Ջրաբույսը` պարարտանյութի ու հավելանյութի հումք. գյումրեցի գործարարի ծրագիրը

«Իմ քայլը հանուն Շիրակի» բիզնես համաժողովին Շիրակի մարզի մի շարք անհատ ձեռներեցներ ու գործարարներ նոր ներդրումային ծրագրեր են ներկայացրել: Կառավարության համաֆինանսավորման դեպքում դրանք կարող են վերածվել կոնկրետ ձեռներեցության: Ընդ որում, շիրակցի ձեռներեցները նորարար ու անգամ տարածաշրջանում նմանը չունեցող ծրագրեր են ներկայացրել:

Օրինակը քլորելա վուլգարիս կոչվող ջրաբույսի արտադրության ծրագիրն է, որի հեղինակը գյումրեցի անհատ ձեռներեց Աշոտ Կարապետյանն է: Ունիվերսալ այս բույսը կարող է օգտագործվել որպես անասնակերի հավելանյութ, պարարտանյութ և դեղամիջոց մարդկանց համար: Հայաստանում քչերին ծանոթ ջրիմուռի օգտակարությունը ձեռներեցը ապացուցում է միջազգային փորձով:

Տարաների մեջ լցված ու հատուկ լուսային լամպերի տակ տեղադրված կանաչ հեղուկն իրականում քլորելա վուլգարիս կոչվող ջրաբույսն է: Մի քանի տարի առաջ նախկին ցանցային մասնագետ Աշոտ Կարապետյանի ուշադրությունը այն գրավեց ու սկսեց տեղայնացնել ջրաբույսից կերային հավելուկ ու պարարտանյութ ստանալու միջազգային փորձը: Իսկ ինչ է իրենից ներկայացնում քլորելան ՝ այն միկրոսկոպիկ չափսերի ջրաբույս է։ Հայտնաբերվել է Ղազախստանում, Հայաստանում բնության մեջ չի հանդիպում։ Քլորելան հարուստ է բոլոր տեսակի վիտամիններով, ամինաթթուներով, միներալներով և պարունակում է իր մեջ շուրջ 667 կենսաբանական ակտիվ նյութ, ինչի հաշվին կենդանական օրգանիզմների վրա դրական ազդեցություն ունի: Նախկին ցանցային մասնագետը իսկական քիմիկոս է դարձել, իսկ լաբորատորիան տան նկուղն է:

Որպես անասնակերի հավելանյութ Շիրակի մարզում քլորելան փորձարկել է, արդյունքները գոհացնող են եղել, պահանջարկ էլ կա, բայց արտադրությունը դադարեցրել է շենքային պայմանների պատճառով: Պահանջարկին համապատասխան մեծ քանակության արտադրանք ունենալու համար կոյուղին պարտադիր էր, ինչը նկուղային տարածքում ունենալ հնարավոր չէր:

«Ունեմ տեխնոլոգիան, ունեմ սարքավորումները, որոնք օրական կարող են 100 լիտր արտադրել: Մոտավորապես 60:40 հարաբերակցությամբ ՝ 60-ը իմ կողմից՝ 1.5 մլն դրամ, և 40-ը պետության կողմից՝ 1.2 մլն դրամ եմ հայցում: Այս գումարը տարածք ունենալու համար է պետք: Հետաքրքրվողներ քլորելայով եղել են: Բիզնես համաժողովի ընթացքում Ագրարային համալսարանի ռեկտորը հետաքրքրվեց՝ որպես հետաքրքիր ապրանք: Ինձ հետաքրքրում են մանր ֆերմերները, որոնք ի վիճակի չեն գնել թանկարժեք կենդանիներ, ստանալ խելացի գոմեր: Նրանք այս ջրաբույսի միջոցով կարող են համեստ պայմաններում ստանալ լավ արդյունք, ընդ որում՝ էկոլոգիապես մաքուր արդյունք»,- SHANTNEWS-ին ասել է անհատ ձեռներեց Աշոտ Կարապետյանը:

Բիզնես համաժողովին քլորելայի արտադրության կազմակերպումը մեկ այլ նպատակի համար էլ է դիտարկվել: Այս ջրաբույսը կարող է փրկություն լինել Սևանի համար: Աշոտ Կարապետյանը բացատրում է՝ քլորելան անհրաժեշտ, բայց միակ պայմանը չէ Սևանի ջուրը մաքրելու համար: Ջրաբույսի կիրառման հետ մեկտեղ անհրաժեշտ է, որ Սևանի կենսաբազմազանությունը զարգանա:

Նոր արտադրություն սկսելու դեպքում պահանջարկը գործարարը հաշվարկել է, որ կկազմի օրական մոտ մեկուկես տոննա: Քլորելա ձեռք բերելու ցանկություն են հայտնել մարզի գյուղացիական տնտեսությունները, նաև հանրապետության ամենամեծ ճագարաբուծական ֆերման: