Կարգախմբերը խիստ վերահսկողություն են իրականացնում Շիրակի մարզի բոլոր ավտոճանապարհներին

Շիրակի մարզ տանող բոլոր միջմարզային  ճանապարհներին իրականացվում է խստացված հսկողություն. այս մասին SHANTNEWS.am-ին հայտնեց Ճանապարհային ոստիկանության ճանապարհապարեկային  ստորաբաժանման Շիրակի մարզը սպասարկող երրորդ դասակի հրամանատար Լյուդվիգ Ղանդիլյանը:

«Ունենք անշարժ պահակակետ Լանջիկ գյուղի մոտակայքում, հսկում ենք մայրաքաղաքից ու այլ մարզերից Շիրակի տարածաշրջան ավտոմեքենաների հոսքը: 24-ժամյա խիստ հսկողություն ենք իրականացնում գիշեր-ցերեկ, անցնել թույլատրում ենք միայն մթերք ու սնունդ տեղափոխող ավտոմեքենաներին ու այն քաղաքացիներին, որոնք աշխատանքի են մեկնում կամ վերադառնում, մյուսներին տեղաշարժվել թույլ չենք տալիս»,- ասաց Լյուդվիգ Ղանդիլյանը:

Երրորդ դասակի հրամանատարը նաև փոխանցեց, որ պահակակետեր են գործում նաև Շիրակի մարզի հինգ` Ախուրյանի, Արթիկի, Անիի, Ամասիայի և Աշոցքի տարածաշրջաններից դեպի մարզկենտրոն տանող ճանապարհներին:

Այս գործառույթը հիմնականում իրականացնում են ոստիկանության աշխատակիցները, քանի որ ճանապարհային ոստիկանության կարգախմբերը քիչ են, հերթափոխով աշխատում են 10 կարգախմբեր, որոնք հիմնականում շուրջօրյա ծառայություն են իրականացնում Գյումրիի կենտրոնական հատվածներում:

«Երկու անշարժ կարգախումբ ունենք Հայուհու հրապարակում, մյուսները շրջում են կենտրոնական  փողոցներում: Ուրախությամբ պետք է նշեմ, որ բոլոր վարորդների և ուղևորների մոտ տեղաշարժի համար սահմանված ձևաթղթեր ու անձը հաստատող փաստաթղթեր կան, այս օրերին դեռ չի եղել մի դեպք, որ սահմանված քանակից ավելի ուղևոր լինի մեքենաներում, և ստիպված լինենք իջեցնել:

Զարմանալի է, բայց քաղաքացիները օրենքի այս պահանջը շատ լավ պահպանում են, ինչը որոշ չափով հեշտացնում է մեր աշխատանքը»,- նշեց երրորդ դասակի հրամանատարը:

Ըստ Լյուդվիգ Ղանդիլյանի՝ արդեն երկու օր է, ինչ Գյումրիի կենտրոնական փողոցներում ցերեկային ժամերին նկատվում է  մարդկանց ու ավտոմեքենաների որոշակի ակտիվություն, ինչը պայմանավորված է թոշակների վճարմամբ ու քաղաքացիների գնումներով:

Հատկանշական է, որ այս օրերին ավտովթարներ չեն գրանցվել:

«Ուրախալի փաստ ենք արձանագրել, որ ավտովթարներ ապրիլի երեք օրերին չենք ունեցել, իսկ  մարտի վերջին օրերին, երբ արտակարգ դրություն սահմանվեց, ունեցել ենք մարմնական վնասվածքով չորս ավտովթար, զոհեր ևս չեն եղել: Իսկ ճանապարհային երթևեկության կանոնների խախտման պատճառով երեք օրվա ընթացքում կազմվել է 40 արձանագրություն»,- ասաց Լյուդվիգ Ղանդիլյանը:

Ճանապարհային ոստիկանությունը նաև ուժեղացված հսկողություն է իրականացնում  այսպես կոչված՝ «արտոնյալ վարորդների» կամայականությունները վերահսկելու ուղղությամբ:

Պարոն Ղանդիլյանի փոխանցմամբ՝ լսել են, որ որոշ վարորդներ, օգտվելով ճանապարհների կիսադատարկ լինելու հանգամանքից, հատկապես երեկոյան ժամերին «ռալլիներ» են անցկացնում, նրանց նկատմամբ շատ խիստ պատժամիջոցներ են կիրառվում:

Իսկ ի՞նչ վերահսկողություն է սահմանված Գյումրի – Բավրա միջպետական ավտոճանապարհին, և ինչպե՞ս են երթևեկում օտարազգի վարորդներն ու ջավախահայերը: Լյուդվիգ Ղանդիլյանի փոխանցմամբ՝ այս դեպքում բեռնատարների վարորդների երթևեկությունը թույլատրելի է:

«Դեպի Բավրայի անցակետ գնացող կամ անցակետը հատող օտարազգի վարորդների երթևեկությունը թույլատրված է, այս դեպքում մեքենայում պետք է գտնվի միայն վարորդը: Ինչ վերաբերում է  ջավախահայերին, ապա նրանք ևս կարող են երթևեկել տեղաշարժի ձևաթղթով ու անձը հաստատող փաստաթղթերով, բայց ասեմ, որ մեր հայրենակիցների հոսքը խիստ նվազել է»,- հայտնեց Լյուդվիգ Ղանդիլյանը: