Շրջակա միջավայրի նախարարությունն Ամուլսարի հարցով եկել է անտրամաբանական եզրակացության. բնապահպան

Բնապահպան Լևոն Գալստյանը ֆեյսբուքյան իր էջում անդրադարձել է Ամուլսարի խնդրին, մասնավորապես՝ շրջակա միջավայրի նախարարության հրապարակած եզրակացությանը:

«Սեպտեմբերի 11-ին բնապահպանության նախարարությունը հրապարակեց վարչապետի հանձնարարականով Ամուլսարի վերաբերյալ պատրաստած իրենց եզրակացություն-գրությունը։ Չորս էջանոց գրության մեջ նշված կետերը կարդալու ընթացքում տպավորություն է առաջանում, որ սրա տրամաբանական եզրահանգումը կարող է լինել միայն այս ծրագրին նախորդների կողմից 2016-ի ապրիլին տրված բնապահպանական փորձաքննական դրական եզրակացության ուժը կորցրած ճանաչելը։ Օրենքի համապատասխան կետերը լիովին թույլ են տալիս դա անելու՝ հաշվի առնելով նաև կառավարության պատվերով ELARD/TRC-ի կողմից արված ուսումնասիրության մեջ նշված փաստերն ու կառավարության հետ տեսակոնֆերանսի արդյունքները։

Բայց չգիտես ինչու ՀՀ շրջակա միջավայրի նախարարությունը եկել է անտրամաբանական եզրահանգման և գրության վերջում կառավարության աշխատակազմի ղեկավարին առաջարկում է հանձնարարական տալ Բնապահպանության և ընդերքի տեսչական մարմնին իրականացնել ստուգումներ։

Որպես այդ որոշման հիմքեր նշված են ՇՄԱԳՓ օրենքի 21-րդ հոդվածի 2-րդ մասի 1-2-րդ կետերը․

«2. Փորձաքննական դրական եզրակացությունն ուժը կորցրած է ճանաչվում, եթե՝

1) գործունեությունն իրականացվում է փորձաքննության ենթարկված նախագծային փաստաթղթերի և փորձաքննական եզրակացության պահանջների շեղումներով.
2) փորձաքննության ենթարկված նախագծային և հիմնադրութային փաստաթղթերում կատարվել են շրջակա միջավայրի վրա հնարավոր ազդեցություն ունեցող փոփոխություններ՝ առանց լիազոր մարմնին այդ մասին տեղեկացնելու»։

Չգիտես ինչու նախարարությունը շրջանցել է նույն հոդվածի 2-րդ մասի 5-րդ կետը, որտեղ նշված է հետևյալը․

«2. Փորձաքննական դրական եզրակացությունն ուժը կորցրած է ճանաչվում, եթե՝
5) փորձաքննական եզրակացություն տալուց հետո ի հայտ են եկել էկոլոգիական նոր գործոններ»:

Այս կետը լիարժեք իրավական հիմք է տալիս նախարարությանը՝ հաշվի առնելով իր իսկ ներկայացրած գրության փաստերը, ինչպես նաև վերոնշյալ նոր ուսումնասիրության և մինչ այդ արվածների մեջ առկա փաստերի արդյունքում ի հայտ եկած էկոլոգիական բազում նոր գործոններն, ուժը կորցրած ճանաչելու երեք տարի առաջ տրված դրական եզրակացությունը։

Հարց է առաջանում, թե ինչո՞ւ չի արվում, սա, այլ ընտրվում է իրավական առումով ավելի խոցելի ճանապարհ՝ հաշվի առնելով այն փաստը, որ Ամուլսարում հանքի շահագործում սկսված չէ, և տեսչական մարմինը դժվար թե կարողանա հայտնաբերել շատ լուրջ նախագծային շեղումներ։ Իսկ հիմնադրույթային փաստաթղթերում կատարված շրջակա միջավայրի վրա հնարավոր ազդեցություն ունեցող փոփոխությունները պարզելը կարծում եմ ոչ թե տեսչական մարմնի, այլ հենց նախարարության իրավասությունների շրջանակներում է։

Ընդհանրապես տպավորությունն այնպիսին է, որ ինչ-որ անտեսանելի ձեռք ուղղորդում և խմբագրում է կառավարության ու իրավապահ մարմինների գործողությունները, գրություններն ու եզրահանգումները»,- գրել է նա: