Տրվել է «Էլեկտրոնային նախաքննություն» ծրագրի մեկնարկը

Այսօր՝ սեպտեմբերի 24-ին, Քննչական կոմիտեի նախագահը և ԱՄՆ դեսպանը հայտարարել են «Էլեկտրոնային նախաքննության» ծրագրի մեկնարկի մասին:

«Էլեկտրոնային նախաքննության» ծրագիրը ներքին ցանց է, որտեղ յուրաքանչյուր քննիչ լրացնում է իր վարույթում գտնվող քրեական գործի նյութերը և հնարավորություն է տալիս ղեկավար կազմին ծանոթանալ իր կատարած աշխատանքին:

Քննչական կոմիտեն գործունեության 5 տարիների ընթացքում մշտապես համագործակցել է Հայաստանում ԱՄՆ դեսպանատան հետ, որի արդյունքում հնարավոր է եղել կոմիտեում թվայնացնել քրեական գործերը, տարբեր ստորաբաժանումներում ներդնել ներքին ցանց, ձևավորել վարույթը կարճված և դատարան ուղարկված էլեկտրոնային արխիվ և այլն:

«Այս համակարգը կարևոր դերակատարում ունի քննությունները արհեստավարժ կերպով ու ավելի լավ իրականացնելու համար: Բարձր եմ գնահատում այն ջանքերը, որ իրականացվում են Ձեր կողմից՝ տեխնոլոգիական միջոցները կիրառելու ուղղությամբ, որը թույլ կտա աշխատանքներն առավել հաշվետու և թափանցիկ դարձնել: Մենք ցանկանում ենք Հայաստանում կերտել լավագույն իրավապահ համակարգ և օգնել խոչընդոտները հաղթահարելու ճանապարհին», – ասաց Հայաստանում ԱՄՆ արտակարգ և լիազոր դեսպան Լին Թրեյսը:

«Էլեկտրոնային նախաքննություն» ծրագիրը մշակվել և ներդրվել է դեռևս 2016 թվականին, որը փուլ առ փուլ ընդլայնվում է:

Ծրագրի անվտանգությունը.   

1. Ծրագիրն իրենից ներկայացնում է Կոմիտեի փակ ներքին ցանցում գործող ծրագրային համակարգ, որին հնարավոր չէ միանալ ընդհանուր համացանցի միջոցով, ինչն ապահովում է ծրագրի (մասնավորապես նախաքննական գաղտնիք համարվող տվյալների, այդ թվում և անձանց անձնական տվյալների) անվտանգությունը:
2. Բացի արտաքին պաշտպանվածությունից, ծրագրի անվտանգության կարևոր բաղադրիչ է նաև ներքին անվտանգության առկայությունը: Այսինքն՝ Ծրագրով աշխատող յուրաքանչյուր ոք (քննիչ, պետ), Ծրագրում ունենում է իր անձնական տիրույթը, որտեղ մուտք գործելու համար անհրաժեշտ է մուտքագրել համապատասխան անհատական «Մուտքանուն» և «Գաղտնաբառ»:

Ծրագրի անվտանգության հետագա կատարելագործման նպատակով Կոմիտեն համագործակցում է Եվրոպայի խորհրդի փորձագետների հետ:

           «Էլեկտրոնային նախաքննություն» ծրագրի նպատակները

Սույն ծրագրի ներդրման հիմնական նպատակներն են.

1. Քրեական գործերի քննության ժամկետների անհարկի ձգձգման նվազեցում և քննչական աշխատանքների միասնական պրակտիկայի ձևավորում,
2. քննչական աշխատանքում հնարավոր դատավարական խախտումների և տեխնիկական սխալների բացառում,
3. քրեական գործերով վիճակագրության առցանց վարում,

4. քրեական գործերով մուտքագրվող տվյալների և առցանց բազայի ձևավորում:

           «Էլեկտրոնային նախաքննություն» ծրագրի խնդիրները

Ծրագրի ներդրմամբ փորձ է արվել լուծելու հետևյալ հիմնական խնդիրները՝

1. Մարդու իրավունքների և հիմնարար ազատությունների պաշտպանության ապահովում,
2. միասնական վիճակագրության վարում,
3. դատավարական որոշումների և արձանագրությունների կառուցվածքի կազմման միասնականացում,
4. անմիջական վերահսկողության ապահովում: