Արցախում կանցկացվի՞ նախագահական ընտրությունների երկրորդ փուլը. SHANTNEWS-ի անդրադարձը

Ընտրություններ չանցկացնելու հիմքը, համաձայն Արցախի օրենսդրության, արտակարգ դրության ռեժիմ սահմանելն է. դա նաև Սահմանադրության պահանջ է: Այս մասին SHANTNEWS-ի հետ զրույցում նշեց Արցախի ԿԸՀ նախագահ Սրբուհի Արզումանյանը՝ անդրադառնալով Արցախում նախագահական ընտրության երկրորդ փուլը հետաձգելու հավանականությանը:

ԿԸՀ նախագահը հույս հայտնեց, որ առողջամիտ լուծումներ կգտնվեն, դրանց վերաբերյալ հանրությունը տեղյակ կլինի, մասնավորապես՝ անդրադարձ կկատարվի ընտրությունների անցկացման մեխանիզմներին, դրանք անցկացնել-չանցկացնելուն կամ ինչ ձևաչափով անցկացնելուն: Արզումանյանը հայտնեց, որ ընտրությունները չեղարկելու քննարկում դեռ չի եղել: Արտակարգ դրությամբ պայմանավորված՝ ընտրությունը հետաձգելու դեպքում, ըստ Արզումանյանի, օրենքը սահմանում է, որ ընտրությունը հետաձգվում է մինչև արտակարգ դրության ռեժիմի բացառումը:

Հարցին՝ հաշվի առնելով, որ առաջին փուլում առավելագույն ձայներ ստացած թեկնածուներից մեկը բոյկոտել է ընտրությունները, կոչ արել չմասնակցել, կանցկացվի՞ արդյոք ընտրություն՝ միակ թեկնածուով, ԿԸՀ նախագահը պատասխանեց՝ այս դեպքը հստակ ամրագրում ունի Սահմանադրության մակարդակով՝ որտեղ հստակ է նշվում, որ անկախ թեկնածուներից որևէ մեկի ինքնաբացարկից՝ ընտրությունները, այդուհանդերձ, կայանում են առավելագույն ձայներ ստացած թեկնածուների մասնակցությամբ:

«Բնականաբար, դրանից բխում է, որ չեղարկման կամ «մեկին հաղթանակ շնորհելու» այլ մեխանիզմներ օրենսդիրը չի կարգավորել, լուծումը միակն է՝ եթե մեկ թեկնածու է, պետք է կեսից ավելին կողմ լինի, եթե մեկից ավելին են՝ առնվազն ընտրության մասնակիցների կեսից ավելի կողմ ձայներ պիտի ստացած լինի հաղթողը, դրանից դուրս իրավական կարգավորումներ չեն նախատեսվում»,- նշեց նա:

Արցախի կենտրոնական ընտրական հանձնաժողովը երեկ՝ ապրիլի 7-ին, նիստ է անցկացրել, որտեղ որոշվել է 2020թ. ապրիլի 14-ին անցկացնել ԱՀ նախագահի ընտրությունների երկրորդ փուլ` քվեարկության օրը` ապրիլի 14-ի երեքշաբթին հայտարարելով ոչ աշխատանքային օր:

Նիստում քննարկվել և հաստատվել է ԱՀ նախագահի ընտրությունների երկրորդ փուլի նախապատրաստման և անցկացման հիմնական միջոցառումների ժամանակացույցը: Համաձայն ժամանակացույցի` նախընտրական քարոզչության սկիզբը 2020թ. ապրիլի 9-ն է:

ԱՀ նախագահի ընտրությունների երկրորդ փուլին մասնակցող թեկնածուների անունների հերթականությունը քվեաթերթիկում որոշելու և նշելու համար նիստում անցկացվել է վիճակահանություն: Արդյունքներով արձանագրվել է, որ քվեաթերթիկում թեկնածուների տվյալները շարադրված կլինեն հետևյալ հաջորդականությամբ` 1. Մայիլյան Մասիս Սամվելի 2. Հարությունյան Արայիկ Վլադիմիրի:

Սահմանվել է նաև ԱՀ նախագահի ընտրությունների երկրորդ փուլի քվեաթերթիկի նմուշը. Հանրապետության նախագահի ընտրությունների քվեաթերթիկը կլինի սպիտակ, A5 ֆորմատով թղթի վրա` երկու գույնի հատուկ ջրաներկի պաշտպանմամբ: