Գյումրիի տուն-ինտերնատում անորոշություն է. Կարմիր խաչը դեռ չի ստանձնել տարեցների խնամքը

Կառավարության դեկտեմբերի 12-ի որոշմամբ` Գյումրիի տարեցների տուն-ինտերնատը լուծարվեց, իսկ ծառայությունների մատուցումը պատվիրվեց հասարակական կազմակերպության, տվյալ դեպքում՝ հայկական Կարմիր խաչին: Ընկերության հետ կառավարությունը կնքել է պարտավորությունների ստանձնման հուշագիր, սակայն տարեսկզբից նախատեսված ընթացակարգով կազմակերպությունը տուն-ինտերնատի տարեցների խնամքը դեռ չի ստանձնել:

Հիշեցնենք, որ Գյումրիի տարեցների տուն-ինտերնատի լուծարման մասին առաջին ծանուցումները աշխատակազմն ու տնօրինությունը ստացել էին 2019թ. հոկտեմբերի 16-ին:

2020թ. հունվարից նախատեսված կադրային ու կառուցվածքային փոփոխություններին տուն-ինտերնատում դեռ չեն անցել: Աշխատակազմը նույնն է, մատուցվող ծառայություններն էլ՝ անփոփոխ: 160 խնամվողների կարիքները հոգալու պարտավորությունը ստանձնել է Կարմիր խաչը, բայց լիազորությունների կատարմանը դեռ չի անցել:

«Որպեսզի խնամքի պրոցեսը մեկ ժամ անգամ չխաթարվի, երկարաձգվել են պայմանագրերը սնունդ մատակարարող կազմակերպությունների հետ, մեր ներքին պահեստային ռեզերվի հաշվին ապահովում ենք կենցաղային մաքրիչ նյութերի կարիքները, մնացած պրոցեսները կախված են նախարարությունից: Ե´վ ֆինանսավորման ձևը, և´ կարգավիճակը, և´ իրավական չափորոշիչները տալու են նրանք»,- նշում է Գյումրիի տուն-ինտերնատի տնօրենի պաշտոնակատար Արմեն Սարուխանյանը:

Հաստատության տնօրենի մեկ տարվա պաշտոնակատարի համար էլ հստակ չէ, թե ինչ կարգավիճակով ու ինչքան են պարտավորությունները ժամանակավոր կատարելու: Աշխատանքային պայմանագրերի վերակնքումներ չեն եղել, բայց նախապես ստացած ծանուցագրերում դեկտեմբերի 30-ի վերջնաժամկետը փոխվել է, ստորագրել են նոր ծանուցումներ:

«Ծանուցագիրն արդեն ստորագրել ենք, գիտենք, որ մենք մարտի 1-ից կրճատված ենք: Մեր վիճակը անորոշ է»,- ասում է տուն-ինտերնատի աշխատակից Խանում Մանուկյանը։

«Չգիտենք՝ ինչ չափորոշիչներով է առաջնորդվելու պարտականությունները ստանձնող կազմակերպությունը, չգիտենք՝ ինչ աշխատակազմ է պահելու ու ինչ հաստիքացուցակ, ընդհանրապես հստակեցում չկա, թե որ պահից ովքեր են գործազուրկ լինելու»,- նշում է հաստատության իրավախորհրդատու Գևորգ Սուլուկյանը։

71 աշխատակիցների մտահոգությունը աշխատանք կորցնելն է: Նոր գործատուն, տվյալ դեպքում՝ Կարմիր խաչը, թե ինչ պահանջներ կներկայացնի, առայժմ այդ մասին ոչինչ չի ասվում: Կողմ են, որ ծառայությունների որակն ու տարեցների խնամքի  պայմանները բարելավվեն, բայց առաջարկում են, որ այդ ամենն իրականացվի իրենց աշխատանքային փորձն օգտագործելով: Պատրաստ են աշխատել նոր կազմակերպության հետ, եթե երկու կողմի պայմանները ընդունելի լինեն:

Կառավարության և Կարմիր Խաչի միջև ստորագրված հուշագրով տուն-ինտերնատի աշխատակիցների հետ պայմանագրերի վերակնքելը առնվազն 70 տոկոսի հետ պարտադիր է: Հայկական Կարմիր խաչ ընկերության գլխավոր քարտուղար Աննա Եղիազարյանը մեզ հետ ունեցած հեռախոսազրույցի ընթացքում նշեց, որ իրենց համար առաջնայինը կլինի որակյալ աշխատանքը:

«Ճիշտն ասած՝ որոշակի փորձաշրջան, իհարկե, հնարավոր է լինի, և եթե մենք կկարողանանք էդ փորձաշրջանի ընթացքում նորմալ որակ ապահովենք, բոլորովին նպատակ չկա որևիցե մեկից ազատվելու և նոր մարդկանց բերելու»,- պարզաբանել է Հայկական Կարմիր խաչ ընկերության գլխավոր քարտուղար Աննա Եղիազարյանը:

Ընկերության գլխավոր քարտուղարը, միևնույն ժամանակ, չբացառեց ադմինիստրատիվ կազմի որոշակի կրճատումներ: Այս գործողություններին հասնելու համար երկու ամիս ուսումնասիրություններ են անհրաժեշտ  հաստատությունում ՝ գնահատելու խնդիրներն ու կարիքները:

«Մենք մեր կողմից ներդրումներ ենք ունենալու, որը ուղղվելու է վերանորոգման աշխատանքներին։ Գյումրիի տուն-ինտերնատում նախատեսում ենք բնակելի վեց հատվածներից չորսի վերանորոգում և կահավորում, նաև կունենանք բնաիրային տեսքով ներդրումներ»,- նշել է Աննա Եղիազարյանը։

Նախատեսված աշխատանքների համար Կարմիր խաչը պարտավորվել է կատարել 163 միլիոն դրամի ներդրում: Մինչ լուծարային գործընթացի ավարտը ընկերությունը կլինի աջակցողի դերում, բայց ոչ՝ ծառայություններ մատուցողի:

Հաստատության վերջնական կառուցվածքային պատկերը պարզ կդառնա երկու ամսից: