Զուրաբիշվիլին ինքը խնդիր է Վրաստանի համար. Վրաստանի նախագահի հայտարարությանը արձագանքում են քաղաքական գործիչները

Վրաստանի հանրային հեռուստատեսության «Ազատ հայացք» հաղորդաշարի եթերում նախագահ Սալոմե Զուրաբիշվիլին դեկտեմբերի 24-ին խոսել է երկրի սահմանային խնդիրների մասին՝ պատասխանելով Դավիթ Գարեջիի վանական համալիրի շուրջ Ադրբեջանի հետ առաջացած անհամաձայնության հարցին: Վրաստանի նախագահը նախ «բարի ընկեր» է անվանել Ադրբեջանը՝ շեշտելով, որ անլուծելի հարցեր չեն կարող լինել, ապա ավելացրել է, որ վրացական կողմը պետք է վերջապես կայանա որպես պետություն և հստակեցնի իր սահմանները ոչ միայն Ադրբեջանի, այլև Հայաստանի և մյուս հարևանների հետ:

«Մենք պետք է կայանանք որպես պետություն, և դա պահանջում է, որ մեր սահմանները լինեն պարզված, որից հետո պաշտպանված: Մենք խնդրահարույց սահմաններ ունենք ոչ միայն հակամարտության գոտիների՝ Աբխազիայի և Օսիայի, այլև Ադրբեջանի և Հայաստանի հետ: Նախկինում այդ երկրների հետ սահմանազատման և սահմանագծման հանձնաժողովներ էին գործում: Հետագայում, սակայն, դրանք ինչ-ինչ պատճառներով դադարեցրել են աշխատանքը»,- ասել է Վրաստանի նախագահը:

Զուրաբիշվիլիի այս հայտարարությունը աղմուկ է բարձրացրել Վրաստանում: Նախ՝ Զուրաբիշվիլիին մեղադրում են հարևան երկրների հետ հակամարտություններ հրահրելու փորձի, ապա Աբխազիայի և Օսիայի անկախությունը պաշտոնապես ճանաչելու մեջ։

«Եվրոպական Վրաստան» ընդդիմադիր կուսակցության ղեկավար Դավիթ Բաքրաձեն հայտարարել է. «Վրաստանը ոչ Աբխազիայի, և ոչ էլ Օսիայի հետ սահմաններ չունի: Գուցե տիկին նախագահը տեղյակ չէ, որ Աբխազիան և Ցխինվալիի տարածաշրջանը Վրաստանի անբաժանելի մասն են, իսկ Հայաստանն ու Ադրբեջանը մեր հարևաններն են: Ինչպե՞ս կարելի է հայտարարել սեփական տարածք համարվող շրջանների հետ պետական սահման ունենալու մասին»:

Զուրաբիշվիլիին կոշտ քննադատության են ենթարկել նաև «Միասնական ազգային շարժում» կուսակցության ղեկավարներ Միխեիլ Սաակաշվիլին և Գրիգոլ Վաշաձեն: Սաակաշվիլին նախագահին անվանել է քաղաքական գործիչ, որն աշխատում է Վրաստանի ազգային, պետական շահերի դեմ: Նույնը SHANTNEWS.am-ի հետ զրույցում ասաց նաև վրացի քաղաքագետ Գելա Վաշաձեն:

«Զուրաբիշվիլին ինքը խնդիր է Վրաստանի համար: Բացի Ռուսաստանից, Վրաստանը չունի խնդիրներ մյուս հարևանների հետ: Նախագահն այդ հայտարարությունն արել է, որ սկանդալ առաջացնի: Թե ինչ է նա նկատի ունեցել, այլ հարց է, բայց նա ասել է մի բան, որը վնասում է Վրաստանի շահերին: Բոլորն էլ գիտեն, որ Վրաստանը Հայաստանի և Ադրբեջանի հետ ունի սահմանների հստակեցման հարցեր, բայց դրանք լուծելի են և չի կարելի այդ հարցերը դնել տարածքների բռնազավթման հետ նույն հարթության վրա: Վստահ եմ, որ Զուրաբիշվիլիի այդ խոսքերը բացասական ազդեցություն չեն թողնի մեր հարաբերությունների վրա, քանի որ Հայաստանի և Ադրբեջանի ղեկավարները հասցրել են շփվել Վրաստանի նախագահի հետ և նրա մասին պատկերացում կազմել»,- ասաց վրացի քաղաքագետը:

Սալոմե Զուրաբիշվիլիի խոսքը որևէ արձագանք չի գտել Ադրբեջանում, մինչդեռ նրա հայտարարության առիթը Ադրբեջանի և Վրաստանի սահմանին Դավիթ Գարեջիի վրացական վանական համալիրի շուրջ հակամարտությունն է եղել: Ադրբեջանը ինքնակամ զավթել է համալիրը՝ քրիստոնեական կառույցն անվանելով իր պատմական ժառանգության մաս: Ինչ վերաբերում է Հայաստանին, ապա երկու երկրների սահմանները հստակեցված են, քննարկվում են որոշ հատվածներում մի քանի մետրեր այս կամ այն կողմ գծելու հարցեր: