Ջուլիետա Ղուկասյանին ծեծելով մահվան հասցնելու մեջ մեղադրվող ռուս զինծառայողի փաստաբանը խափանման միջոցը փոխելու վերաքննիչ բողոք է ներկայացրել

Գյումրեցի Ջուլիետա Ղուկասյանին ծեծելով մահվան հասցնելու գործի նախաքննությունն ավարտված է, բայց մինչդատավարական վարույթում դեռ քննարկվում է մեղադրյալի խափանման միջոցի հարցը։ Այս մասին Shantnews-ին ասել է տուժողի իրավահաջորդի ներկայացուցիչ Արթուր Սաքունցը։

Հիշեցնենք, 2018-ի դեկտեմբերի 2-ին Գյումրիի Սլաբոտկա թաղամասում 57-ամյա կնոջը ծեծելով մահվան հասցնելու մեջ մեղադրվում է 102-րդ ռուսական ռազմաբազայի զինծառայող Անդրեյ Ռազգելդեևը։ Նրա նկատմամբ Շիրակի մարզի ընդհանուր իրավասության դատարանը խափանման միջոց է ընտրել կալանավորումը։ Հիմա, երբ գործն արդեն դատաքննության փուլ է հասել, Ռազգելդեևի փաստաբանը խափանման միջոցը փոխելու վերաքննիչ բողոք է ներկայացրել:

Ռուս զինծառայողն անցած տարվա դեկտեմբերից կալանքի տակ է։ Նրա նկատմամբ խափանման միջոցն ընտրել է Շիրակի մարզի ընդհանուր իրավասության դատարանը, բայց Ռազգելդեևը կալանքը կրում է ռուսական ռազմաբազայի կարգապահական մեկուսարանում։

Գործի նախաքննության ընթացքում տուժող և մեղադրվող կողմերը հակադիր միջնորդություններ էին ներկայացրել։ Տուժող կողմը պնդել է, որ ռուս զինծառայողը պետք է կալանքը կրի քրեակատարողական հիմնարկում, իսկ նրա պաշտպանը միջնորդություն է ներկայացրել ռազմաբազայի տարածքում կալանքը, որպես խափանման միջոց, փոխելու մասին։ Ռազգելդեևի փաստաբանի՝ Շիրակի մարզի ընդհանուր իրավասության դատարանի ընտրած խափանման միջոցը փոխելու բողոքը վերաքննիչ դատարանի վարույթ է ընդունվել հոկտեմբերի 4-ին։ Դեռ հայտնի չէ դատավարության օրը, բայց տուժողի իրավահաջորդի ներկայացուցիչները պատրաստվում են իրենց դիրքորոշումը հայտնել, որը նույնաբովանդակ է, ինչ նախաքննության փուլում ներկայացրած միջնորդությունները։

«Մենք ստացել ենք Ռազգելդեևի փաստաբանի բողոքարկման մասին տեղեկությունը: Փաստաբանը դիմել էր Շիրակի մարզի առաջին ատյանի դատարան, որ Ռազզգելդեևի նկատմամբ կալանքը փոխվի: Դատարանը մերժել էր, և հիմա փաստաբանը վերաքննիչ բողոք է ներկայացրել: Մենք ներկայացնելու ենք մեր դիրքորոշումը: Մենք դիտարկում էինք և բողոք էինք ներկայացրել, որ Ռազգելդեևի նկատմամբ խափանման միջոց կալանքը պետք է իրականացվի ոչ թե ռազմաբազայի տարածքում, այլ ՀՀ քրեակատարողական հիմնարկում, որովհետև ՀՀ դատարանի կողմից խափանման միջոց կալանքի ապահովման վայրը հանդիսանում է ՀՀ քրեակատարողական հիմնարկը: Մեր միջնորդությունները մերժվեցին, ու այդ մերժումները դատարանի կողմից մենք դիտարկում ենք որպես արդար դատաքննության ապահովման մտահոգիչ գործոն: Գործով վկաների, նաև այլ մարդկանց հետ, ովքեր հետաքրքրվածություն ունեն այս գործով, անմիջական շփումներ կարող են ունենալ, որի վերաբերյալ կասկածները փարատելու որևէ հիմք չունենք»,-Shantnews-ին ասել է տուժողի իրավահաջորդի ներկայացուցիչ Արթուր Սաքունցը:

Ռազգելդեևը ռազմաբազայի տարածքում է ․․․սա, ըստ տուժողի ներկայացուցիչ Արթուր Սաքունցի, միակ տեղեկատվությունն է մեղադրյալի մասին։ Իսկ թե ի՞նչ պայմաններում է նա պահվում, և արդյո՞ք պայմաններն այնպիսին են, որ չեն խոչընդոտել նախաքննությանը, այս մասին  ոչինչ հայտնի չէ։

Ռազգելդեևը կալանքի տակ կմնա ռազմաբազայում, բայց դատական նիստերին բերվելու է Շիրակի մարզի առաջին ատյանի դատարան։ Այս հարցը, ըստ էության, չի քննարկվել։ Ջուլիետա Ղուկասյանի մահվան գործով դատական առաջին նիստը նշանակված էր սեպտեմբերի 6-ին։ Այդ օրը փաստաբանները, տուժողները և ամբաստանյալը դատարան չեն եկել։ Պատճառը մեղադրողի՝ Շիրակի մարզի դատախազի արձակուրդում գտնվելն էր։ Երբ կկայանա հաջորդ դատական նիստը, կողմերը ծանուցագրեր դեռ չեն ստացել։