Շիրակի մարզխորհրդի նիստում քննարկվել են պետական համաֆինանսավորմամբ գյուղատնտեսական ծրագրերը

Այսօր տեղի է ունեցել Շիրակի մարզխորհրդի հերթական նիստը, որտեղ քննարկվել են գյուղատնտեսական աշխատանքների մեկնարկի հարցերը, մարզի համայնքներից ներկայացված սուբվենցիոն հայտերը:

Նիստի ընթացքում ներկայացվել են պետական համաֆինանսավորմամբ գյուղատնտեսական ծրագրերը, որոնք վերաբերում են տավարաբուծության զարգացմանը, ինտենսիվ այգիների հիմնմանը, գյուղտեխնիկայի ձեռքբերմանը և հակակարկտային կայանների տեղադրմանը:

Բոլոր այս ծրագրերը գյուղապետարանների համաֆինանսավորում են պահանջում, ինչն էլ անմիջականորեն կապված է սեփական եկամուտների հավաքագրման հետ: Այս ցուցանիշը, անցած տարվա նույն ժամանակահատվածի համեմատ, մարզում բարձրացել է:

Առաջին եռամսյակում Շիրակի մարզի գյուղերը սեփական եկամուտները կատարել են 84 տոկոսով: Հողի հարկն ու գույքահարկերը գյուղացիները պարտաճանաչ վճարել են, թերացել են միայն վարձակալական հողերի վարձերի մասով: Սա էլ, ըստ գյուղապետերի, արդարացում ունի` գյուղացին աշնանն է փող ունենում, հիմա ունեցածը ներդնում է գյուղատնտեսական աշխատանքների մեջ:

Գյուղատնտեսական տարին մեկնարկում են պետական համաֆինանսավորմամբ ծրագրերով: Դրանցից առաջինը ցորենի բարձրորակ սերմերի արտադրության ծրագրի վերսկսմանն է վերաբերում: Պետությունը համաֆինանսավորման պայմանով առաջարկում է գյուղտեխնիկայի լիզինգով ձեռքբերման, հակակարկտայինների տեղադրման և ինտենսիվ այգիների հիմնման ծրագիր: Սրանք անցած տարվանից գործող ծրագրերի շարունակությունն են, իսկ նորույթը մթերող ընկերությունների համաֆինանսավորման ծրագիրն է:

«Մեր մարզում դա վերաբերում է կաթ մթերող ընկերություններին: Նրանց մինչև 1.5 մլրդ դրամ սուբսիդավորման չափով, 1 տարի մարման ժամկետով վարկ է տրամադրում: Նախկինում խնդիր ունեինք, որ մթերողները չէին կարողանում մթերված կաթի գումարը վճարել գյուղացիներին: Վճարումները ուշացնում էին: Պետությունը  ընդառաջ է գնացել այս ուղղությամբ, մթերողներին տրամադրում է վարկ»,- նշել է Շիրակի մարզպետարանի գյուղատնտեսության վարչության պետ Մովսես Մանուկյանը:

Իսկ գյուղացիներին ժամանակին պետք է ոռոգման ջուր հասցնել: Մարզպետը անցած տարվա խնդիրները հիշեց` ոռոգման սեզոնին ջուրը տեղ չէր հասնում, ջրանցքները մաքրված չէին: Ջրօգտագործող ընկերություններն այս տարի ավելի շուտ են գործը սկսել:

Ոռոգման ներքին ցանցի վերանորոգում նաև սուբվենցիոն ծրագրի հայտերում են գյուղերը ներկայացրել: Շիրակի մարզից 55 հայտ է ներկայացվել: 9 գյուղ ֆոնդային բյուջեում գումար չի ունեցել սուբվենցիոն ծրագրին մասնակցելու համար, 6 գյուղ էլ փող ունի, բայց մասնակցելու ցանկություն չունի: Քաղաքաշինության վարչությանն էլ ժամանակը չի բավականացնում ոչ հիմնական շինությունների և դրանցում ապրողների տվյալները մինչև հունիսի 30-ը հավաքագրելու համար: Մարզում 3517 ոչ հիմնական շինություն են հաշվառել, բայց առայժմ պարզ չէ, թե ընտանիքները որտեղ են հաշվառված և արդյո՞ք սեփականության իրավունք ունեն որևէ բնակարանի նկատմամբ:

Տարածքային կառավարման վարչությունն էլ դատախազությունից է միջնորդագիր ստացել. այն վերաբերում է գյուղերում ուսումնասիրություններ կատարելուն, իսկ առիթն ու պատճառը գյուղապետարաններում հայտնաբերված յուրացումներն ու չարաշահումներն են:

«Այսօր փիլիսոփայությունը իշխանության, փիլիսոփայությունը որոշումների կայացման արմատական փոփոխվել է: Միասին պետք է փոփոխությունները ընդունենք, միասին պիտի շարժվենք առաջ: Այն մարդիկ, ում համար այդ փոփոխություններն ընդունելի չեն, ուրեմն ճանապարհ չունենք միասին քայլելու»,- ասել է Շիրակի մարզպետ Տիգրան Պետրոսյանը:

Առաջիկա օրերին ստուգումները գյուղերում կմեկնարկեն, իսկ Գյումրիի փողոցաշինական մեծ ծրագրի ընթացքն ու թերացումները կքննարկվեն վաղը:

Հիշեցնենք` վարչապետը օրեր առաջ փողոցաշինությունը վերահսկելու հանձնարական էր տվել Շիրակի մարզպետին ու քաղաքաշինության կոմիտեի ղեկավարին: