Ախուրյանում վտանգված է կենսավառելիքի արտադրամասի կառուցման ծրագիրը

Ախուրյանում կոշտ կենսավառելիքի արտադրության ծրագիրը ձգձգվում է արդեն մեկ ու կես տարի։ Նոր վառելիքը ստացվելու է սովորական ծղոտից, ծառերի տերևներից ու ոչ պիտանի այլ կենսաթափոններից։ Ավելի քան 50 մլն դրամ արժեքով ծրագրի գումարի մեծ մասը հատկացնելու է միջազգային կազմակերպությունը, իսկ 10 մլն դրամը լինելու է համայնքային բյուջեի ներդրումը։ Արտադրամասի կառուցման ժամկետները խախտվել են համայնքային ներդրումը չապահովելու պատճառով, որով պայմանավորված էլ ծրագրի պատասխանատուներն արտադրությունն այլ համայնք կամ այլ մարզ տեղափոխելու հարցն են քննարկել։

Կենսավառելիքի նորաստեղծ արտադրամասն աշխատեցնելը ծրագրված էր դեռ անցած տարվանից, ծառերի տերևները պահեստավորել էին, որպեսզի արտադրությունն սկսելիս հումքի խնդիր չունենային: Բայց գործը տարի ու կես է` արտադրական պրոցեսին չի հասնում: Ախուրյանի բյուջեից համաֆինանսավորում չի եղել: Ծրագրի պատասխանատուներն ասում են, որ գումարների փոխանցումն ուշացնելու մեղավորը համայնքի ղեկավարն է: Ծրագրի ղեկավար Գևորգ Պետրոսյանի խոսքերով, խնդիրը համայնքային բյուջեում գումար չլինելը չէ, քանի որ Ախուրյան խոշորացված համայնքի բյուջեն 420-430 մլն դրամ է, իսկ ծրագրի համաֆինանսավորումն` ընդամենը 10 մլն դրամ:

Ախուրյանի «Համայնքային զարգացման կենտրոն» հիմնադրամի նախագահ Սամվել Սաֆարյանի խոսքերով էլ, համայնքապետը շարունակ պատճառաբանել է, թե նախագիծ-նախահաշիվն այսօր կկազմվի, վաղը կկազմվի, ու այդպես գումարի փոխանցումը ձգձգել է ամիսներ:

Համայնքապետը նաև չի թաքցրել, որ դեմ է տեղական բյուջեից գումար հատկացնելուն` հետևյալ պատճառաբանությամբ, որ արտադրության համար ընտրված տարածքը համայնքապետարանի հաշվեկշռում չէ, ու վարձակալել են Ախուրյանի հիվանդանոցին պատկանող շինությունները, որոնք հիվանդանոցի նախկին ավտոտնակներն են եղել: Արծրուն Իգիթյանը նաև կասկածներ ունի հիմնադրամի կառավարման հարցում: Նշենք, որ հիմնադրամի 15 հոգանոց կազմում կան ավագանու անդամներ ու խոշորացված համայնքներից ներկայացուցիչներ, նաև համայնքապետարանն է` ի դեմս համայնքապետի: Ախուրյանի համայնքապետ Արծրուն Իգիթյանն ընդունեց, որ անհամաձայնություններ եղել են ծրագրի պատասխանատուների հետ, բայց խնդիրները, ըստ նրա, արդեն հարթվել են:

Հարկ է նշել, որ ծրագրի համաֆինանսավորումն ուշացել է նաև այդ մասին ավագանու կայացրած որոշումից հետո: Կոշտ կենսավառելիքի արտադրությունը նաև համայնքի հնգամյա զարգացման ծրագրի մաս է կազմում: Ծրագրի ժամկետը մեկ անգամ արդեն երկարացվել է ու սահմանված նոր ժամկետում, որն այս տարվա սեպտեմբերն է, աշխատանքները պարտադիր պետք է ավարտվեն: Ձգձգումները կարող են պատճառ դառնալ կենսավառելիքի արտադրության ծրագիրն Ախուրյանից այլ համայնք կամ թեկուզ այլ մարզ տեղափոխելու համար: Ծրագրի պատասխանատուներն իրենց մտահոգությունը հայտնել են նաև Շիրակի մարզպետին, որից հետո եղել են հանդիպումներ համայնքապետի հետ: Համայնքապետարանի միջոցներով պետք է արտադրական շինությունը վերանորոգվի, տանիքը փոխվի, ներքին հարդարում կատարվի, հումքի կուտակման համար տարածքներ կառուցվեն: Համայնքի ղեկավարն այժմ խոստացել է 10 մլն դրամ ներդրում ապահովել, բայց ոչ միանգամից: Իսկ մինչև սեպտեմբեր ոչ միայն շենքային նորոգումների, այլև բրիկետների արտադրության սարքավորումների ներկրման հարցն է լուծվելու: Հիմնադրամի ղեկավարն ասում է, մինչև սեպտեմբեր կհասցնեն, եթե համաֆինանսավորումը չուշանա: Համոզված են, որ բրիկետների արտադրությամբ Հայաստանում կնվազեն անտառահատումները: Հայաստանը պարտավորություն է ստանձնել մինչև 2050 թվականն անտառային տարածքները 12,5 տոկոսից հասցնել 20,5 տոկոսի:

Բրիկետները կարող են այլընտրանքային վառելիք դառնալ փայտին: Կենսավառելիքի նոր արտադրամասում վառելիքի են վերածելու այն, ինչը պիտանի չէ ու բնության մեջ հենց այնպես ոչնչանում է: