Քնեսեթում Հայոց ցեղասպանության բանաձևը կքննարկվի հունիսի առաջին կեսին. պատրիարքարանի դիվանապետ

Երուսաղեմի հայոց պատրիարք, արքեպիսկոպոս Նուրհան Մանուկյանը նամակ է ուղարկել Իսրայելի օրենսդրիր մարմնի՝ Քնեսեթի խոսնակ Յուլի  Էդելշթեյնին։

Երուսաղեմից տեղեկանում ենք, որ հայոց պատրիարքը նամակում իր հիասթափությունն է հայտնել Քնեսեթի օրակարգից Հայոց ցեղասպանության ճանաչման մասին հարցը հանելու առթիվ:

Մինչդեռ, ինչպես հայտնի է, խոսնակը նախապես պատրիարքին տեղեկացրել էր այդ հարցը Քնեսեթում քվեարկության դնելու մտադրության մասին:

Shantnews.am-ը կապ հաստատեց Երուսաղեմի  հայոց պատրիարքարանի դիվանապետ Կորյուն վարդապետ Բաղդասարյանի հետ՝ տեղեկանալու պատրիարքի նամակի, ինչպես նաեւ հարցին առնչվող այլ մանրամասների մասին: Կորյուն վարդապետ Բաղդասարյանը հայտնեց, որ Քնեսեթի լիագումար նիստի օրակարգից հայոց ցեղասպանության առաջարկ-օրինագիծը ետ կանչելու մասին իրենք տեղեկացել են տեղական մամուլից:

«Լուրը մեծ հիասթափություն պատճառեց թե՛ հայ համայնքին, թե՛ այստեղ հայ դատի հարցերով զբաղվողներին և իհարկե՝ Երուսաղեմի հայոց միաբանությանն ու պատրիարքին:  Այդ էր  պատճառը, որ սրբազանը նամակ ուղարկեց, որում իր հիասթափությունը հայտնեց եւ պահանջեց, որ ճանաչման օրինագիծը հետ վերադարձվի օրակարգ, որովհետեւ ընդամենը մեկ շաբաթ առաջ խոստացել էին, որ պետք է ընդրգկվեր օրակարգում: Պատրիարքը նշել էր, որ օրակարգում ընդգրկելը հրեա ժողովրդի կողմից  կատարված ճիշտ եւ բարոյական քայլ կլինի»,-ասաց  Կորյուն վարդապետ Բաղդասարյանը՝ տեղեկացնելով, որ պատրիարքն արդեն ստացել է Քնեսեթի խոսնակ Յուլի  Էդելշթեյնի պատասխան-նամակը, որտեղ ասվում է, թե տեղական մամուլի հրապարակումները սխալ են, չճշտված լուրեր են պարունակում, և որ խոսնակը ցեղասպանության ճանաչման մասին հարցը հետ չի քաշել: Խոսնակը նաև նշել է, որ ընդհանրապես նման ծրագիր չկար, որ այս շաբաթ  հարցը պետք է օրակարգում լիներ, եւ տեղեկացրել է, որ իրենք սպասում են հարմար ժամանակի,  երբ Քնեսեթում մեծամասնություն լինի, և երբ համոզված լինեն, որ ընդունելու համար  մեծամասնություն կա, այն ժամանակ էլ օրակարգում կընդգրկեն: Նամակի մեջ Իսրայելի օրենսդիր մարմնի խոսնակը հստակ նշել էր, որ ինքը իր ոչ մի խոսքից հետ չի կանգնում եւ դա, այո, Իսրայելի Քնեսեթի համար մարդկային եւ բարոյական քայլ է, որ պետք է անի, նա պե՛տք է ճանաչի հայոց ցեղասպանությունը»,-Իսրայելի օրենսդիր մարմնի բարձրաստիճան պաշտոնյայի խոսքերը մեկնաբանեց պատրիարքության դիվանապետը:

Կորյուն վարդապետ Բաղդասարյանը նաեւ ուշագրավ դրվագներ փոխանցեց Իսրայելի կողմից Հայոց ցեղասպանության հարցի առնչությամբ, ինչը, ըստ նրա, հույս է ներշնչում, որ ճանաչումը մոտ է:

«Հույս ներշնչող այդ հանգամանքներից մեկն այն է, որ երբ մենք հարցը քվեարկության դնելու համար մասնակցեցինք քննարկմանը, ապա հարց էր դրված ոչ թե քննարկումներ կատարելու օրինագծի շուրջ, այլեւ՝ այս անգամ ուղղակի ճանաչելու այն:

Երկրորդ՝ մինչեւ հիմա  այս թեմայով տեղի ունեցած բոլոր քննարկումների ժամանակ կառավարությունից ներկայացուցիչ էր ներկա լինում, որոնք փորձում էին Քնեսեթին համոզել օրինագիծը օրակարգից հանել համ ուղարկել Քնեսեթի որեւէ հանձնախումբ՝ այնտեղ քննարկելու:  Այս անգամ կառավարության ոչ մի ներկայացուցիչ չէր եկել:   Նախորդ տարիներին, ամեն անգամ որ հայոց ցեղասպանության հարցը Քնեսեթում քննարկվում էր, երբեք չէր եղել, որ Իսրայելի վարչապետն անդրադառնար այդ քննարկմանը: Այս անգամ քննարկումից օրեր առաջ  Իսրայելի վարչապետ Բենյամին Նեթանյահուն անդրադարձավ այս հարցին եւ ասաց, որ արդեն հասել է հայոց ցեղասպանությունը ճանաչելու  ժամանակը:  Այս երեք կետերը մեզ հույս են ներշնչում, որ մոտ ապագայում Քնեսեթը կարող է ճանաչել հայոց ցեղասպանությունը: Ի դեպ, օրերս տեղեկացանք, որ հնարավոր է՝ այն լիագումար նիստի օրակարգ մտնի հենց հունիսի առաջին կեսին»,-ասաց մեր զրուցակիցը՝ ավելացնելով, որ այլեւս հայոց ցեղասպանության հարցը Իսրայելի կողմից քաղաքական շահարկման առարկա չի կարող դառնալ, նրանք պետք է հարգանքով մոտենան մեր զոհերին: