Բարձրացրած խնդրի ու առաջարկվող լուծման տրամաբանական կապը չեմ տեսնում. Գորգիսյանը՝ Էնֆիաջյանին

ԱԺ «Լուսավոր Հայաստան» խմբակցության անդամ Գևորգ Գորգիսյանն ապրիլի 9-ին ԱԺ պաշտպանության ու անվտանգության հարցերի մշտական հանձնաժողովի նիստում դիմեց «Բարգավաճ Հայաստան» խմբակցության անդամ Վահե Էնֆիաջյանին՝ «Զինվորական ծառայության և զինծառայողի կարգավիճակի մասին» ՀՀ օրենքում լրացում կատարելու մասին նախագծի վերաբերյալ:

Նա կարևորեց հարցը, սակայն նշեց.

«Բարձրացրած խնդիրն ու առաջարկվող լուծումն այնքան էլ համահունչ չեն, եթե չասեմ՝ տրամաբանական կապը չեմ տեսնում»:

Գորգիսյանը հետաքրքրվեց՝ եթե խոսում են զոհերի, ինքնասպանության դեպքերի, միջանձնային հարաբերությունների հետևանքով եղած զոհերի մասին, արդյո՞ք 5 ամսվա ուսումնական փուլը փոխելով 1 տարվա՝ լուծո՞ւմ են այդ հարցը:

«Մնացած 7 ամսվա ընթացքում զինվորը ինչո՞վ պետք է զբաղվի, այդ հարցի պատասխանը չկա, կա՞ ուսումնասիրություն, որ այդ 5 ամսում զինվորը չի ստանում բավարար գիտելիքներ: Ի՞նչ ծրագիր եք առաջարկում, որի դեպքում կխուսափենք զոհերից: Նաև նշեմ, որ Իսրայելի հետ, թշնամիներով շրջապատված լինելուց բացի, այլ ընդհանրություն չունենք, մենք ուղղակի իրավունք չունենք համեմատել մեր բանակը Իսրայելի բանակի հետ»,- ասաց նա:

Էնֆիաջյանն արձագանքեց.

«Չենք համեմատում, փորձն ենք մեջբերում»:

Գորգիսյանը պատասխանեց, որ դա անտեղի է, նշեց՝ եթե չխուսափենք զոհերից, տարբերություն չկա՝ 18, թե՞ 19 տարեկանում է զոհվում քաղաքացին, երկու դեպքում էլ լրջագույն խնդիր է: Պատգամավորը նաև առաջարկեց, որ գործընկերը թվեր հրապարակի, եթե կան այդպիսիք, որ ապացուցում են՝ իրավիճակը կարող է փոխվել այս փոփոխության արդյունքում, ապա նշեց՝ անհրաժեշտության դեպքում կարող են հետո փակ քննարկում անցկացնել:

«Անկեղծ ասած՝ ես զարմանում եմ, մենք օրենսդիր մարմին ենք, օրենսդրական լուծումներ ենք տալիս, հաջորդող գործընթացները իրավակարգավորումներ են, որոնք մեր գործառույթների մեջ չեն մտնում, մնացած ընթացակարգը նախարարի որոշումներով է կարգավորվում: Իսրայելի օրինակն ընդամենը մեկ օրինակ է երկրի, որը մարտական ծառայություն է իրականացնում, յուրաքանչյուր օր կարող են շփման գծում մարտական գործողություններ սկսվել, և մարտական պատրաստվածությունը հաշվի առնելով՝ մեկ տարի հետաձգելուց, պատրաստվածությունն ավելացնելուց հետո մահվան դեպքերը, դժբախտ դեպքերը ավելի քիչ են, սա օրինակ է»,- ասաց Էնֆիաջյանը:

Գորգիսյանն էլ նշեց՝  այդ նախաձեռնությունը պետք է լինի նաև ինչ-որ խնդրի լուծում տալու մղումից ելնելով, ապա հարց ուղղեց՝ արդյո՞ք զոհերի պատճառը հենց այս 5 ամսվա ընթացքում ստացված անբավարար գիտելիքները կամ փորձն են: Պատգամավորն ընդգծեց՝ եթե այդ ավելացվող 7 ամիսը պետք է ոչ մի բան չանի, զինծառայողը կգերադասի 1,5 տարի ծառայել և շուտ զորացրվել:

«Ինչի՞ համար է ծախսելու զինծառայողն այդ 74 ամիսը: Եթե սա չունենք, ուղղակի անիմաստ է դառնում նախաձեռնությունը: Ինձ հետաքրքիր է՝ ի՞նչ չի ստանում զինծառայողը այդ 5 ամիսների ընթացքում, որ պիտի ստանա»,- հետաքրքրվեց Գորգիսյանը:

«Ես զարմանում եմ` հա´մ օրինակն եք բերում, հա´մ ասում եք՝ ուսումնասիրություն ունեք, բա ուսումնասիրությունն եմ հրապարակում»,- ասաց Էնֆիաջյանը՝ հավելելով, որ զինված ուժերում գրանցվող դժբախտ դեպքերի պատճառը գիտելիքի պակասը՝ անփորձությունն է, և որ իրենց ներկայացրած նախագիծը կանխարգելող միտում ունի:

Հանձնաժողովի նախագահ Անդրանիկ Քոչարյանը հորդորեց դադարեցնել բանավեճը, ինչին Էնֆիաջյանը պատասխանեց, որ ինքը դեռ չի արձագանքել:

«Դուք ոնց որ անընդհատ արձագանքում եք իրար»,- ասաց Քոչարյանը:

«Այս տվյալները, որ ներկայացնում եմ, բնականաբար, ուսումնասիրության, կատարված աշխատանքի արդյունք են: Սա կանխարգելող միտում ունի, որ մեր երիտասարդների, պատրաստվածություն չունեցողների հետ դժբախտ դեպքերը, անցանկալի դեպքերը կանխարգելենք»,- պատասխանեց Էնֆիաջյանը: