Գյումրու փողոցաշինական ծրագրում ներգրավված շինընկերությունները ֆինանսավորում չեն ստացել

Գյումրու փողոցաշինական մեծ ծրագրում ներգրավված շինընկերությունները ամառվանից ֆինանսավորում չեն ստացել։ Նախ ժամկետների ձգձգումների, ապա՝ թերությունների պատճառով կատարողական ակտերը չեն ստորագրվել։ Այս մասին այսօր քաղաքապետարանում հրավիրված խորհրդակցությանը խոսել են շինընկերությունների ղեկավարները։ Ֆինանսական տարին դեկտեմբերի 10-ին ավարտվում է, իսկ կատարողականները դեռ քաղաքապետարան չեն հասել։ Քաղաքապետը նշել է, որ ֆինանսական խնդիրները կարգավորելու է Վերակառուցման և զարգացման եվրոպական բանկը՝ տեխնիկական հսկողների դրական եզրակացությունը ստանալուց հետո, իսկ տեխհսկիչները նորից թերություններ են հայտնաբերել փողոցաշինական ծրագրում։

Յուրաքանչյուր շինընկերության կատարածը առանձին տեխհսկիչ է ստուգում: Փողոցաշինության առաջին փուլն արդեն ավարտվում է, բայց տեխհսկիչները դեռ թերություններ են հայտնաբերում: Դրանք վերաբերում են մասնավորապես հենասյուների տեղադրմանը, գծանշումներին ու կրկնակի կատարված ասֆալտապատմանը:

Տեխհսկիչները հաշվարկել են, որ արդեն 500 քառակուսի  տարածք է կրկնակի ասֆալտապատվել: Կրկնակի աշխատանքներն արդեն շինընկերության հաշվին են, ինչի հնարավորություն այլևս չունեն: Շինընկերությունների ղեկավարները նշում են, որ հայտնվել են ֆինանսական ծանր վիճակում: Ամառվանից ֆինանսավորում չեն ստացել, գործն արել են, կատարողական չի ստորագրվել:

«Հունիս ամսից մինչև այսօր կատարողական չի ստորագրվել մեր մոտ: Մինչև հիմա փաստորեն ամբողջ ծրագիրը արել ենք, ծրագրի ընդհանուր գումարի 30 %-ից պակաս ենք ստացել: Ֆինանսական տարին դեկտեմբերի 10-ին փակվում է, ունենք ընդամնեը 15 օր ժամանակ: Պետք է ստորագրվի քաղաքապետարանի հսկիչների, մյուսների կողմից, որ կարողանանք աշխատողներին վճարել իրենց կատարած աշխատանքի դիմաց »,- ասել է «ԱԱԲ Պրոյեկտ» շինընկերության ղեկավար Արմեն Բադալյանը:

Գյումրու քաղաքապետը նշել է, որ ֆինանսական խնդիրները կարգավորելու է Վերակառուցման և զարգացման բանկը՝ տեխնիկական հսկողների դրական եզրակացությունը ստանալուց հետո, իսկ տեխհսկիչները նորից թերություններ են հայտնաբերել փողոցաշինական ծրագրում։ Մասնավորապես՝ խոսքը մայթերի ասֆալտապատմանը, հենասյուների տեղադրմանն ու լուսավորությանն են վերաբերում։

Ֆինանսավորում չեն ստանում ոչ միայն ՎԶԵԲ-ի, այլև Համաշխարհային բանկի ֆինանսավորմամբ կատարվող փողոցաշինության մեջ ներգրավված շինարարական ընկերությունները: «Կումայրի» պատմական կենտրոնի փողոցներ են այս ծրագրով հիմնանորոգվում: Այստեղ խնդիրը լուսավորության համակարգն է: Բարեկարգ փողոցների լուսակիրների մի մասը չի աշխատում:

Էներգամատակարարը մալուխներն անցկացրել է, շինարարը՝ վնասել․ այսպիսին է տեխնիկական հսկիչների եզրակացությունը: Այս փողոցներում կատարողականները ստորագրվելու են միայն լուսակիրները կարգի բերելուց հետո, իսկ  շինարարներն ու պատվիրատուն պայմանավորվեցին, որ այն թերությունները, որոնք վերաբերում են ասֆալտապատմանը, շտկվելու են գարնանը: Այս ընթացքում պահանջեցին հստակեցնել ֆինանսավորման հարցերը: