Գյումրիի կենտրոնում տարածքները սեփականաշնորհվել են լումաներով, դրանցում ապօրինի կառուցապատումը շարունակվում է

Գյումրիում որոշ հանրային սպասարկման օբյեկտներ համարվում են ապօրինի ու ինքնակամ շինություններ, որոնք ոչ թե ապամոնտաժելու, այլ օրինականացնելու հարցում քաղաքապետարանը սեփականատերերի հետ համաձայնության չի գալիս:

Այս մասին այսօր խոսել են քաղաքապետի տեղակալն ու իրավաբանական բաժնի պետը: Ըստ նրանց՝ սեփականատերերը շինություններն օրինականացնելու փոխարեն գերադասում են տույժ ու տուգանք վճարել: 10 տարի առաջ սկսած կառուցապատումները, առանց շինթույլտվությունների, շարունակում են նաև այսօր։

Նախ քաղաքապետի տեղակալ Հայկ Սուլթանյանը որոշեց խոսել նախադեպային այն իրավիճակներից, որոնք քաղաքապետարանին հասցրել են դատարան: Խոսքն Աբովյան ճեմափողոցում գտնվող Անի ռեստորանի դռան մասին է:

Ռեստորանի և հարևանությամբ տեղակայված տիկնիկային թատրոնի մուտքը մեկն էր, իսկ մշակութային հաստատության  ղեկավարությունն ու ռեստորանի սեփականատերը միևնույն դռնից օգտվել չէին ցանկանում, խանգարում էին իրար։ Որպես այլընտրանք՝ ռեստորանի սեփականատերը պատուհաններից մեկը վերածեց դռան: Քաղաքապետարանն էլ շինարարությունը որակեց անօրինական ու  կիրառեց վարչական տույժ։

«Տուգանվել է 400 հազար, 2․5 միլիոն դրամ, իրենք խմիչքի համար թույլտվություն են խնդրել, մենք մերժել ենք, քաղաքապետարանը բոլոր քայլերն արել է: Էստեղ կա նաև արվեստագետներից գրություն, տիկնիկային թատրոնից, ծնողներից գրություններ, որոնք խնդրում են այդ կառույցի գործառնական նշանակությունը փոխել ու դարձնել մշակութային»- պարզաբանել է Գյումրիի քաղաքապետի տեղակալ Հայկ Սուլթանյանը:

Քաղաքապետարանը պահանջել է նաև վերականգնել շենքի ճարտարապետական տեսքն ու տիկնիկային թատրոնի մուտքի համար հարկադիր, այսպես կոչված, սերվիտուտ կիրառել, այսինքն՝ թույլատրել նույն մուտքով ելումուտ անել: Դատարանն այս միջնորդությունը մերժել է:

Քաղաքապետարանն անպօրինի և ինքնակամ շինությունների ապամոնտաժման, գործունեության դադարեցման կամ օրինականացման  պահանջով մի քանի հայց է ներկայացրել։ Քաղաքապետարանի իրավաբանական բաժնի պետի տվյալներով՝ այդ կառույցները հիմնականում հանրային սպասարկման օբյեկտներ են և գտնվում են քաղաքի կենտրոնական հատվածներում։

Ինքնակամ ու առանց շինթույլտվության կառուցներ կան նաև վարձակալությամբ տրված սրճարանների կամ սննդի սպասարկման օբյեկտների տարածքներում: Սեփականատերերն ինքնակամ ընդլայնել են իրենց հատկացված տարածքները:

Որպես օրինակ՝ բանախոսները մատնանշեցին Ռիժկովի ճեմափողոցում գտնվող սպասարկման օբյեկտները: Քաղաքապետարանը չի պատրաստվում կիրառել դրանք ապամոնտաժելու խիստ մոտեցում: Սահմանափակվում են վարչական տույժերով ու դատական հայցերով, որոնց ելքը, համենայնդեպս, սեփականատերերի ծրագրերին չի խանգարում:

«Տվյալ հատվածում բազմաթիվ քրեական գործեր կան հարուցված՝ առանց թույլտվության սալիկապատման, երեսպատման և շենքի ճակատային հատվածների փոփոխության հիմքով, իսկ ինչ վերաբերում է սրճարաններին, դրանք վարձակալությամբ են տրամադրվել, և քաղաքացիների անցուդարձի հետ կապված՝ բավականին տեղ կա», -նշել է Գյումրիի քաղաքապետարանաի իրավաբանական բաժնի պետ Աննա Մանուկյանը։

Քաղաքապետարանը հիմա վարձակալությամբ ու սեփականության իրավունքով տրված տարածքների նոր ուսումնասիրություն է սկսելու: Պարզելու են, թե տարիներ առաջ հատկացված տարածքներն արդյո՞ք նպատակային են օգտագործվում:

Շատ տարածքներ երբևէ չեն էլ օգտագործվել: Ուսումնասիրությունների արդյունքում քաղաքապետի տեղակալը չի բացառում, որ սեփականության իրավունքի դադարեցումներ լինեն:

«Կան, որ, ասենք, 2009-2019 թվականներին սեփականաշնորհել են, և ոչ մի բան չկա արված էդ հողատարածքների վրա, գնել են նաև շատ չնչին գումարներով, լումաներով, 400 քմ հող կար, որը գնել են 171 հազար դրամով։ Մենք հանել ենք դրանց պայմանագրերը, որպեսզի ուսումնասիրենք և առաջիկայում էդ փաթեթները կճշտենք՝ էդտեղ շինարարություն կատարվե՞լ է, թե՞ չէ»,- ասել է Հայկ Սուլթանյանը:

Կանոնակարգման անհրաժեշտություն ունի, բայց դեռ անլուծելի է մնում շուկայամերձ տարածքում առևտրականների, այսպես ասած, զավթած մայթերն ու փողոցներն ազատելը: Այս ուղղությամբ քաղաքապետարանը ոչինչ չի ձեռնարկում:

Փողոցաշինական մեծ ծրագրով պայմանավորված՝ հիմնանորոգվող փողոցների երկայնքով տեղադրված կրպակներն են միայն ապամոնտաժվել, որոնք հետո սեփականատերերի կողմից այլ տարածքներում են տեղադրվել: