«Լեւոնի աճիւններուն փոխարէն կնոջ եւ շան աճիւններ».ԱՍԱԼԱ-ի մարտիկին հարազատները վրդոված են

«ԱՍԱԼԱ»-ի (Հայաստանի Ազատագրութեան Հայ Գաղտնի Բանակ) «Խրիմյան Հայրիկ» գործողության մարտիկ Լևոն Էքմէքճեանի աճիւններու հարցը մեծ վրդովմունք յառաջացուցած է Լեւոնի հարազատներուն եւ ընկերներուն համար: Այս մասին յայտնած է Լեւոնի հարազատ եղբայրը` Դրօ Էքմէքճեան, որ այս մասին հանդէս եկած է մամլոյ ասուլիով: Ան մասնաւորապէս ըսած է. «Եղած ոսկորները կնոջ եւ շան ոսկորներ դուրս եկան: Իմ կասկածս ան է, որ Թուրքիոյ մէջ գիտեն, թէ ուր թաղուած է իմ եղբայրս»,- նշելով, որ իրենց համար եղածը վիրաւորական արարք է: Ան նաեւ նշած է, որ Լեւոնի հարազատները որոշած էին այդ աճիւնները Երեւան փոխադրել եւ նահատակի վերաթաղումը կազմակերպել Եռաբլուրի զինուորական պանթէոնին մէջ: Դրօ Էքմէքճեան նաեւ նշած է, որ Թուրքիոյ «Մարդկային Իրաւանց մարմին»ը որ զբաղուած է այս խնդրով, տակաւին չէ տեղեկացած DNA-ի արդիւնքներէն: «Մենք պիտի կապուինք Պոլսոյ մէջ գործող Մարդկային Իրաւանց Մարմին»ի պատասխանատուներէն փաստաբան` Էրէն Քէսքինին հետ եւ զինք տեղեակ պահենք եղածէն»,- ըսած է Էքմէքճեան նշելով , որ եղածն ընդունելի չէ: « Իմ կարծիքս ան է, որ Թուրքիոյ մէջ վստահ գիտեն, թէ ուր թաղուած է եղբայրս: Ինչպէ՞ս կ’ըլլայ, որ ուրիշի մը աճիւնները տան Լեւոնի աճիւններուն փոխարէն: Պատերացուցէք, որ այդ աճիւններու տէրը թուրք ջարդարարի մը զաւակը ըլլայ ու մենք պիտի երթայինք եւ ծաղիկ դնէինք անոր շիրիմին»: Էքմէքճեան նաեւ ըսաւ, որ այս տիպի գործ մը պէտք է Եւրոպական Մարդկային Իրաւանց Դատարան ներկայացուի սակայն իրենք, որպէս Լեւոն Էքմէքճեանի հարազատներ նիւթական բաւարար միջոցներ չունին այդ գործը գլուխ հանելու համար: Յիշեցնենք, որ 1983 թուականին «ԱՍԱԼԱ»ի մարտիկներ Լեւոն Էքմէքճեան եւ Զօհրապ Սարգիսեան զինեալ յարձակում գործած էին Անգարայի Էսէնպողա օդակայանին մէջ գտնուող թուրք զինուորներու կեդրոնի մը վրայ եւ կրակ բանալով սպաննած 9 ու վիրաւորած 82 անձեր: Դէպքին վայրը սպաննուած էր «ԱՍԱԼԱ»ի մարտիկ Զօհրապ Սարգիսեանը, մինչ Էքմէքճեան ծանրօրէն վիրաւորուելէ ետք կալանաւորուած էր: Պէյրութ ծնած Էքմէքճեան վեցամսեայ տանջանքներ կրելէ ետք մահապատիժի կ’ենթարկուի: Էքմէքճեան կը հանդիսանայ արդի Թուրքիոյ պատմութեան մէջ այն վերջին բանտարկեալը, որ մահապատիժի կ’ենթարկուի: Թուրքիոյ իշխանութիւնները հայ մարտիկին մահապատիժի ենթարկած են 35 տարի առաջ ՝ 23 Յունուար 1983-ին: