Շիրակի մարզում զբաղվածության պետական ծրագրերի մեծ մասը երիտասարդների համար է

Գյումրիում գրանցված 13.000 աշխատանք փնտրողների մեծ մասը երիտասարդներ են, որոնք աշխատանք գտնելու հարցում լուրջ խնդիրների են բախվում: Նախ` գործատուի պահանջած փորձը չունեն, հետո` ուսումնական գործընթացը խանգարում է լրիվ գրաֆիկով աշխատել:

«Կազա» հիմնադրամում կազմակերպված հանդիպմանը Գյումրու զբաղվածության տարածքային կենտրոնի տնօրենն ուսանողներին ծանոթացրել է այն պետական ծրագրերին, որոնք աշխատանք փնտրողներին զբաղվածության հնարավորություններ են ստեղծում: Պետական 13 ծրագիր է շրջանառության մեջ, որոնց մեծ մասը երիտասարդների համար է:

Երիտասարդներն ինչպես կարող են իրենց տեղը գտնել աշխատաշուկայում և ապահովել նրանց զբաղվածությունը: Այդ ուղղությամբ ունեցած պետական ծրագրերը նախ մասնագիտական ուսուցում են նախատեսում, հետո նոր գործատուի հետ անմիջական աշխատանք: Գյումրու զբաղվածության տարածքային կենտրոնի տնօրեն Ամալյա Ադամյանը հանդիպմանը ներկա ուսանողներին վստահեցնում է, որ ծանոթով ու բարեկամով աշխատանքի տեղավորելու ժամանակներն անցել են, թեև այդպիսիք չի բացառում, որ դեռ կան։

Երիտասարդությանն ուղղված արդյունավետ ծրագիր կենտրոնի տնօրենը համարում է մասնագիտական պրակտիկ ուսուցումը, որը հնարավորություն է տալիս աշխատանքային փորձ չունեցող երիտասարդին 3 ամսով աշխատանքի անցնել գործատուի մոտ: Աշխատավարձը վճարում է ոչ թե գործատուն, այլ պետությունը:

Ուսանողներին սա օգնող տարբերակ է, իրենք են խոստովանում, որ ավարտելուց հետո էլ չեն համարվում աշխատաշուկայում պահանջված մասնագետներ: Զբաղվածության աջակցության ծրագրերը շատ են, հատկացվող գումարներն էլ եռապատկվել են: Բայց դրանք դեռևս աշխատանքի տեղավորման ցանկալի ցուցանիշ չեն ապահովում:

Թափուր աշխատատեղերը չեն լրացվում մասնագետներ չլինելու պատճառով: Իսկ որոշ ոլորտներում էլ մասնագետները կան, բայց տվյալ մասնագիտությամբ աշխատանքի առաջարկ չկա: Արթուր Կիրակոսյանը մասնագիտությամբ արևելագետ-թուրքագետ է: Աշխատել է Լենինականի սահմանապահ ջոկատում՝ որպես թարգմանիչ, հետո դասավանդել բուհում: Իսկ հիմա գործազուրկ է:

2․5 տարի է` հաշվառված է Գյումրու զբաղվածության կենտրոնում: Այստեղ առաջարկված աշխատանքները, իր խոսքերով, անհամատեղելի են մասնագիտության հետ: Հիմա իր լեզվական գիտելիքները պատրաստվում է ծառայեցնել մեկ այլ հեռանկարային ոլորտում, մասնակցելու է զբոսավարի դասընթացներին։ Գյումրիում հիմա այս մասնագիտությունն ամենապահանջվածն է։

Գյումրու զբաղվածության տարածքային կենտրոնում հաշվառված 13.000 աշխատանք փնտրողներից այս տարի զբաղվածության կենտրոնը 991 գործազուրկի է աշխատանքի տեղավորել: Խնդիրը ոչ միայն թափուր աշխատատեղերի պակասն է, այլև աշխատանք փնտրողների պասիվությունը: Երիտասարդներին աշխատանքի ընդունվել խոչընդոտում է փորձի պակասը, իսկ փորձառու գործազուրկների առջև դրվում է տարիքային սահմանափակումը: Զբաղվածության կենտրոնի ղեկավարը երիտասարդներին հորդորեց նախաձեռնող և ակտիվ լինել: Պետությունը պատրաստ է լավ բիզնես գաղափար ունեցող սկսնակ ու անփորձ երիտասարդներին ֆինանսավորել, որ կայանան իրենց ոլորտներում: