Ցնցումներ անցնցում հեռացումից առաջ. ի՞նչ է կատարվում Մերկելի հետ

Այսօր Գերմանիայի կանցլեր Անգելա Մերկելի ծննդյան օրն է: Հոբելյանական տարի է, քանի որ Մերկելը նշում է իր 65-ամյակը: Սակայն նշենք, որ վերջին շրջանում միջազգային հանրությանը մտահոգում է կանցլերի առողջական վիճակը: Գերմանիայի ղեկավարն արդեն երեք անգամ պաշտոնական հանդիպումների ժամանակ ցնցումների մեջ է ընկնում:

Հուլիսի 10-ին հերթական պաշտոնական հանդիպման ժամանակ Մերկելը կրկին ցնցումների մեջ է ընկել և այդ պահին նկատելի էր, որ կանցլերը շշուկով ինչ որ բան էր ասում, որը հետագայում մասնագետները վերլուծեցին և նշեցին, որ այդ պահին Մերկելն արտաբերել է  «Ich schaffe das» արտահայտությունը, որը թարգմանաբար նշանակում է «Ես կարող եմ հաղթահարել»:

Հիշեցնենք, որ առաջին անգամ Անգելա Մերկելը ցնցումների մեջ է ընկել հուլիսի 18-ին: Այդ ժամանակ նա ընդունում էր Ուկրաինայի նախագահ Վլադիմիր Զելենսկուն և կանցլերի նստավայրում լսում էին երկու երկրների հիմները: Կատարվածից ժամեր անց տեղեկացրին, որ կանցլերն, ուղղակի, ջրազրկված է: Դրսում էլ կիզիչ արև է եղել, ինքնազգացողությունը դրանից է վատացել, մի քանի բաժակ ջուր խմելուց հետո լավացել է:

9 օր անց Մերկելը կրկին ցնցումների մեջ է: Գերմանիայի նախագահական նստավայրում է նա ներկայացնում է արդարադատության նոր նախարարին: Այս անգամ արդեն ինքնազգացողության վատացումը չէր կարելի վերագրել վատ եղանակին։ Կանցլերի գրասենյակից տեղեկացնում են, որ ապաքինվում է և բուժումը դեռ ավարտված չէ:

«Բայց առաջընթաց կա»,- վստահեցրել է անձամբ Մերկելը և հավելել, որ այդ ամենը մի որոշ ժամանակ իր հետ է լինելու և նա ստիպված դիմանալու է:

Մերկելը, երբ երրորդ անգամ վատացավ, այս անգամ ոչ մի արձագանք չեղավ: Կանցլերն ուղղակի նշեց, որ նա շատ լավ է զգում իրեն:

Հաջորդ պաշտոնական հանդիպումների ու ընդունելությունների ժամանակ հիմների լսելու արարողությանը Անգելա Մերկելը նստած է եղել: Ըստ կարգի՝ հիմները նստած չեն լսում, դա դեմ է պաշտոնական արարողակարգին:

Դեռևս պաշտոնական արձագանք չկա այն մասին, թե, ի վերջո, ինչ է կատարվում Գերմանիայի կանցլերի հետ, բայց բժիշկներն արդեն մեկնաբանել են, թե ինչ կարող է լինել կանցլերի մոտ: Բժիշկների կարծիքով՝ Մերկելի մոտ թրեմոր է՝ նյարդային հիվանդություն, որի հետևանքով ձեռքերը և մարմինը ցնցումների մեջ են ընկնում: Այդ հիվանդությունն առանձին դեպքերում կարող է հանգեցնել Պարկինսոնի հիվանդության կամ ցրված սկլերոզի:

Նեյրոլոգիայի և նեյրոֆիզիոլոգիական ինստիտուտի բժիշկ Ուվե Յանկեն կարծում է, որ Մերկելի մոտ այնքան էլ վատ հիվանդության նախանշաններ չեն: Նա այն եզրակացության է եկել, որ Մերկելի մոտ օրթոստատիկ թրեմոր է: Այսինքն՝ ցնցումները տեղի են ունենում այն ժամանակ, երբ մարդնանշարժ կանգնած է.

«Հենց մարդը սկսում է շարժվել, քայլել, ապա ցնցումները միանգամից անցնում են»,- ասել է Ուվե Յանկեն:

Թրեմորից  ամբողջությամբ ազատվել հնարավոր չէ, բայց դեղերով հնարավոր է խուսափել ցնցումներից և կարգավորել մկանային համակարգը:

Մոլդովայի վարչապետ Մայա Սանդուի հետ

Դանիայի նոր վարչապետ Մետտե Ֆրեդերիքսոնի հետ

Այս ամենի ֆոնին Բունդեսթագի ընդդիմարդիր «Այլընտրանք Գերմանիայի համար» կուսակցության պատգամավորներից մեկը դավադրությունների տեսություններին է մատնվել և նշել է, որ կանցլերի մոտ, հավանաբար, լուրջ խնդիր է, որը նույնիսկ կապված է ալկոհոլիզմի հետ:

«Կանցլերը պետք է ստուգվի և հանրայնացնի իր առողջական խնդիրը, քանի որ նրա առողջության խնդիրը ոչ միայն իրեն է վերաբերում, այլև ամբողջ Գերմանիային»,- ասել է պատգամավոր Պյոտր Բիստրոնը:

Մերկելի առողջական վիճակի մասին նաև հարցում են հասցրել անցկացնել, և Գերմանիայի քաղաքացիների 59 տոկոսը կարծում է, որ Մերկելի առողջական վիճակն անձնական խնդիր է:

Ի՞նչ կլինի, եթե Մերկելը հրաժարական տա

Մերկելից հետո կանցլերի պաշտոնը ժամանակավորապես կզբաղեցնի վիցե կանցլեր Օլաֆ Շոլցը, որ Սոցիալ դեմոկրատական կուսակցության ներկայացուցիչ է:

Այնուհետև Գերմանիայի նախագահ Ֆրանկ-Վալտեր Շտայնմայերը կոալիցիաների ղեկավարների հետ խորհրդակցություններ պետք է անցկացնի, որոնց արդյունքում պետք է որոշեն կանցլերի թեկնածու, որը ներկայացնելու են Բունդեսթագում քվեարկության:

Եթե թեկնածուն չի կարողանում մեծամասնության վստահության քվեն ստանալ, ապա նույն գործընթացը տեղի է ունենում երկու շաբաթ անց՝ նույն կամ ուրիշ թեկնածուի հետ:

Նշենք, որ ավելի վաղ Անգելա Մերկելն արդեն հայտնել էր, որ պատրաստվում է կանցլերի պաշտոնում մնալ մինչև իր լիազորությունների ավարտը՝ 2021 թվականը: