Արցախի մեր հայրենակիցները պահապանն են մեր հավաքական ինքնության. Զոհրաբ Մնացականյան

«Մենք պատասխանատու ենք առաջին հերթին մեզ համար, մեր երկրի հզորության համար»,- ապրիլի 27-ին՝ ՀՀ քաղաքացու օրը, կազմակերպված քննարկման ժամանակ, նշեց ՀՀ արտաքին գործերի նախարար Զոհրաբ Մնացականյանը:

Նա ասաց՝ միջազգային հարաբերություններում կարևոր է միջազգային հանրության գնահատականը՝ ինչ է կատարվում Հայաստանում, դա միտված է ՀՀ հեղինակության բարձրացմանը: Նախարարը, սակայն, նշեց՝ իրենք պատասխանատու են առաջին հերթին ՀՀ քաղաքացու, հայ ժողովրդի առջև, և թե ինչպես է ՀՀ քաղաքացին ընդունում ու գնահատում՝ ինչպիսին է ՀՀ հեղինակությունը, ինչ է կատարվում Հայաստանում, դա ավելի կարևոր է:

Մնացականյանը նշեց՝ պետք է ազգային նպատակները, ազգային օրակարգում ձևակերպված առաջնահերթությունները առաջ տանել: Նախարարը խոսեց նաև Արցախի խնդրի մասին:

«Արցախը մեզ համար, բոլորիս համար, հավաքական առումով մեր գերակա խնդիրն է: Մենք ունենք իրավիճակ, երբ մեր 150 հազար հայրենակից այսօր, ըստ էության, պահապանն են մեր հավաքական պաշտպանության, հավաքական ինքնության: Ուղղակի պատկերացրեք, հիմա մեր հայրենակիցները Ստեփանակերտում այսօր՝ այս ժամին, ապրում են իրենց կյանքով, հոգսերով, իրենց նպատակներն են առաջ տանում, բարեկեցություն ստեղծում, անվտանգություն ապահովում, բայց ի տարբերություն ուրիշների՝ այնքան մոտ են նրան, որ կոչվում է շփման գիծ, այնքան մոտ են վտանգին: Նրանց անվտանգությունը բոլորիս համար գերակա խնդիր է, սա պաշտպանությունն է մեր հավաքական ազգային գիտակցության ու ինքնության: Պատկերացրեք՝ որքան ծանր է լինելու այդ հետևանքը, եթե մեր հայրենակիցների համար վտանգը աճի և ունենանք իրավիճակ, ինչպես ունեինք 90-ականների սկզբին»,- ասաց նախարարը:

Մնացականյանը կրկին ընդգծեց՝ Հայաստանի Հանրապետությունը միանշանակ եղել է և մնում է Արցախի անվտանգության երաշխավորը, որևէ այլ ձևաչափ, ձև չի եղել ու չկա այսօր, որպեսզի ապահովվի մեր հայրենակիցների անվտանգությունը: Նախարարն ասաց՝ մենք ցանկանում ենք խաղաղություն, բայց դրանով հանդերձ չենք կորցնում մեր ինքնավստահությունը և գիտակցումը, որ գիտակցումը, որ պաշտպանվելու և հակադարձելու մեր ունակությունն ուժեղ է: ԱԳ նախարարը նշեց՝ այն, որ մեր երկրում այդքան ծավալուն քննարկում-բանավեճ կա, չափազանց դրական է:

«Հավաքական առումով այդ բանավեճերի մեջ ստուգում ենք, գնահատում մեր հավաքական մոտեցումները մեր ազգային հարցերի շուրջ, առավել ևս ԼՂ հարցում: Իմ խորը համոզմունքն է, որ ժողովրդավարական հասարակությունները շատ ավելի հայրենասեր են ու ամուր, բաց են քննարկումների առաջ ու բանավեճի միջոցով փորձում են հասնել կոնսենսուսի, հստակեցնելով ազգային նպատակները, բանավեճի միջոցով ձևավորում այն, ինչ ընդունելի է»,- հավելեց նա: