Գլխավոր դատախազը՝ Մարտի 1-ի գործով վկաների անվտանգությունն ապահովելու մասին

ՀՀ գլխավոր դատախազ Արթուր Դավթյանը սեպտեմբերի 25-ին լրագրողների հետ հանդիպմանն անդրադարձավ շրջանառվող տեղեկություններին, թե իր և ՀՔԾ պետի կողմից ճնշումներ են եղել նախկին ոստիկանապետ Հայկ Հարությունյանի նկատմամբ: Հիշեցնենք, որ երեկ հայտնաբերվել էր Հայկ Հարությունյանի դին:

«Որպես ողջամիտ մարդ՝ այդ վարկածը լսելիս շատ լավ հասկացել եմ՝ ինչ պատվերների իրացման մասին է խոսքը: Այն պատվերների, որ գլխավոր դատախազը կամ ՀՔԾ պետը կարող է շփվել որևէ գործով, ընդ որում՝ առանց բացառության, վկաների հետ, առավել ևս՝ ճնշում գործադրել: Ինձ ճանաչող ցանկացած մեկը գիտե, որ դա անհնար է, իսկ գլխավոր դատախազի պաշտոնը և՛ իրավական, և՛ բարոյական առումով դա թույլ չի տալիս»,- ասաց նա:

Հարցին՝ պատրաստվո՞ւմ է դատի տալ զրպարտության համար, գլխավոր դատախազը պատասխանեց, որ իրականացվում է պրոցես, որի մասին կտեղեկացվեն լրագրողները:

Լրագրողները գլխավոր դատախազին հիշեցրին՝ քննարկվում է հարցը, որ Մարտի 1-ի գործով առանցքային վկաների պաշտպանությունը պետք է պատշաճ ապահովվի:

«Դա իսկապես կարևոր խնդիր է, և մեր երկրում այսօր մենք այդ ինստիտուտը զարգացնելու խիստ անհրաժեշտություն ունենք, տարիներ շարունակ Քրեական դատավարության օրենսգրքում նախատեսել ենք այդպիսի պաշտպանության կամ անվտանգության միջոցներ, բայց դրանց կառուցակարգեր երբեք նախատեսված չեն եղել: Գործնականում բազում բարդություններ են առաջացել: Ներկայում օրենսդրական համապատասխան փաթեթը առկա է, հույս ունենք՝ դրա կիրառման արդյունքում կիրացվեն այդ պաշտպանության միջոցները, հստակ կառուցակարգեր կլինեն, նյութատեխնիկական անհրաժեշտ բազա կապահովվի, որ հնարավոր լինի ցանկացած քրեական գործով պաշտպանության անհրաժեշտություն ունեցող վկաների անվտանգությունն ապահովել»,- ասաց Դավթյանը:

Դիտարկմանը, թե՝ ասում են, որ Հայկ Հարությունյանը չէր կարող ինքնասպանություն գործել, ու նաև խոսվում է Մարտի 1-ի գործով առանցքային վկա Շերիֆի պատշաճ պաշտպանությունն ապահովելու անհրաժեշտության մասին, Դավթյանն արձագանքեց.

«Ես կարևորում եմ այդ խնդիրը: Մեր համապատասխան օպերատիվ-հետախուզական միջոցառումներ իրականացնող մարմինները պարտավոր են հետևել, ձեռնարկել իրենց ընձեռված միջոցները, որ նաև այդ նպատակով որևէ անձի, ընդ որում, ցանկացած քրեական գործով, որպես վկա հարցաքննվելու կամ իրեն հայտնի տեղեկություններ հայտնելու պարագայում, եթե լինեն առանձնակի ճնշումներ, բացահայտվեն և արժանանան իրավական գնահատականի»:

Դավթյանը նաև հայտնեց՝ Հարությունյանը գործով վկայի կարգավիճակ ուներ: