Պատգամավորներն ընդամենը 150 000 դրամ պարգևավճար են ստանում. Արարատ Միրզոյան

ՀՀ ԱԺ նախագահ Արարատ Միրզոյանին այսօր լրագրողները հարց ուղղեցին Ապրիլյան քննիչ հանձնաժողովի աշխատանքների վերաբերյալ: Հարցին՝ արդյո՞ք մտածելու տեղիք տալիս է այն, որ ՀՀ երրորդ նախագահ Սերժ Սարգսյանը ներկայացել է հանձնաժողով, իսկ 2016-ի ապրիլին ԶՈւ շտաբի պետի պաշտոնը զբաղեցրած Յուրի Խաչատուրովը՝ ոչ, ասաց հետևյալը.

«Ես ուզում եմ իմ  վերաբերմունքը արտահայտել. չեմ կարծում, թե պարոն Խաչատուրովը ճիշտ է արել, որ չի եկել, հանձնաժողովին չի ներկայացրել իր գիտելիքները, տեղեկությունները»:

Միրզոյանը խոսեց նաև պարգևավճարների մասին: Արձագանքելով տարբեր պաշտոնյաների՝ բարձր պարգևավճարներ ստանալու մասին տեղեկություններին՝ նշեց.

«Վճարման տարբեր սանդղակներ կան, կարող եմ նաև մասնավոր ընկերություններից և միջազգային տարբեր ընկերություններում աշխատելու իմ փորձից ասել, սա սկզբունք է աշխարհում. վարձատրման չափը պայմանավորվում է պատասխանատվության չափով, որքան շատ բան է կախված այդ մարդու որոշումներից, այնքան շատ է նա վճարվում: Հիմա կա օրենքով սահմանված սանդղակ: Սա, իհարկե, չափազանց չոր մոտեցում կլիներ, եթե սրանով սահմանափակվեի, բայց կա մեդալի մյուս կողմը՝ անապահովություն կա, և չի կարելի ասել՝ եթե պատասխանատվությունը շատ է, դու պետք է ստանաս 10 միլիոն դրամ, կենսաթոշակառուն՝ 30 000 դրամ: Բայց նաև չի կարելի անտեսել այդ հանգամանքը, որ այդ մարդկանց պատասխանատվությունը շատ է»

ԱԺ նախագահը խորհուրդ տվեց չմոռանալ նաև մի հանգամանք. պետական համակարգը պրոֆեսիոնալների կարիք ունի, իսկ այդ դեպքում օրինաչափ է, որ նրանք մասնավորում կարող են աշխատել ու շատ բարձր աշխատավարձ ստանալ: Նա հիշեցրեց՝ պատգամավորները մինչև 1995թ. չեն եղել պրոֆեսիոնալ, ԱԺ-ում աշխատել են զուգահեռաբար, իսկ հետո որոշում է կայացվել, որ նա պետք է պրոֆեսիոնալ գործունեությամբ զբաղվի, աշխատավայրը պիտի լինի խորհրդարանը, և այստեղից փող ստանա:

«Ծառայությունը՝ ծառայություն, բայց ինչ-որ մեկը ունի հիփոթեքային վարկ, սրանք մարդիկ են, որ չունեն այլ բիզնեսներ, եկամուտները, առավոտից երեկո աշխատում են այստեղ, ջանքեր են ներդնում, որ լավացնեն մարդկանց կյանքը, դրա համար վճարվում են»,- ասաց նա:

Միրզոյանը տեղեկացրեց՝ պարգևավճար ստանում են ոչ միայն պատգամավորները, այլև ԱԺ բոլոր 700 աշխատակիցները: Վերջիններս ունեն օրենքով նախատեսված 30 տոկոսի չափով պարգևավճար, այդ ֆոնդը սահմանված է:

«Մի հարց էլ կա՝ պարգևավճարը խրախուսման նպատակ ունի, կարող են ասել՝ ինչո՞ւ պիտի բոլորը հավասար ստանան, բայց մյուս մոտեցումն էլ կա՝ խրախուսումը խրախուսում, բայց դա պետք է համարել չֆիքսված աշխատավարձ, ու բոլորը այն ստանան»,- ասաց Միրզոյանը:

Մամուլում շրջանառվող մեծ թվերին արձագանքելով՝ ԱԺ նախագահը տեղեկացրեց՝ պատգամավորն ընդամենը 150 000 դրամ պարգևավճար է ստանում, իսկ գրեթե բոլոր պատգամավորների մարտ ամսվա պարգևավճարը փոխանցել են կորոնավիրուսի դեմ պայքարին:

Խոսելով «Ապօրինի գույքի բռնագանձման օրենքի» մասին՝ Միրզոյանը հայտնեց, որ այդ գործընթացը, միևնույն է, սկսվելու է, ընթանալու է:

«Մեր ամենահիմնական գծերից մեկը հենց կոռուպցիայի դեմ պայքարն է: Թող որևէ մեկը չկարծի, թե կարող է՝ այս օրենքը կիրառենք ինչ-որ մութ գործարքի գնալու համար»,- ասաց նա: