Ավելի գերադասելի է, որ Օրբելյանը գեղարվեստական ղեկավար մնա. Նազենի Ղարիբյան

«Մտադի՞ր եք արդյոք ընդհանրապես ազատել Կոնստանտին Օրբելյանին նաև գեղարվեստական ղեկավարի պաշտոնից և արդյո՞ք ունեք փոխարինող նրա համար»,- «Հեռանկար»-ի տաղավարում հաղորդավար Արամ Աբրահամյանը հարցրել է  ՀՀ մշակույթի նախարարի պարտականությունները կատարող Նազենի Ղարիբյանին:

«Ո՛չ, ո՛չ մեկը, ո՛չ մյուսը»,- պատասխանել է Ղարիբյանը:

Ինչպես հայտնի է, ՀՀ մշակույթի նախարարի պարտականությունները կատարող Նազենի Ղարիբյանը մարտի 28-ի երեկոյան աշխատանքից ազատել է Օպերայի թատրոնի գեղարվեստական ղեկավար և տնօրեն Կոնստանտին Օրբելյանին: Պատճառաբանությունները մի քանիսն են, որ նա համատեղում է Ալեքսանդր  Սպենդիարյանի անվան օպերայի և բալետի ազգային ակադեմիական թատրոնի թե՛ գեղարվեստական ղեկավարի և թե՛ տնօրենի պարտականությունները, չի տիրապետում հայերենին և այլն:

Նազենի Ղարիբյանն ասել է, որ ինքն այն կարծիքին է, որ ազատելով Օրբելյանին տնօրենի «բեռից», վարչական աշխատանքից, նրան հնարավորություն է տրվում ամբողջությամբ նվիրվել գեղարվեստական աշխատանքին: Ինչ վերաբերում է այն պնդումներին, թե Օրբելյանն Օպերային թատրոնի համար նաև սեփական միջոցներն է ծախսել, ուստի նա պետք է շարունակի աշխատել որպես տնօրեն, Ղարիբյանն ասել է.

«Օրենքն այդպիսի իրավիճակի համար չունի սահմանում և թույլ չի տալիս: Ընդհակառակը՝ ըստ օրենքի, եթե որևէ մեկն իր սեփական ներդրումներն է արել ՊՈԱԿ-ում, դա չի համարվում, որ իրենն է: Նա իր ներդրումն արել է, եթե նա աշխատանքից ազատվում է, այդ ներդրումը մնում է այդ ՊՈԱԿ-ում»,- ասել է ՀՀ մշակույթի նախարարի պարտականությունները կատարողը:

«Եթե դուք մտադիր չէիք և գեղարվեստական ղեկավարի պաշտոնից չեք ազատել Կոնստանտին Օրբելյանին, ապա ճիշտ չէ՞ բանակցել նրա հետ, կոլեկտիվի հետ և, օրինակ, առաջարկել, որ նա և կոլեկտիվն իրենց սրտի ուզածով տնօրեն ունենան, օրենքը կկատարվեր, և ոչ մի կոնֆլիկտ չէր առաջանա»,- ասել է Արամ Աբրահամյանը:

«Ես բանակցել եմ, այս խնդիրը ծագել է 9 ամիս առաջ, երբ մենք նոր էինք եկել աշխատանքի՝ տիկին Մակունցը և ես: Նախարարությունում դա մեր առաջին խնդիրներից մեկն է եղել: Հենց հունիս ամսից էլ հրավիրել են և՛ պարոն Օրբելյանին, և՛ տիկին Կարապետյանին՝ ասելու, որ այսպիսի խնդիր գոյություն ունի»,- ասել է Ղարիբյանը՝ հստակեցնելով, որ տիկին Կարապետյան ասելով՝ նկատի ունի փոխտնօրենին, որը, իրականում, տնօրենն է: Դե ֆակտո տնօրենը նա է, որովհետև բոլոր գործառույթները նա է իրականացնում և ստորագրում փաստաթղթերի տակ:

Ըստ ՀՀ մշակույթի նախարարի պարտականությունները կատարողի` իրենք մի քանի անգամ բացատրական աշխատանքներ են տարել, նույնիսկ նամակ են գրել, ասել, որ խնդիր կա, և անհրաժեշտ է որևէ լուծում գտնել.

«Քանի որ պարոն Օրբելյանի պարագայում տնօրենի պաշտոնն ավելի խնդրահարույց էր, որովհետև էնտեղ կա լեզվի իմացության խնդիր, խնդիր տնօրենի նշանակման հրամանի հետ կապված, էլի խախտում կար, ասացինք, որ երևի ավելի գերադասելի է, որ գեղարվեստական ղեկավար մնա, տնօրենին փոխենք: Բայց այն, ինչ դուք ասում եք՝ միացյալ որոշենք, թե ով իրենց տնօրենը լինի, կներեք, դա նույնպես օրենքի խախտում է, որովհետև տնօրենը որոշվում է մրցույթի կարգով»: