Զարգացումներ «Նորֆոլկ Քոնսալթինգ»-ի գործով. կալանավորվել է ընկերության գլխավոր հաշվապահը

«Նորֆոլկ Քոնսալթինգ»  ընկերության գործով 2 ամիս ժամկետով կալանավորվել է ընկերության գլխավոր հաշվապահ՝ 32-ամյա Տիգրան Զոհրաբյանը: Որոշումը կայացրել է  Երևան քաղաքի ընդհանուր իրավասության դատարանի Շենգավիթի նստավայրի  դատավոր Դավիթ Բալայանը:

Հիշեցնենք՝ Ազգային անվտանգության ծառայության աշխատակիցները ներկրվող ապրանքների մաքսազերծման ծառայություններ մատուցող և մենաշնորհային դիրք զբաղեցնող «Նորֆոլկ Քոնսալթինգ» ընկերության հետ կապված բացահայտումներ էին արել՝ ասելով, որ դա «կոռուպցիայի դեմ պայքարի շրջանակներում է»: ԱԱԾ-ն առգրավել էր ընկերության համակարգիչներն ու  փաստաթղթերը:

«Տիգրան Զոհրաբյանին կալանավորելու որոշումը, մեր կարծիքով, հիմնավոր չէ: Հիմնավոր կասկածի առկայությունը  չապացուցվեց դատարանում ներկայացված նյութերի հիման վրա: Մենք փորձելու ենք բողոքարկել այդ որոշումը»,- ասաց Զոհրաբյանի շահերի պաշտպան Արմեն Անդրիկյանը՝ SHANTNEWS.AM -ի հարցմանն ի պատասխան:

«Հանցագործությունը, որում մեղադրվում է իմ պաշտպանյալը, նախատեսում է ՀՀ Քրեական օրենսգրքի 205-րդ հոդվածի 2 մասը  օժանդակություն հարկերից, տուրքերից  պարտադիր այլ վճարներից  խուսափելուն, որը դրսևորվում է համապատասխան հաշվետվություններում, տեղեկանքներում թերի, սխալ տեղեկությունների ներառմամբ:

Վարույթն իրականացնող մարմինը դատարանին չներկայացրեց որևէ տեղեկանք, որտեղ կասվեր, որ կասկած կա, որ այս փաստաթղթերում ընկերության արած հաշվարկները սխալ են, այսինքն՝ առանց որևէ փաստաթղթերի ուսումնասիրության, փորձաքննության հիման վրա, որ ընկերությունը խուսափել է հարկերից տուրքերեց ու  այլ պատրադիր վճարներից, դրան օժանդակելու համար իմ պաշտպանյալին կալանավորեցին: Հիմնավոր կասկածի առկայությունը դատարանի կողմից չհիմնավորվեց:

Կալանավոման հիմք ներկայացվել է, որ իմ պաշտպանյալը, մնալով ազատության մեջ, կխոչընդոտի  դատաքննությանը, հնարավոր է՝ փաստաթղթեր թաքցնի:Մեր կարծիքով՝ դա անհիմն է, քանի որ, ինչպես տեսել եք  ԱԱԾ-ի  կողմից կատարված համապատասխան տեսագրության մեջ, ընկերությունում կատարվում է  խուզարկություն, որի ժամանակ բոլոր փաստաթղթերն առգրավել են ԱԱԾ քննչական վարչության կողմից, այսինքն՝  դրանք գտնվում են վարույթն իրականացնող մարմնի տրամադրության տակ:

Այս պայմաններում անտրամաբանական է՝ ինչպես կարող է իմ պաշտպանյալն այդ փաստաթղթերի հետագա ուսումնասիրության վրա ինչ-որ կերպ ազդել»,- ասել է Տիգրան Զոհրաբյանի շահերի պաշտպան Արմեն Անդրիկյանը: