Շիրակի մարզի գյուղերում ոռոգման ջրի պակաս կա

Ոռոգման սեզոնին Շիրակի մարզի գյուղերում նորից ջրի պակաս է, ու ոչ միշտ է, որ պատճառը գյուղ հասնող ջրի քանակն է: Օրինակը Կամո գյուղում է: Կառնուտի ջրամբարից ջուրը գյուղ հասնում է, բայց ծայրամասային հողակտորներն առանց ոռոգման են մնում: Այստեղ խոսքը ոռոգման ջրի անհավասար բաշխման մասին է` մեկին շատ է հասնում, մյուսն ընդհանրապես իր հողերը չի կարողանում ոռոգել: Իսկ հետևանքում գյուղացիների ու ջրբաժանի միջև մշտական վեճեր են:

Շիր ջրանցքով ամեն օր Կամո գյուղը ստանում է իր հասանելիք ոռոգման ջուրը: Մի մասը դաշտերին է հասնում, մյուսը մտնում է գյուղ ու խողովակներով տնամերձներին: Գյուղում պոմպակայան ունեն, որով էլ ոռոգման ջուր է մղվում, միայն այս եղանակով է հնարավոր ջուր տալ բոլորին: Այս տարի օգոստոսի ջերմաստիճանը նորմայից բարձր է, ոռոգման ջուր շատ է օգտագործվում, ինչի հետևանքով տուժում են գյուղի ծայրամասում գտնվող հողակտորները: Տնամերձներում ամեն ինչ չորացել է:

Գյուղացիներն օրեր առաջ իրենք են ջրբաժանի հետ ստուգել ոռոգման խողովակաշարը ու եկել եզրակացության, որ ոռոգման համակարգում երևի խցանված տեղամաս կա, ինչն էլ խոչընդոտում է, որ ջուրը համեմատաբար բարձրադիր հատվածներ հասնի:

Խողովակաշարում խցանված տեղամասեր ջրօգտագործող ընկերության աշխատակիցները չեն հայտնաբերել: Իսկ թե ինչու ջուրը գյուղի մի մասին հասնում է, մյուսին` ոչ, ջրբաժանն է հայտնաբերել: Ցածրադիր տների բնակիչները շատ են օգտագործում ու վերևի հարևանների համար նախատեսված ջուրն իրենք են փակում ու «գողանում»: Ստացվում է, որ ջուր կա, բայց բոլորին չի հասնում:

«Շոգ է, գալիս, մեկին ասում եմ, որ ջուրը փակի, որպեսզի մյուսին հասնի: Իմ հեռանալուց հետո նորից բացում ու օգտագործում են: Գյուղացիներն իրար չեն զիջում: Եթե ոռոգելու համար հերթ պահեն, ամեն ինչ այլ կերպ կլինի, ջուրը բոլորին կհասնի»,- SHANTNEWS.am-ին ասել է «Շիրակ» ՋՕ ընկերության աշխատակից Սամվել Պողոսյանը:

Ոռոգման ցանցի մի հատվածը չի աշխատում արդեն 30 տարի: 200 տնտեսություն մեկ պոմպակայանի հույսին է, որի հզորությունն էլ չի բավականացնում: Որպեսզի ջուրը մինչև ծայրամասեր հասնի, գյուղացիները պետք է հերթ սահմանեն ու մեկը մյուսին չխանգարեն: Բայց երբ շոգ եղանակին բույսը չորանում է, բարիդրացիական հարաբերությունները հաշվի չեն առնում:

«Առանձին գիծ պետք է լինի, որ կողքերից չհատեն, չմտնեն գծի մեջ, բացեն փականները, որ մղեն ջուրը պոմպով մինչև գյուղի վերևը: Դա հիմա անհնար բան է, որովհետև ոռոգման համակարգը խճճված է, լրիվ տների տակով է գալիս: Բոլորի դռներին փականներ կան: Պետք է 150 աշխատող լինի, որ բոլորի փականները փակեն, ջուրը ծայրամասերին հասցնեն»,- SHANTNEWS.am-ին ասել է Կամո գյուղի վարչական ղեկավար Ռոբերտ Ղազարյանը:

Գյուղի վարչական ղեկավարը այլընտրանքային տարբերակ է ներկայացնում, որի դեպքում ամբողջ գյուղը ոռոգման ջուր կունենա: Ոռոգման համակարգի լրացուցիչ խողովակաշար  է պետք անցկացնել: Առնվազն երկու կմ խողովակաշարի մասին է խոսքը, որի համար գումարներ են պետք, իսկ Շիրակի մարզում այս տարի ոռոգման համակարգերի միայն մասնակի վերանորոգումներ են նախատեսված սուբվենցիոն ծրագրերով: Այդ ցանկում Կամոյի ոռոգման համակարգն ընդգրկված չէ: