Մեկնո՞ւմ եք հանգստի. հավաքեք ճամպրուկը մեր օգնությամբ

Արդեն շատերի մոտ ամառային արձակուրդային տրամադրություն է: Ամենուր արձակուրդի անցկացման մասին հարցերն ակտուալ են ու ընկերներից այդ ընթացքում տարբեր խորհուրդներ ենք լսում, թե ուր գնալ հանգստանալու, որտեղ կարելի է լավ ժամանակ անցկացնել, ինչպես դասավորել ճամպրուկը և այլն:

SHANTNEWS.am-ը որոշել է  թեթևացնել ձեր մտածմունքները և համախմբել ենք հանգստի գնալու առաջին անհրաժեշտության իրերը, իսկ միչև այս ներկայացրել էինք, թե ինչպես կարելի է ճամպրուկը դասավորել:

Իհարկե, հանգստի մեկնելու ճամպրուկը վերջին վայրկյանին դասավորելը վատագույն գաղափարներից մեկն է և խորհուրդ ենք տալիս գոնե նվազագույնը 3 օր մտածեք, հնարավորինս ռացիոնալ ընտրեք հանգստի տանելու իրերն ու շորերը:

… և այսպես սկսենք հավաքել ճամպրուկը

Արևապաշտպան քսուքներ, յուղեր ու կրեմներ: Կարևոր է այդ կրեմներից ընտրել ձեր մաշկի համար նախատեսվածը, քանի որ շատ հաճախ մարդիկ նախընտրում են վերցնել ամենաուժեղ ազդեցություն ունեցող արևապաշտպան կրեմը, սակայն հնարավոր է այն ընդհանարպես ձեզ չօգնի, նույնիսկ կարող է խանգարել արևայրուք ստանալու ցանկալի չափաբաժնին:

Հիգիենայի պարագաներից առաջնահերթ են…

• ատամի խոզանակ և մածուկ,
• օճառ,
• լոգանքի գել,
• դիմահարդարումը մաքրելու կրեմներ,
• դեմքի և մարմնի փափկեցնող կրեմներ։

Եթե մինչ այդ չեք հաճախել մազահեռացման, ապա ճամպրուկում տեղ հատկացրեք մազահեռացնող գործիքների համար:

Շարունակենք ցուցակը…

• 2-3 կրծկալ, 5-7 ներքնազգեստ: Գույներն ընտրեք՝ ըստ ձեր ընտրած շորերի և հարմարության,
• Նվազագույնը երկու լողազգեստ, սակայն եթե ցանկանում եք լողափում գեղեցիկ ֆոտոշարք ունենալ, ապա ևս երկու լողազգեստը չէր խանգարի՝ հանուն լավ ու բազմազան լուսանկարների,
• Շորտեր և կիսաշրջազգեստներ: Այստեղ քանակության հարցում ինքնուրույն կողմնորոշվեք, բայց հիշեք մյուս շորերի հետ համադրելու մասին,
• Կարճաթև բլուզներ,
• Կոշիկ՝ մեկ զույգ ծովափնյա, մեկ զույգ շրջելու, մեկ զույգ հարմարավետ ու փակ կոշիկ՝ մարզակոշիկ + գուլպա:

Եթե այսքանն արդեն տեղավորել եք ճամպրուկում, ապա ճիշտ ժամանակն է ընտրել երեկոյան կոկտեյլային զգեստը, քանի որ հաստատ հանգիստը միայն ծովափով ու հյուրանոցի ծառայություններով չի սահմանափակվում և ուղղակի անհրաժեշտ է բացահայտել տեղանքի լավագույն ժամանցի վայրերը:

Անկախ նրանից, թե ուր եք գնում և ինչ աստիճանի թեժ եղանակ են խոստացել օդերևութաբանները, այնուամենայնիվ, ապահովության համար վերցրեք մեկ ջինս ու երկարաթև բլուզ կամ ժակետ:

Եվ վերջում…

Մի պահ պատկերացղրեք ձեր հանգիստը` առանց ժամանակակից տեխնոլոգիաների ու գաջեթների, իհարկե, առաջին հայացքից հաճելի կլիներ, բայց մեր օրերում անհնար է նույնիսկ շենքի հարևանությամբ գտնվող խանութ գնալ առանց սմարթֆոնի: Եվ, ի վերջո, ինչպես կարելի է գնալ ծովափնյա հանգստի ու Instagram-ում ու Facebook-ում չլուսաբանել այդ թեժ օրերը: Չէ որ ձեր մյուս ընկերներն արդեն արել են դա, հիմա հերթը քոնն է՝ «նախանձի» թիրախ դառնալու:

Այնպես որ, անպայման վերցրեք ձեր սմարթֆոնը, լիցքավորիչը և power bank-ը: Եթե տեղ ունեք ու ցանկություն, ապա նոթբուքը նույնպես կարող եք տեղավորել ճամպրուկում, նույն սկզբունքով նաև լուսանկարչական ապարատը:

Եվ ամենակարևորը՝ վերջում ստուգեք փաստաթղթերը, կանխիկ գումարը, քարտերը, ապահովագրությունը, տոմսերը: Գումարը կարող եք կիսել ու պահել տարբեր տեղերում՝ եթե կորցնեք ձեռքի պայուսակը, ապա գոնե ամբողջովին առանց գումարի չեք մնա:

Հ.Գ. Իսկ ամենամենավերջում մի փոքրիկ լայֆհաք՝ եթե չի փակվում ճամպրուկը, ապա ուղղակի նստեք ճամպրուկի վրա և զուգահեռ փակեք: Աշխատող միջոց է։