Ո՞վ է ասել, որ կառավարության նախագծերը աստվածաշնչյան բյուրեղյա վիճակում են. թեժ քննարկում ԱԺ-ում

Այսօր ԱԺ-ն քննարկում էր «Քրեակատարողական ծառայության մասին օրենքում» փոփոխություն կատարելու մասին «Լուսավոր Հայաստան» խմբակցության պատգամավոր Տարոն Սիմոնյանի նախագիծը: Դրանով առաջարկվում է քրեակատարողական ծառայության այն աշխատակիցների կարգավիճակը, որոնց լիազորությունները կասեցվել են, հավասարեցվի իրավապահ ծառայողների կարգավիճակին, այսինքն՝ մինչև քրեական գործի ավարտը ու վճռի կայացումը վճարվեն աշխատավարձերը: «Իմ քայլը» խմբակցության անդամ Նիկոլայ Բաղդասարյանը, որը հարակից զեկուցող է, կողմ էր առաջարկին, դեմ էր, սակայն, կառավարության ներկայացուցիչը` արդարադատության փոխնախարար Տիգրան Խաչիկյանը, որն ասաց.

«Հակասություն չե՞ս տեսնում աշխատավարձի հաշվարկման գաղափարական հենքի մեջ, հաշվարկվում է աշխատանքային պարտականությունները կատարելու դիմաց, ձեր ասածն ու այս կոնցեպտը չե՞ն հակասում»:

Սիմոնյանը բացասական պատասխան տվեց, քանի որ աշխատողի մեղքով չի գտնվում պարապուրդում:

«Իմաստն այն է, որ քրեակատարողական ծառայողների դեպքում ևս իրավապահներին հավասարեցված հաշվարկվի աշխատավարձն այն դեպքում, երբ լիազորությունները դադարեցվում են»,- պարզաբանեց նա:

Կառավարության ներկայացուցիչը, ըստ էության, դեմ էր` կարծիք հայտնելով, որ եթե կիրառվում է քրեակատարողական ծառայության աշխատակիցների նկատմամբ, ապա նույնկերպ պետք է տարածվի հարկադիր կատարման, փրկարար ծառայության, զինծառայողների և այլոց նկատմամբ: Բացի դրանից, դա պետբյուջեի վրա մեծ ծախսեր է ենթադրում:

Առաջարկություններ եղան  հետ կանչել և վերամշակել նախագիծը:

«Մենք էս պահին էս տեքսով ընդունումը համարել ենք ոչ նպատակահարմար, բայց հետագայում չենք բացառել վերանայումը»,- ասաց Խաչիկյանը:

Քննարկմանը միացած «Բարգավաճ Հայաստան» խմբակցության անդամ Գևորգ Պետրոսյանը ասաց.

«Ո´չ Աշխատանքային օրենսգիրքը, ո´չ այլ հարց չի կարգավորում էս հարցերը, հիմա այս մարդու հարցերը ո՞նց պետք է լուծվեն: Եկեք մի հատ մշակենք, կառուցողական աշխատենք: Աշխատանք է կատարվում, մարդը իրեն ծանրաբեռնում է, չարչարվում է, ու կառավարությունը ասում է՝ գիտե՞ք ինչ, էս վիճակով, ու գաղափարը մի քանի ամիս տշում են առաջ: Իսկ ո՞վ է ասել, որ կառավարության նախագծերը աստվածաշնչյան բյուրեղյա վիճակում են, օգնենք, ո՞վ է ասել, որ Սիմոնյանի նախագծերը բացարձակ ճշմարտություն են: Երևույթը, որ կառավարությունը կարող է օգնության շարժառիթներով ասել՝ էս վիճակում կիսատ է, մեկ էլ կտեսնես, կառավարությունը նույնը բերել է, թե էս է որ կա, ճիշտ ես ասում, թասդ բեր»:

Արձագանքելով՝ փոխնախարարն ասաց.

«Պարո´ն Պետրոսյան, ռոմանտիկ երանգ տվեցիք նրան, ինչը որ միայն իրավական դաշտում է»:

Ի վերջո, Տարոն Սիմոնյանը որոշեց հետաձգել նախագծի քննարկումը մինչև երկու ամիս ժամանակով: