Օրբելյանը՝ 92 մլն դրամի չարաշահումներին իր առնչության մասին

Ալ. Սպենդիարյանի անվան Օպերայի և բալետի ազգային ակադեմիական թատրոնի գեղարվեստական ղեկավար Կոստանտին Օրբելյանն այսօր լրագրողների հետ հանդիպմանն անդրադարձել է այն իրողությանը, ըստ որի՝ թատրոնում 92 մլդ դրամի չափով չարաշահումներ կան, և այդ պարտքը դեռ վճարված չէ:

«Ես, որպես օպերայի թատրոնի տնօրեն, աշխատանքի եմ անցել 2016 թվականի փետրվարի սկզբին: Մեր թատրոնում արդեն աուդիտ էր անցկացվում՝ դեկտեմբերից: Պատասխանը մենք ստացանք մարտին: Աուդիտը վերաբերում էր 2014, 2015, 2016 թվականներին: Այնպես ո,ր ես նստել եմ տնօրենի աթոռին այն ժամանակ, երբ մենք ստացել են խախտումների վերաբերյալ փաստաթուղթը: Ցանկանում եմ ընդգծել՝ խոսքն ադմինիստրատիվ խախտումների մասին է` Մշակույթի նախարարության և Ֆինանսների նախարարության միջև: Այսինքն` դա նույնիսկ չի վերաբերում այն տնօրեններին, որոնք եղել են թատրոնում: Նազենի Ղարիբյանը վերջին հեռուստաեթերի ժամանակ ինքն է ասել, որ Օրբելյանը նույնիսկ փոքրիկ առնչություն չունի այդ պարտքերի հետ, հատկապես, որ դա տուգանք է ինչ-որ խախտումների համար, ես չգիտեմ, թե ինչ խախատումների մասին է խոսքը: Ի դեպ, ես այդ աուդիտի տակ չեմ ստորագրել, ես համաձայն չեմ դրա հետ, և մենք, երբ պատասխանը եկել էր, փորձել ենք Մշակույթի նախարարության հետ հասկանալ, թե ինչպես կարող ենք միասին լուծել այդ խնդիրը, մենք ցանկանում էինք, օրինակ, «Անուշ» բեմադրել դպրոցականների համար, հատկապես, որ առջևում Թումայնանական օրերն էին: Այսինքն՝ ոչ թե գումարներով վերադարձվի, այլ աշխատանքով: Ցավոք սրտի, դրան չհասանք, քանի որ բանակցություններն ընդհատվեցին, հիմա մենք կամաց-կամաց, հնարավորության առկայության պարագայում, վճարում ենք այդ պարտքը, որը ես ժառանգել եմ թատրոնի նախորդ տնօրինությունից», – պարզաբանել է Օրբելյանը:

Ինչ վերաբերում է այն հայտարարություններին, որ Օրբելյանը հաճախ նաև իր սեփական միջոցներն է ծախսել՝ ներկայացումներ ունենալու համար, ի պատասխան ՀՀ մշակույթի նախարարի պարտականություններն իրականցնող Նազենի Ղարիբյանն ասել է, որ ՊՈԱԿ-ների մասին օրենքի համաձայն` անձնական գումարներ չպետք է ծախսվեն, բայց եթե ծախսվել են, դրանք անվերադարձ են:

«Այո, ես իմ անձնական գումարներն եմ ծախսում, մեր հովանավորների գումարները, քանի որ պետությունը գումաներ չունի: Ինձ անհրաժեշտ էր շատ շտապ իրականություն դարձնել նոր «Կարմեն»-ը , «Կախարդական ֆլեյտա»-ն, հանդերձանք կարել, դեկորացիա անել՝ Դուբայ գնալու համար: Այսինքն՝ պետությունը մեզ չի օգնել, ի դեպ,  Մշակույթի նախարարությունը գրեց այն մասին, որ ինձ կտան 50 հազար դոլար՝ ավիատոմսերի համար, հեղափոխությունից հետո ասացին, որ իրենք այդ գումարները չունեն: Չկա, չկա, մենք փնտրեցինք այլ տեղերում: Եվ, փառք Աստծո կան մեր ընկերները, որոնք օգնեցին, որ մենք իրականություն դարձնենք հյուրախաղերը Դուբայում»,- հավելել է Օրբելյանը: