրոցի աշակերտներն ու մանկավարժները միասին են մաքրում։ Երեք օր առաջ բռնկված հրդեհի պատճառով այրվել է 50 քառակուսի մետր տարածք, բայց հետևանքները բոլոր դասասենյակներում ու միջանցքներում են, դպրոցական գույքը ևս վնասվել է։

Աշակերտներից ու մանկավարժներից բացի՝ ծնողների օգնությունն էլ էր տեղ հասել։ Մրոտված հատակն ու պատուհանները լվանալու,վնասված գույքը տեղափոխելու գործերը նրանց են բաժին հասել:

Սարատակ գյուղի դպրոցում հրդեհը բռնկվել էր երկուշաբթի օրը` լուսադեմին: Դպորցի պահակն էր տեսել ծուխը, որը տարածված է եղել միջանցքներով, ասում է ՝ հազիվ է դուրս եկել սենյակից ու փրկվել ծխահարվելուց։

«Սկզբից ծուխ էր, կրակը ներսն էր, ծխի միջից ես հազիվ հասա ապահովիչների մոտ ու ցած քաշեցի, էդ ժամանակ ներսի կողմից բոցը տվեց դուրս»,- պատմում է դպրոցի պահակ Արմեն Գրիգորյանը։

Հենց տնօրենի աշխատասենյակից էլ հրդեհը սկիզբ է առել, հետո հասել երկրորդ հարկ: Աշակերտների և ուսուցիչների անձնական գործերից բացի, այրվել է աշխատասենյակի գույքն ամբողջությամբ, այրվել են նույնիսկ չհրկիզվող պահարանում գտնվող կարևոր փաստաթղթերը։

Դպրոցի տնօրենը վստահ ասում է, որ աշխատանքային օրվա ավարտին ոչ մի էլեկտատեխնիկա միացրած չի թողել: Դիմացը շաբաթ -կիրակի օրերն են եղել, իսկ հրդեհի դեպքը գրանցվել է երկուշաբթի:

«Ուրբաթ օրը չվառվեց, շաբաթ օրը չվառվեց, կիրակի օրը չվառվեց, երկուշաբթի օրը նոր այրվե՞ց։ Եթե դիտավորություն էր իմ հանդեպ, չեմ պատկերացնում՝ ինչպես կարելի էր երեխաներին վատություն անել, կսպասենք ոստիկանության եզրակացությանը»,- ասել է դպրոցի տնօրեն Էդվարդ Գրիգորյանը։

Հիշեցնենք, որ ամիսներ առաջ  հենց այս դպրոցում անցկացված տնօրենի ընտրությունից հետո դժգոհություններ ու բողոքներ եղան գյուղում, որից հետո մարզպետի որոշումով տնօրեն նշանակվեց Էդվարդ Գրիգորյանը, որը Սարատակից չէ, այլ Գյումրիից:

Դիտավորության, թե պատահականության հանգամանքներն ուսումնասիրվում են: Երկհարկանի դպրոցը 1971 թվականի կառույց է, որտեղ վերանորոգումներ չեն եղել, հոսանքալարերը հին են, դպրոցը ջեռուցվում է վառարաններով ՝ հեղուկ վառելիքով:

Չորրորդ օրն է՝ դպրոցում դասերը լիարժեք վերականգնված չեն: Հրդեհի հետևանքները հասցրել են վերացնել մասամբ՝ միայն երկրորդ հարկում: Մի քանի դասասենյակներում այսօրվանից դասերն սկսվել են: Դպրոցի առաջին հարկում մաքրման աշխատանքերը դեռ մի քանի օր կշարունակվեն, իսկ կոսմետիկ վերանորոգումների համար դպրոցին աջակցելու ցանկություն հայտնող անհատներ ու ընկերություններ արդեն կան: