Գյումրիի պետական միակ գիշերօթիկ հաստատությունում դեռ խնամվում է 68 երեխա

Գյումրիի գիշերօթիկ 2 հաստատություններից մեկն արդեն փակվել է, մյուսն էլ աշխատանքը կշարունակի մինչև 2020 թվականի հուլիս ամիսը: Թիվ 1 գիշերօթիկ հաստատության լուծարումից հետո 60 երեխա ընտանիք է վերադարձել, ևս 68 երեխա դեռ մնում է Նանսենի անվան թիվ 2 գիշերօթիկում:

Հաստատությունների բեռնաթափման գործընթացին զուգահեռ, անորոշ է Գյումրիում երեխաների գիշերային խնամք իրականացնող ևս մեկ կառույցի՝ «Թռչունյան տան» հետագա գործունեության հարցը:

Նշենք, որ այն պետական կառույց չի համարվում, մինչև հիմա գործում է բարեգործական հիմունքներով, իսկ նույնանուն հիմնադրամի նվիրատուները ֆինանսավորումը 7 ամիս է, ինչ դադարեցրել են: Նանսենի անվան թիվ 2 գիշերօթիկում այժմ խնամվում են 2 հաստատության երեխաները: Թիվ մեկ գիշերօթիկից տուն վերադարձի հնարավորություն չունեցող երեխաները տեղափոխվել են այստեղ:

Այս պահին 68 երեխա դեռ չի կարող ընտանիք վերադառնալ, բայց ծնողները գալիս են տեսակցության, շաբաթ-կիրակի օրերին էլ տուն տանում:

Երեխաների խնամքի և պաշտպանության թիվ 2 գիշերօթիկ հաստատության տնօրեն Անահիտ Կարապետյանը ցույց է տալիս տեսակցությունների մատյանը, որտեղ գրանցվում են ծնողների ու հարազատների այցերը։ Ասում է` հաճախակի են այցելում ծնողները, ոմանք շաբաթը մի քանի անգամ։ Ծնողների հետ կապը պահպանվում է, բայց դեռ պատրաստ չեն երեխաներին ընտանիքներ վերադարձնել` կա´մ տարրական կենսապայմաններ չկան, կա´մ ի վիճակի չեն երեխաների խնամքն ապահովել:

Երեխայի տուն վերադարձի պահանջի դիմաց ոչ միայն պետական կառույցները, նաև շահագրգիռ կազմակերպություններն են պարտավորվում ընտանիքում եղած այն խնդիրները լուծել, որոնք խիստ անհրաժեշտ են խնամքի համար:

Շիրակի մարզպետարանի կանանց և երեխաների պաշտպանության բաժնի պետ Լիլիթ Գորգինյանի խոսքերով` եթե ընտանիքում չկա մահճակալ, պայմանագիր է կնքվում ծնողի հետ, որտեղ հստակ նշվում է, որ պետությունը կամ ինչ-որ կազմակերպություն պարտավորվում է տրամադրել այդ գույքը՝ երեխան ընտանիքում մնալու պարագայում։

Ընտանիքների կարիքներից է նաև բնակարանի կոսմետիկ վերանորոգումը, գործազուրկ ծնողներին զբաղվածության կենտրոն ուղղորդումը, վառելափայտի օգնությունը, ջրատաքացուցիչների տրամադրումը և այլն: Նման լուծումներ առաջարկվել են ընտանիքներին երեխաներին տուն վերադարձի դեպքում, բայց կան ընտանիքներ, որոնք չունեն բնակարաններ, այս դեպքում արդեն վարձակալած տանը ինչ-որ ծախսեր կատարելը դառնում է անիմաստ։

Առնվազն 15 ընտանիքի հետ աշխատանքը դեռ չի ստացվում, ու խնդիրը միայն ընտանիքների սոցիալական վատ պայմանները չեն: Դրանց կողքին բարդ ու թերևս անլուծելի խնդիրներ էլ կան, օրինակ` այն ընտանիքները, որտեղ բռնություն կա երեխաների նկատմամբ, իսկ սեփական երեխային իր կողքին պահելու ցանկությունն էլ բացակայում է:

Անահիտ Կարապետյանի խոսքերով` կան ծնողներ, որոնց շատ հարմար է, որ պետությունը վերցրել, ստանձնել է երեխաների խնամքը ու շարունակում է։ Բայց նա վստահ ասում է, որ ծնողն ունի պարտականություն ու դա պետք է դրանք կատարի։ Գիշերօթիկ երկու հաստատությունն էլ նոր երեխաներ ընդունելու իրավունք չի ունեցել, իսկ դիմողներին տեղավորել են ցերեկային կենտրոններում: Տասից ավելի երեխաների խնամքը ստանձնել այս ուսումնական տարում մերժել է նաև «Թռչունյան տուն»-ը: Ունեցած 82 երեխաներին պահելն արդեն մեծ խնդիր է հունիս ամսից:

Նվիրատուները Ֆինանսավորումը դադարեցրել են արդեն 7 ամիս:

«Թռչունյան տուն» խնամքի հաստատության կրթարանի տնօրեն Սոնա Սիմոնյանի խոսքերով` հուսահատեցնում է այն, որ նույնիսկ բացասական պատասխանն է պատասխան, որն իրենց չի տրվում, ու ներքուստ մտածում են, որ եթե չեն մեժել, նշանակում է` այո են ասելու, ու դրա համար էլ բոլորն աշխատում են արդեն 5 ամիս` առանց աշխատավարձի։

Անորոշության պատճառով պարտքերն են ավելացել, որից տուժում է 82 երեխաների խնամքը: Աշխատանքի և սոցիալական հարցերի նախարարությունն այստեղ էլ կարիքների գնահատում է կատարել: Հաստատության տնօրինությունը դեռ սպասում է ֆինանսավորման, հակառակ դեպքում, գիշերօթիկների պես, երեխաների խնամքը կստանձնի պետությունը: Որոշ երեխաներ կան, որ կարող են ընտանիք վերադառնալ, ոմանք՝ ոչ, քանի որ, ըստ տնօրենի, ծնողներ չունեն։ Այստեղ ընդունելության չափորոշիչները տարբերվում են պետական հաստատություններից, ինչն էլ թերևս սոցիալական հարցերի նախարարության ուշադրությանն է արժանացել:

Շիրակի մարզպետարանի պատասխանատուի խոսքերով` հայտնի չէ, թե ինչ չափորոշիչներով են երեխաներին ընդունում «Թռչունյան տանը»: Փաստ է այն, որ «Թռչունյան տանը» նաև այն երեխաներն են, որոնց պետական գիշերօթիկ հաստատությունները մերժել են ընդունել նպաստառու չլինելու պատճառով, այսինքն` ոչ պետական հաստատությունը նման սահմանափակումներ չունի:

«Թռչունյան տնից» ավելի քան 30 երեխա տուն վերադառնալու հնարավորություն չունի: Տնօրենն ասում է՝ նույնիսկ տոնական օրերին գնալու տեղ չունեն` Ամանորն ամեն տարի աշխատողներից մեկի տանն են դիմավորում: