Շիրակի մարզի որոշ բուժհաստատություններում պետպատվերի գումարներն արդեն սպառվել են

Շիրակի մարզի բուժհաստատությունների մեծ մասը գերակատարել է պետպատվերով բուժսպասարկման ծավալները, ինչը, ըստ ամենայնի, կհանգեցնի ժամկետներից շուտ սպառման, ինչպես նախորդ տարիներին։ Ախուրյանի բժշկական կենտրոնի ստացիոնար բաժանմունքում արդեն պետպատվերի գումարներն սպառված են, հիվանդանոցն էլ անցել է հիվանդների հերթագրմանը։ Իսկ Արթիկի բժշկական կենտրոնում քիչ ֆինանսավորման հետևանքով շտապօգնության ծառայությունն է ոչ լիարժեք աշխատում։ Ունեցած 4 մեքենաներից միայն 1-ն է կանչի դուրս գալիս։

Ախուրյանի բժշկական կենտրոնը տարածաշրջանի 36 գյուղ է սպասարկում։ Վեցուկես մլն դրամ պետպատվերի գումարը հունիսին սպառվել է: Սա վկայում է բարձր դիմելիության մասին ու նաև, որ այստեղ են աշխատում մարզի գլխավոր պրոկտոլոգն ու գլխավոր անոթային վիրաբույժը։ Պետպատվերից օգտվող հիվանդներին բուժհաստատությունը 1 ամիս է՝ չի սպասարկում, անվճար վիրահատություններ չեն անում։

Տնօրեն Զավեն Մանուկյանի խոսքերով՝ հիվանդներին հերթագրում են, որ եթե լրացուցիչ ֆինանսավորում լինի, ապա կանչեն։ 20-ից ավելի հիվանդ արդեն հերթագրել են, բայց ունեցել են դիմողներ, որոնք անվճար բուժօգնությունից օգտվելու արտոնությամբ չեն կարողացել սպասել, առողջական վիճակը թույլ չի տվել, դրա համար տեղում ստիպված վճարովի վիրաբուժական ծառայությունից են օգտվել: Դիմել են առողջապահության նախարարություն՝ լրացուցիչ ֆինանսավորման խնդրով, խոստացել են 2-րդ կիսամյակում բյուջեն վերանայել։

Պետպատվերի գումարի խնդիր ունի նաև Արթիկի բժշկական կենտրոնը։ Ամբողջ տարվա համար հատկացված գումարի 80 տոկոսը սպառել են: Մնացած 20 տոկոսը մինչև հոկտեմբեր սպառելուց հետո նույն պահանջով՝ լրացուցիչ ֆինանսավորման, իրենք էլ են ստիպված դիմելու նախարարությանը:

Ըստ տնօրեն Բաբիկ Մարտիրոսյանի՝ պետպատվերով առաջնահերթ սպասարկում են անհետաձգելի դեպքերը, վիրաբուժական և թերապևտիկ ծառայությունները, աշխատում են պետպատվերով նեղ մասնագիտական ծառայությունների մեծ ծավալ չիրականացնել։ Ֆինանսական խնդիրներից անկախ, հիվանդանոցը չի կարող դադարեցնել շտապօգնության ծառայության աշխատանքը։ Քիչ ֆինանսավորման պատճառով մեկ մեքենա են կանչերին ուղարկում՝ ունենալով 4-ը: Բուժկենտրոնին տրամադրված նոր մեքենաներն այդպես էլ չեն շահագործել:

Ըստ տնօրենի, եթե 2-րդ բրիգադն աշխատեր, ապա հատկացումները տարվա կեսին սպառված կլինեին։ Երբ ծառայության միակ մեքենան հանկարծ որոշվեց, որ ծանր հիվանդ է տեղափոխելու Երևան, ուրեմն Արթիկն ու տարածաշրջանի 23 գյուղերը կմնան առանց շտապօգնության սպասարկման։ Իսկ հետևանքները ավելի վատն են լինում, բուժքույրն ու վարորդը ամեն անգամ կանչի վայր ուշացած հասնելու համար կռիվների մեջ են հայտնվում։

Շտապօգնության ևս մեկ բրիգադ ավելացնել տնօրենը չի կարող, ծառայությունը չորսուկես մլն դրամի գերակատարում արդեն ունի։ Ըստ տնօրենի՝ մինչև տարեվերջ այն կկրկնապատկվի: Վստահ էլ չեն, որ նախարարությունը գերակատարածը կփոխհատուցի։

Բժշկական կենտրոնը նախկին տարիներից մոտ 19 մլն դրամի պարտքեր էլ ունի: Տարեցտարի հիվանդանոցի դիմելիությունը նվազել է շենքային վատ պայմանների պատճառով։ 15 տարի առաջ կատարված վերանորոգումները լուրջ թերություններով են, որոնց գումարվել են նոր խնդիրներ: Վիրահատարանը չի օգտագործվում, պատերն ախտահանել անհնար է, ներկի շերտն ինքն իրեն պոկվում է:

Անցած տարի հաստատված հրատապ խնդիրների լուծման ծրագրով հիմա են վերանորոգումներ արվելու: Վերանորոգման մեկնարկից մեկ ամիս չանցած էլ աշխատանքները հիվանդանոցում դադարեցվել են: Հիմա էլ կազմված նախագիծն է փոխվելու: