Ե՞րբ կավարտվի ի ՀՀ-ԵՄ համաձայնագրի վավերացման գործընթացը

Հայաստան-ԵՄ-ի միջև ստորագրված Համապարփակ և ընդլայնված գործընկերության մասին նոր փաստաթղթում և ԵՄ-ի հետ կնքված մի շարք այլ համագործակցային փաստաթղթերում ձևակերպված է քաղհասարակության դերի խրախուսման անհրաժեշտությունը ամենատարբեր ոլորտներում, համոզված է ՀՀ փոխարտգործնախարար Կարեն Նազարյանը: Նրա համոզմամբ Հայաստանի գործադիր իշխանության մարմինները մեծապես կարևորում են քաղհասարակության ներգրավվածությունը:

«Սա պարզապես հայտարարություն չէ, այլ վերջին շրջանում արդեն ավանդույթ դարձած աշխատանքային պրակտիկա, պարտադիր աշխատաոճ, ինչը կարևոր մասի է վերածվում մեր քաղաքական մշակույթում: Առհասարակ Հայաստանի և նրա գործընկեր երկրների հետ հարաբերությունների զարգացման գործընթացում, որն անշուշտ ունի շարունակական բնույթ, ի մասնավորի ԱԳՆ-ն մշտապես բաց է եղել բոլոր շահառուների տեսակետների քննարկման, ինչու չէ նաև բախման առումով: Այդ տեսակետներին, այլընտրանքային մոտեցումներին, երբեմն նաև քննադատական բնույթի, ծանոթանալը մեծապես օգնում է մեզ արտաքին հարաբերությունների տարբեր հարցերում ծանոթանալ հանրային կարծիքներին, հաշվի նստել մասնավորապես վերջնական որոշումների կայացման կամ դրանց իրագործման փուլում»,-իր ելույթում նշեց Կարեն Նազարյանը: 

Փոխնախարարի համոզմամբ՝ քաղաքացիական հասարակությունը վստահաբար իր կարևոր դերակատարումն ունի ԵՄ և ԱՄՆ-ի հետ շարունակվող համագործակցության խթանման հարցում, մասնավորապես միջմարդկային շփումների, բազմաոլորտ փոխանակումների ու կապերի ամրապնդման գործում:

«Մենք մշտապես բաց ենք եղել միասին քննարկելու Երևանի և Վաշինգտոնի, Երևանի և Բրյուսելի, եվրոպական մյուս մայրաքաղաքների և կառույցների միջև տեղի ունեցող զարգացումներն ու փոխգործակցությանը, որոնք վերջին շրջանում մտել են բավականին աշխույժ և ինտենսիվ փուլ: Ասվածի վառ օրինակն էլ կարող է հանդիսանալ Եվրամիության հետ շրջանակային համաձայնագրի շուրջ տարվող բանակցությունների ողջ ընթացքում հասարակական կազմակերպությունների և Կառավարության ներկայացուցիչների, նաև ԱԺ-ի պատգամավորների մասնակցությամբ տեղի ունեցած բազմաթիվ հանրային քննարկումները: Իր հերթին ԱԳՆ-ն  նույնպես նախաձեռնել է քննարկումներ քաղհասարակության ներկայացուցիչների հետ և մտադիր ենք շարունակել այդ գործընթացը»,-ասաց Նազարյանը: 

Նա նաև ընդգծեց.«Մենք հետևողական ենք լինելու ԵՄ–ի հետ ստորագրված բոլոր փաստաթղթերով ստանձնած հանձնառությունների անշեղ իրականացմանը նույն մոտեցումն ակնկալում ենք նաև մեր գործընկերներից»: 

Քննարկման մասնակից քաղաքագետ Ստեփան Գրիգորյանը հետաքրքրվեց, թե երբ է ԵՄ–ի հետ ստորագրված նոր փաստաթղթի վավերացման գործընթացը հասցնելու ավարտին: Կարեն Նազարյանը զերծ մնաց որոշակի ժամկետներ նշելուց՝ հաշվի առնելով, որ փաստաթուղթը պետք է քննարկման դրվի ՍԴ–ում, այնուհետև ԱԺ-ում: 

«Համաձայնագիրն ունի չորս կողմ ՀՀ-ԵՄ, ԵՄ անդամ երկրներ և Եվրաակումբ: Հստակ  ձևակերպված են վավերացման գործընթացին առնչվող դրույթները և մենք մտադիր ենք դրանք իրականացնել բավականին արագ:Կառավարության ներսում այդ հարցով կան արդեն ցուցումներ, և գործընթացն արդեն սկսվել է: Կանխատեսել հստակ ժամկետ՝ անշնորհակալ գործ է, կարող ենք բոլորս էլ սխալվել: Ես ձեռնպահ կմնայի ժամկետներ նշելուց, բայց կարող եմ ասել, որ ապրիլ, մայիս ամիսներից  ի զորու կլինենք այդ գործընթացն ավարտել»,-ասաց փոխնախարարը: 

Քննարկմանը մասնակցող ՀՀ տնտեսական զարգացման և ներդրումների նախարարի տեղակալ Գարեգին Մելքոնյանն էլ կարևորեց նմանատիպ քննարկումների կազմակերպումը՝ քաղաքացիական հասարակության դերի և ներգրավվածության բարձրացման հարցում: 

«Պետական մարմինների կողմից արվող քայլերը կարող են լինել ավելի արդյունավետ և ավելի նպատակային, եթե ունեն առավել լավ երկխոսության վրա հիմնված ուսումնասիրություններ՝ նաև ներգրավելով քաղհասարակությանը»,-ասաց Գարեգին Մելքոնյանը: 

Նա անդրադարձավ Հայաստան-ԵՄ ստորագրված նոր փաստաթղթին՝ նշելով, որ այն տալիս է իրավապայմանագրային հիմք ՀՀ–ի և ԵՄ-ի միջև ամենատարբեր ոլորտներում երկարաժամկետ զարգացման համագործակցության զարգացման առումով: Տասը, տասնհինգ և ավելի տարիներ համաձայնագիրը, ըստ փոխնախարարի, լինելու է շատ արդիական փաստաթուղթ: Համաձայնագրով ձեռքբերված պայմանավորվածությունը  միտված է Հայաստանի ներսում իրականացնելու բարեփոխումներ: 

«Բարեփոխումների տեսանկյունից բացառություն չեն քաղաքականությանն առնչվող պայմանավորվածությունները, որովհետև մենք բուն համաձայնագրում, ունենք, ինչպես իմ գործընկերը նշեց, նաև հստակ ձևավորված մոտեցում քաղհասարակության, դրա կազմակերպվածության առումով: Դա նշանակում է, որ շատ ոլորտներում ընդունված որոշումները բերելու են զարգացման»,-ասաց Գարեգին Մելքոնյանը: