Ինչո՞ւ է Ատոմ Ջանջուղազյանը դեմ Դավիթ Անանյանի ներկայացրած որոշման նախագծին

Պարգևատրումների վերաբաշխում կատարելու հարցի վերաբերյալ քննարկումների ժամանակ վարչապետ Նիկոլ Փաշինյանը կոնկրետ օրինակ բերեց՝ ասելով.

«Օրինակ` շարքային մաքսավորը ստանում է 160 հազար դրամ աշխատավարձ, այսինքն՝ մաքսային տեսուչի դրույքը այդ շրջանակում է առանց պարգևատրման, այսինքն՝ մաքսային ծառայողը, որն օրական 100 միլիոնավոր դրամի ապրանքի հետ է գործ ունենում, ստանում է 160 հազար դրամ, եթե սենց թողնում ենք, իրեն ասում ենք՝ քո գլխի ճարը տես, ես չեմ ասում, թե մեկը մյուսին արդարացնում է, բայց, հաշվի առնելով պոզիտիվ միտումները, ես գտնում եմ, որ այս միջանկյալ որոշումը պիտի կայացնենք»:

Ֆինանսների նախարար Ատոմ Ջանջուղազյանը չի կարծում, որ կոռուպցիայի կանխումն այսքան դյուրին ճանապարհով է հնարավոր լուծել: Ասաց.

«Պետք է վարձատրությունը լինի համարժեք աշխատաշուկային և ոչ թե նրանով, թե որ պետական մարմնում է, դուք մաքսավորի օրինակը բերեցիք, եթե մաքսավորը որոշում կայացնող չի, այլ սպասարկման գործառույթ է իրականացնում, ապա աշխատուժի շուկան նախատեսում է որոշակի վճարման համակարգ: Եթե ելնում ենք նրանից, որ յուրաքանչյուր մաքսավոր իր աշխատատեղում պետք է որոշում կայացնի, իհարկե, ձեր ասած ռիսկը կա, բայց այդ ռիսկը որևէ փողով հնարավոր չէ կանխարգելել, որովհետև, միևնույն է, ինքը եթե որոշումներ է կատարում, դրանք անհամեմատ ավելի մեծ են, քան ցանկացած պարգևատրման գումար: Խոսքը վերաբերում է ներմուծման 5 մլրդ դոլար ծավալ և ներմուծման 2 մլրդ դոլար ծավալի հետ առնչվելուն»:

Նա ներկայացրեց ոլորտի ռիսկերը, որոնք նախորդ 27 տարիներին ստեղծել են հայտնի իրավիճակը և հավելեց.

«Եթե խրախուսման համար ենք անում, ռիսկ կա, որ կարող է ծառայել նույնքան, որքան 27 տարի, մենք չենք կարծում, որ կոռուպցիայի դեմ պայքարում տալու է արդյունքը, ինչը ակնկալվում է»:

Տիգրան Խաչատրյանը՝ տնտեսական զարգացման ու ներդրումների նախարարը, վերլուծելով գործընկերների ներկայացրած հիմքերը, նշեց, որ հասկանալի են երկուսի մտահոգություններն էլ, Ատոմ Ջանջուղազյանը կարծում է, որ համակարգային լուծում է պետք, իսկ Դավիթ Անանյանն առաջարկում է այս փուլում խրախուսման եղանակը կիրառել կադրերի արտահոսքից խուսափելու համար:

«Մենք վճարաչափերի այս համակարգով չենք կարող շարունակել, ՊԵԿ համակարգի աշխատողներով ոչ թե պետք է արտաբյուջեի հաշվին կարգավորումները տանք, իրենք անորոշության մեջ են, այնտեղի յուրաքանչյուր աշխատակից ունի ավելի շատ հնարավորություն բիզնեսում հայտնվելու, քան տնտեսական զարգացման նախարարությունում: Պարոն Ջանջուղազյանը ճիշտ է, որ պետք է ընդհանուր լուծում գտնենք, պարոն Անանյանը ճիշտ է, որ պետք է, քանի դեռ ընդհանուր լուծում չենք գտել, միջոց գտնենք, որ կարողանանք պահել համակարգի որակյալ աշխատողին և հանձնարարական ձևակերպենք, որ բոլոր գերատեսչություններում սպասեն, թե մենք երբ ենք հարցին լուծում տալու վերջնաժամկետով»,- ասաց նա

Նիկոլ Փաշինյանը հակված էր փուլ առ փուլ լուծման տարբերակին, ուստի հետևյալ օրինակը բերեց.

«Կա մի այսպիսի ճշմարտություն` ձիերի երամակը կանգնեցնելու համար մի ինչ-որ տարածք պետք է վազես նրա հետ, այլ կերպ հնարավոր չէ. որևէ պրոցես կանգնեցնելու համար, մենք այս պրոցեսը կանգնեցնելու մեջ ենք այս որոշումը կայացնելիս: Նախորդ տարի 2018-ի բյուջեով ՊԵԿ-ն ունեցել է 6 մլրդ դրամի պարգևատրման հիմնադրամ, բացի դրանից ունեցել է նաև ծրարով վճարումների պրակտիկա` ըստ օդում կախված լուրերի:

Հիմա պետք է հասկանանք՝ մենք այս կարգի գործողությունների մտադրությունը: Ամբողջ համակարգը կտրում ենք, դրա քաղաքական հետևանքն ի՞նչ է լինելու: Եթե պարոն Ջանջուղազյանի ու Անանյանի ասածն իրականացնենք, և եթե փորձենք բոլոր անհամաձայնությունը մի քայլով կտրենք, կունենանք կոլապս, դրա համար փուլային տարբերակով ենք գնում»: