Արթուր Ալեքսանյանի մասին ֆիլմ է նկարահանվել

V.NEWS.am-ը VIVAROBET ընկերության աջակցությամբ վավերագրական ֆիլմ է նկարահանել օլիմպիական չեմպիոն, Եվրոպայի և աշխարհի առաջնությունների մրցանակակիր, հունահռոմեական ըմբիշ Արթուր Ալեքսանյանի մասին, հայտնում է SHANTNEWS.am-ի թղթակիցը Գյումրիից:

«Հոկտեմբեր» կինոթատրոնում կայացել է ֆիլմի փակ ցուցադրությունը, որից առաջ ֆիլմի հեղինակները մամուլի ասուլիսով են հանդես եկել։

«Արթուրը» խորագրված ֆիլմը չեմպիոնի մարզական ուղու կարևոր էջերն է նկարագրում:

Արթուր Ալեքսանյանը ֆիլմի ցուցադրությունից առաջ փոքրիկ Դավիթին է ողջունում: Դավիթը ֆիլմում մարմնավորում է մանուկ Արթուրին: Դավիթն այս տարիքում մի քանի ռեկորդների հեղինակ է, «Շանթ» հեռուստաընկերության «Մեծ փոքրիկներ» նախագծի մասնակից: Իսկ ֆիլմում փոքրիկ ըմբիշ է` ապագա օլիմպիական չեմպիոնը, ում մարզական ուղին սկսվեց հենց Գյումրիի այն մարզադպրոցից, որն այժմ Արթուր Ալեքսանյանի անունն է կրում ու նույն անմխիթար վիճակում է, ինչպես 17 տարի առաջ, երբ Արթուրն այստեղ սկսեց մարզումները:

Մարզադպրոցի նախագծա-նախահաշվային փաստաթղթերը 2 տարի է, պատրաստ են, բայց շենքի հիմնանորոգումը սկսված չէ:

Արթուրի մասին պատմող ֆիլմը ևս մեկ հնարավորություն է օլիմպիական չեմպիոնի մարզադպրոցի նկատմամբ ուշադրություն սևեռելու: Գյումրիի կիսաքանդ մարզադպրոցից մինչև օլիմպավանի մարզումներ, հետո Եվրոպայի և աշխարհի առաջնություններում լուրջ արդյունքներ:

Ֆիլմում հեղինակի խոսքեր չկան, իրադարձությունների մասին ամեն ինչ պատմողը դրվագներն են` հաղթանակ, պարտություն, էմոցիաների տարափ: Արթուրի հայրը` նրա անձնական մարզիչ Գևորգ Ալեքսանյանն է հիշում, որ պահեր եղել են, երբ պարտությամբ են հետ եկել, այսինքն` իրենց ուզած մեդալները չեն բերել: Ֆիլմը ցույց տվեց, թե ինչ տիտանական աշխատանք է կատարվում, ինչ քրտինք է թափվում ամեն մի միավորի համար:

Հավաքականի գլխավոր մարզիչ Լևոն Ջուլֆալակյանն էլ է նշում, որ ֆիլմով մտովի 9 տարի հետ գնացին` անցնելով Արթուրի ամբողջ մարզական ուղին, աշխարհի ու Եվրոպայի առաջնությունների հաղթանակները:

Շուրջ 40 րոպե տևողության ֆիլմը բացահայտում է, թե Արթուրն ինչպիսի միջազգային հեղինակություն ու համբավ ունի մարզաշխարհում։ Նրա կարիերան գնահատում են նաև միջազգային առաջնություններում նրա մրցակիցներն ու մարզիչները:

Լիտվայի գլխավոր մարզիչ Մինգաուտաս Եզերսկիսն է պատմում, որ Եվրոպայի առաջնության եզրափակիչի ժամանակ ինքն ու Արթուրը միասին են մենամարտել: Ասում է` Արթուրը ուժեղ էր, փորձառու, լավ պատրաստված և ինքը մտածել է, որ ժամանակն է մեծ սպորտը թողնել` արդեն երիտասարդներն են գալիս:

Հեղինակների խոսքերով` ֆիլմի գաղափարը ծնվել է անցած տարի Եվրոպայի առաջնության ժամանակ, երբ իրենք տեսել են, թե ինչպես են Արթուրին մեծարում միջազգային մրցումների ժամանակ: Գաղտնիք չէ, որ նա երեխաների շրջանում մեծ հեղինակություն է վայելում ու նրա շնորհիվ է, որ բազմաթիվ փոքրիկներ հիմա ըմբշամարտով են զբաղվում: Արթուրը հիմա էլ Գյումրիի հպարտությունն է: Նա դեռ մտադիր չէ զբաղվել մարզչական գործունեությամբ, մեծ սպորտից էլ չի հեռացել:

Վնասվածքներ ուներ, բայց արդեն կազդուրվել է, հիմա մարզվում է ամբողջ ծանրաբեռնվածությամբ: Ֆիլմի սյուժեն դեռ անավարտ է, ինչին շարունակություն տալ Արթուրը խոստացավ 2020 թվականի Օլիմպիական խաղերին մասնակցելուց հետո: