Կորոնավիրուսի նոր տիպը հիմնականում փոխանցվում է օդակաթիլային ճանապարհով, բայց կարելի է վարակվել նաև կեղտոտ ձեռքերով աչքերին հպվելիս, հայտնել է ՉԺՀ առողջապահության պետական կոմիտեի փորձագիտական խմբի անդամ Լի Սինվանը:
«Բոլորը պետք է դիմակներ կրեն, կրճատեն սերտ շփումները: Ամենավաղ փուլում հիվանդությունն արտահայտվում է այնպիսի ախտանիշներով, ինչպիսին բարձր ջերմությունն է, թուլությունը և չոր հազը: Ծանր հիվանդների դեպքում կարող են առաջանալ շնչառության հետ կապված դժվարություններ, մինչև անգամ շնչառական անբավարարություն, իսկ այլ հիվանդությունների առկայության դեպքում վիճակը կարող է վատթարանալ»,- պարզաբանել է վարակաբանը:
Ըստ Սինվանի՝ վերջերս հաճախակի են դարձել 2019-nCoV-ի մեղմ ձևերը. որոշ հիվանդներ ընդհանրապես չեն հասել թոքաբորբի, եղել է միայն թեթև ջերմություն և հազվադեպ չոր հազ:
«Դեռ կան որոշ հիվանդներ, որոնց մարմնի ջերմաստիճանի բարձրացումը ակնհայտ չէ, նրանք երբեմն ունենում են չոր հազ կամ թուլություն, այդ մարդիկ հայտնաբերվել են, քանի որ ինքնակամ գնացել են ստուգման: Նման հիվանդները, վարակիչ հիվանդությունների օրինաչափությունների տեսանկյունից, որոշ չափով նաև վիրուս փոխանցողներ են, ինչը որոշակի դժվարություններ է ստեղծում համաճարակի կանխարգելման ուղղությամբ աշխատանքներում»,- հավելել է նա:
Սինվանը նշել է, որ նոր վիրուսով վարակված հիվանդի բուժումը տևում է մոտ մեկ շաբաթ, եթե հիվանդության մեղմ տարբերակն է, ծանրի դեպքում՝ երկու շաբաթ կամ ավելի:
Կորոնավիրուսից մահացությունների թիվը, վերջին տվյալների համաձայն, հասել է 106-ի, հիվանդացել է ավելի քան 4,5 հազարը: Բացի Չինաստանից, վարակի դեպքեր են գրանցվել Հարավային Կորեայում, Ճապոնիայում, ԱՄՆ-ում, Թաիլանդում, Կանադայում, Վիետնամում, Սինգապուրում, Նեպալում, Ֆրանսիայում, Ավստրալիայում, Մալայզիայում, Կամբոջայում և Գերմանիայում:
Չինական իշխանություններն արգելել են վայրի կենդանիների վաճառքն ու տեղափոխումը, քանի որ հենց կենդանիները կարող էին նոր հիվանդության առաջնային աղբյուր հանդիսանալ, շատ քաղաքներ մեկուսացվում են:
