Ոստիկանները կազմակերպված հանցավոր խումբ են վնասազերծել

Վերջերս ոստիկանության քրեական հետախուզության գլխավոր վարչությունում օպերատիվ տեղեկություններ են ստացվել, որ մի խումբ անձինք ստեղծել են կազմակերպված կայուն խումբ և կատարում են գողություններ:

ՀՀ ոստիկանությունից հայտնում են, որ հանցավոր խմբին բացահայտելու, հանցափաստում մերկացնելու և խմբի բոլոր անդամներին հայտնաբերելու համար ձեռնարկվել են ծավալուն օպերատիվ-հետախուզական միջոցառումներ:
Սահմանվել է շուրջօրյա հսկողություն, ճշտվել է խմբի անդամների ինքնությունը, կազմակերպվել են դարանակալումներ: Կասկածյալների գործողությունները գիշերային ժամերին հետևելու և արձանագրելու համար օգտագործվել են նաև տեխնիկական հատուկ միջոցներ և գիշերային տեսանկարահանող սարքեր:

Ձեռնարկված միջոցառումներով պարզվել են մի շարք հանգամանքներ: Հանցավոր խմբի անդամները հիմնականում հանդել են Էրեբունի վարչական շրջանի Արցախի, Աթոյան, Դիմիտրովի և Էրեբունու փողոցներում:
Հանդիպումից հետո կասկածյալները նստել են խմբի անդամներից որևէ մեկի մեքենան և շարժվել Արին Բերդի 3 հասցեի ուղղությամբ:

Օպերատիվ-հետախուզական միջոցառումները չձախողելու համար որոշում է կայացվել միջոցառումներն իրականացնել հաջորդ օրը, քանի որ տեղեկություններ են եղել, որ հաջորդ օրը նույնպես խումբը գնալու է հենց այդ ուղղությամբ:
Հաջորդ օրը ոստիկանները Արին Բերդի փողոցի ուղղությամբ տեղադրել են տեսախցիկներ հանցավոր խմբի շարժին հետևելու համար, կազմակերպվել են նաև դարանակալումներ:

Ինչպես երևում է կադրում՝ մեքենայից իջնելուց հետո խումբը շարժվել է դեպի Երևանի ջերմաէլեկտրակայանի տարածք: Րոպեներ անց խմբի անդամները վերադարձել են պարկերով ու հեռացել:
Այս գործողությունից հետո կասկածյալները պարկերը տեղափոխել են Սարի թաղի տներից մեկը, իսկ հաջորդ օրն առավոտյան, բեռնափոխադրման մեքենայով տարել են մետաղի ընդունման կետ:

Ձեռնարկված օպերատիվ-հետախուզական միջոցառումների շնորհիվ պարզվել է, որ հանցավոր խումբը Երևանի ջերմաէլեկտրակայանի տրանսֆորմատորից գողանում էր պղնձե փաթույթներ և գողոնն իրացնում մետաղի ընդունման կետում: Ի դեպ, ըստ նախնական տվյալների՝ գողոնն ամեն անգամ կազմել է շուրջ 1 տոննա:
Հարուցվել է քրեական գործ՝ գողության հատկանիշներով:
Հանցավոր խմբին վնասազերծելու օպերացիան կազմակերպելու համար հարկավոր է եղել մի քանի օր հետևել նրանց հանցավոր գործունեությանը, որպեսզի պարզվեին գործողությունների բոլոր հանգամանքները, իսկ վնասազերծելիս հայտնաբերվեին խմբի բոլոր անդամները, նաև օժանդակող անձինք:

Ապրիլի 4-ին՝ կեսգիշերին խումբը կրկին շարժվել է նույն ուղղությամբ: Դարձյալ ոստիկանների տեսադաշտում պարկերը տեղափոխել են մեքենա, իսկ առավոտյան՝ կրկին մետաղների ընդունման կետ:
Երբ ամեն ինչ պարզ է եղել, այսինքն իրավապահներն իմացել են, թե որտեղից, ինչ են գողանում, և որտեղ իրացնում գողոնը, որոշում է կայացվել վնասազերծել խմբի անդամներին:

Նույն օրը՝ ապրիլի 4-ի առավոտյան, օպերատիվ-հետախուզական միջոցառումների և քննչական գործողությունների շնորհիվ հանցավոր խումբը վնասազերծվել է մետաղների ընդունման կետում, և բոլոր կասկածյալները բերման են ենթարկվել ոստիկանության Շենգավիթի բաժին:
Բերման ենթարկվածներն են՝ երևանցիներ 34-ամյա Արման Մանուկյան, 36-ամյա Գուրգեն Ղռանտոնյան, 31-ամյա Սերգեյ Մեհրաբյան, 41-ամյա Գևորգ Բաղդասարյան, 32-ամյա Մերուժան Մանուկյան, եղբայրներ 37-ամյա Նշան ու 36-ամյա Գրիգոր Նշանյաններ, 36-ամյա Ալբերտ և 37-ամյա Ռոբերտ Նիգոյաններ:

Դեպքի վայրի զննությամբ հայտնաբերվել է լիցքավորիչով տեսախցիկ: Կասկածյալները տեղադրել են այս տեսախցիկը տրանսֆորմատորի դիմաց, օնլայն բջջային հեռախոսներով հետևել ջերմաէլեկտրակայանի աշխատակիցների շարժին, ընտրել են հարմար պահն ու գնացել գողություն կատարելու:

Խուզարկություններ կատարվել են կասկածյալների բնակության վայրերում ու մեքենաներում:
Նախնական հաշվարկով՝ գողություններով պատճառված վնասի չափը կազմում է 21 միլիոն դրամ:
Կասկածյալները կալանավորված են:
Հարուցված քրեական գործի քննությունը շարունակվում է: