Թող տպավորություն չստեղծվի, թե զբաղված ենք, խախտումները պատժվելու են. ՏՄՊՊՀ նախագահ

ՏՄՊՊՀ նախագահ Գեղամ Գևորգյանն այսօր լրագրողների հետ հանդիպմանը նշեց՝ խոշոր տնտեսվարողներն իրենց մշտական մոնիթորինգի տակ են, մոնիթորինգ են անում նաև նրանց պաշարները, ինչպես նաև օրվա սպառման ծավալները, մնացորդը, արտադրությունը կամ ներմուծումը:

Գևորգյանի խոսքով՝ այս պահին անհանգստացնող խնդիրներ չեն նկատվում, միակ խնդիրն օրական ծավալի ապահովումն է, պետք է կարողանալ պահեստներից տեղափոխել, սուպերմարկետների աշխատողները ֆիզիկապես պետք է կարողանան այդ ամենը հասցնել տեղ:

Նա անդրադարձավ սպիրտի գնի բարձրացման մասին հայտարարություններին՝ հերքելով դրանք: Ըստ ՏՄՊՊՀ նախագահի՝ ալյուրի գինը ևս չի բարձրացել, որոշակի թանկացում տեղի է ունեցել՝ կապված դոլարի արժույթի տատանման հետ, բայց դա էլ են հսկողության տակ պահում: Մարզերում որոշակի թանկացումների մասին խոսելով՝ նա նշեց, որ մոնիթորինգ են անում, որ հասկանան իրավիճակը:

«Չենք բացառում, որ կլինեն տնտեսվարողներ, որ կբարձրացնեն գները՝ օգտվելով իրավիճակից: Մենք հանրապետությունում սպառվող ծավալի գերակշիռ մասն աահովող խոշոր տնտեսվարողներին վերահսկում ենք, խախտումների դեպքում անխուսափելի պատասխանատվության ենք ենթարկելու, տպավորություն չստեղծվի, թե զբաղված ենք: Օրինակ` ալկոգելերի հետ կապված՝ երկու վարույթ ենք հարուցել, ոմանք ինտերնետով փորձել էին վաճառել և բարձր գներով, մենք հայտնաբերում ենք և խիստ պատասխանատվության ենթարկում: Նրանք, ովքեր List-ով և այլ կայքերով կփորձեն վաճառել, փոխանցում ենք ՊԵԿ մեր գործընկերներին: Հրապարակումների մեծ մասի պոչի հետևից որ գնում ենք, պարզվում է՝ գրանցված բիզնեսներ չեն, այլ մարդիկ, որ սպեկուլյատիվ գործունեություն են իրականացնում»,- ասաց նա:

Հանրապետությունն ալկոգելով ապահովող երեք խոշոր ընկերությունների հետ ՏՄՊՊՀ-ն ամենօրյա կապի մեջ է, ալկոգելի գինը որևէ դրամ չի բարձրացվել, սպիրտի պաշարը ևս բավարար է, դրա գինը նույնպես չի բարձրացվել: Ինչ վերաբերում է դիմակի բարձր գնին, Գևորգյանը հայտնեց, որ դիմակի ձեռքբերման գինը բարձրացել է, դրանց հիմնական ներկրողներն են Չինաստանն ու Ռուսաստանը: Այժմ, սակայն, ՏՄՊՊՀ նախագահն ուրախացնող լուրեր է հայտնում՝ կապվել են Չինաստանի պահեստների հետ, որ փորձում են արտահանում կատարել, Հայաստանին դիմակների գնառաջարկներ են ներկայացրել, երեկվա դրությամբ՝ 84 դրամով մեծածախի առաջարկ է եղել, այսինքն՝ գինն իջնում է:

Ծառայությունների հետ կապված խնդրին անդրադառնալով՝ Գևորգյանն ասաց, որ պարետատանը որոշակի ծառայությունների՝ օնլայն ռեժիմով իրականացման հարցն է լուծվում, օրինակ, ալկոգելերի օնլայն վաճառք է կատարվում:

«Ապրանքների գնման սահմանափակման անհրաժեշտություն չենք տեսնում, քանի որ դա ավելորդ անգամ պետք է մարդկանց ներսուդուրս անելու առիթ տա, փոխարենը հորդորում ենք գնումներ իրականացնել խելամտության սահմաններում»,- ասաց նա՝ միաժամանակ հայտնելով, որ ոչ պարենային ապրանքների՝ օճառի, զուգարանի թղթի և այլ ապրանքների պակաս նույնպես չկա, ուստի պետք չէ անհանգստանալ: