Մեր կողմից իրականացվող հակահամաճարակային միջոցառումները համապատասխանում են բոլոր չափանիշներին. Ա. Թորոսյան

Առողջապահության նախարար Արսեն Թորոսյանը ներկայացրել է Հայաստանում գրանցված կորոնավիրուսի դեպքի մանրամասները:

«Ինչպես արդեն տեղյակ եք իմ և վարչապետի գրառումներից, մենք երեկ մեր քաղաքացու մոտ կորոնավիրուսով վարակվածության հաստատված դեպք ենք ունեցել, ով Իրանից վերադարձել է ամսի 28-ին: Վերջին տվյալներով մեր քաղաքացին պրակտիկորեն ոչ մի ախտանշան չունի, չնայած դիմելու պահին ունեցել է 38 աստիճան ջերմություն և դրա պատճառով է դիմել բժշկական հաստատություն: Նրա հետ է կինը, որ ոչ մի ախտանշան չունի. նույնիսկ վիրուսի առկայությունն  է բացասական»,-նշել է նա:

Թորոսյանը հիշեցրել է, որ կառավարության նիստում ամսի 24-ին որոշվել է սահմանափակել ԻԻՀ-ի հետ ուղևորաշրջանառությունը՝ որոշակի բացառություններ սահմանելով Հայասստան վերադարձող ՀՀ քաղաքացիների և Իրան վերադարձող Իրանի քաղաքացիների համար:

«Հատուկ եմ այս հանգամանքը շեշտում, որովհետև հաճախ լսում եմ՝ ինչո՞ւ ամբողջովին չի փակվել սահմանը: Միանգամից պատասխանեմ՝ ՀՀ Սահմանադրությամբ ՀՀ քաղաքացիների մուտքը Հայաստան չի կարող սահմանափակվել: Սակայն ունենալով տեղեկատվություն, թե մոտավորապես քանի քաղաքացի է ցանկացել վերադառնալ օդային ճանապարհով Հայաստան, փաստորեն ռեգուլյար փոխադրումներ կազմակերպող ավիաընկերության կողմից կազմակերպվեց երկու չվերթ՝ չորեքշաբթի և ուրբաթ, որոնց Հիվանդությունների վերահսկման և կանխարգելման ազգային կենտրոնի մեր մասնագետն ուղեկցում էր՝ տեղում կատարելով ուղևորների զննումներ, բոլորին հատկացնելով պաշտպաննիչ դիմակներ: Նույնը տեղի է ունեցել Երևանում, որևէ մեկը չի ունեցել որևէ գանգատ և գնացել են իրենց տուն:

Անդրադառնալով այն հարցին թե ինչու բոլորը չեն մեկուսացվել՝ նախարարը նշեց, որ դա արդարացված գործիք չէ:

«Այն ինչ տեղի է ունեցել երեկ, կլասիկ, ճիշտ հայտնաբերված դեպք է: Միանգամից անդրադառնամ կոնտակտավորներին. քանի որ հենց Թեհրանից բոլորը՝ ուղևորները և անձնակազմը կրել են դիմակներ, Հայաստանում ունեցել են առանձին ելքի ուղի, պրակտիկորեն որ ոչի հետ չեն շփվել: Սակայն նորից միջազգային ռեկոմենդացիաների համաձայն՝ եթե ինքնաթիռում հայտնաբերվում է կորոնավիրուսով վարակված որևէ անձ, անկախ նրա հիվանդության ծանրությունից, խորհուրդ է տրվում դրանից երկու շարք առաջ, երկու շարք հետ և իր շարքը մեկուսացնել 14 օր ժամանակով, ինչն էլ այս պահին կատարվում է և ավարտական փուլում է: Նաև մեկուսացվել են ուղևորին և կնոջը տուն տարած քաղաքացին և նրանց հետ եղած անձինք. նշեմ, որ դա տաքսի չի եղել: ԱԱԾ-ն մի քանի ժամվա ընթացքում պարզել է տեղափոխման հանգամանքները:

Նույնը վերաբերում է հիվանդանոց տեղափոխվելուն: Քաղաքացին այնտեղ գնացել է շտապ օգնության մեքենայով, որի անձնակազմը նույնպես մեկուսացվում է:

Այս ամենից դուրս գտնվող անձինք չեն համարվում ռիսկի գոտում գտնվող անձինք: Չբացառելով կնոջ կողմից այլ անձանց վարակելու հավանականությունը՝ մենք բոլոր ուղևորներին պահում ենք հսկողության տակ, ու նորից եմ շեշտում մեր կողմից իրականացվող հակահամաճարակային միջոցառումները  համապատասխանում են բոլոր չափանիշներին և ավելին են հաճախ, քան երբեմն վկայակոչվող երկրների կողմից կատարվող միջոցառումները՝ այդ թվում մեզնից զարգացած և հարուստ: Այսինքն, այստեղ թերացման մասին խոսելը պարզապես ավելորդ է»,-նշել է նա:

Թորոսյանն ասել է, որ կատարված միջոցառումները, որոնք սկսել են հունվարի 22-ից, երբ ԱՀԿ-ն առաջին արտակարգ ժողովն է արել վիրուսի վերաբերյալ, բավականին էֆֆեկկտիվ են եղել և մենք չենք ունեցել վիրուսի բերովի դեպք:

«Դրանք եղել են թե լոկալ միջոցառումներ, թե տարբեր ռիսկի գոտում գտնվող քաղաքացիների նկատմամբ սահմանափակումների կիրառում»,-նշել է նա և ավելացրել, որ այս հայտնաբերումը տեղավորվում է հիվանդությունների չակերտավոր սահմաններ չունենալու սկզբունքի շրջանակներում, և որևէ երկիր ապահովագրված չէ նոր կորոնավիրուսով վարակ ունենալուց:

«Մեր կողմից կատարվող միջոցառումները առնվազն թույլ են տալիս հնարավորինս կանխարգելել լոկալ դեպքերը: Սա բերովի դեպք է, ինչը մեզ նոր քայլեր անելու է դրդում, ինչը մենք անում ենք, սակայն նաև կարող եմ փաստել, որ որևէ հանրային առողջապահական լուրջ վտանգ իրենցից չի ներկայացնում, նույնիսկ այդ անձի համար, այս պահին այդ անձը մեկուսացված նստած է հիվանդանոցում, նրա նկատմամբ որևէ բուժական միջոցառում չի իրականացվում»,-ասել է նա:

Նախարարը տեղեկացրել է, որ կատարված թեստերից միայն այդ մեկն է դրական արդյունք ունեցել: Դրանք իրականացվել են էպիդեմիոլոգիական և բժշկական ցուցումներով:

«Մեկուսացվել է 32 անձ: Ինքնաթիռի ուղևորների թիվը եղել է 82, առաջին ինքնաթիռում՝ 52»,-ասել է նա՝ ընդգծելով, որ մեր ցամաքային սահմանը ՀՀ քաղաքացիների համար բաց է, և այն միջոցառումները որ իրականացվում են, բավարար են առողջապահական միջազգային կանոնների տեսակետից:

Նա նաև ավելացրել է, որ բեռների փոխադրումը ևս կատարվում է անվտանգության պայմաններում և ոստիկանության հսկողությամբ:

Արսեն Թորոսյանն անդրադարձավ նոր տիպի կորոնավիրուսից մահացության դեպքերին՝ նշելով, որ դրանք տեղի են ունենում հիմնականում 50-ից բարձր անձանց մոտ և ամենաշատը հանդիպում է 80-ից անց անձանց մոտ: