Կարեն Կարապետյանը տվեց մեզ հետաքրքրող հարցի պատասխանը. Անդրանիկ Քոչարյան

ՀՀ նախկին վարչապետ Կարեն Կարապետյանին ի՞նչ հարցեր են տրվել Ապրիլյան պատերազմի քննիչ հանձնաժողովի նիստում: Հանձնաժողովի նախագահ Անդրանիկ Քոչարյանը լրագրողների հետ զրույցում նշեց, որ Կարապետյանին հարցերի մի ամբողջ փաթեթ է տրվել այն մասին, թե իր վարչապետության ժամանակ՝ 2016-2018թթ. ինչ աշխատանքներ են կատարվել:

«Եթե այդ աշխատանքները կատարված լինեին, բնականաբար, այսօրվա քննիչ հանձնաժողովի կարիքը չէր լինի: Ինչո՞ւ այդ հարցերը Հովիկ Աբրահամյանից հետո ձևավորված կառավարությունը չի դարձրել իր առաջնահերթությունը. մենք ստացել ենք այդ հարցերի պատասխանն այնքանով, որքանով նա պատասխանեց մեր բոլոր հարցերին»,- ասաց նա:

Հարցին՝ Կարապետյանը պնդե՞ց դիզվառելիքի որակի հետ կապված իր հայտնի հայտարարությունը, Քոչարյանը պատասխանեց.

«Պարոն Կարապետյանը հանձնաժողովի փակ նիստում տվեց մեզ հետաքրքրող հարցի պատասխանը, չէ՞ որ հանձնաժողովը միայն Կարեն Կարապետյանի տված պատասխանների վրա չի հենվում: Հանձնաժողովը երբ այդ հարցը տալիս է, ունի նաև այս մեկ տարվա ընթացքում ուսումնասիրություններ: Ես կարևորում եմ զինվորականների տված պատասխանները, փաստաթղթային բազան: Այս պահին Ապրիլյանի հետ կապված ամենամեծ տեղեկատվությունը գտնվում է ԱԺ շենքում և այս սենյակում»:

Ի վերջո, արդյո՞ք Ապրիլյանի օրերին եղել է անորակ դիզվառելիք: Այս հարցին ի պատասխան՝ Քոչարյանը միայն նշեց, որ հենվում է այն զինվորականների պատասխանների վրա, որ եղել են մինչև Կարեն Կարապետյանը, շատ կարևոր է համարում ՊԲ հրամանատարի բացատրությունը:

«Մի գնահատական էլ տամ ՊԲ սպայակազմի հետ կապված. ես կիսում եմ, այս պահին կարող եմ վստահաբար ասել՝ սպայակազմը իր ձեռքի տակ եղած հնարավորությունները փորձել է օգտագործել մաքսիմալ, ինչքան կարողացել է, բայց դրա հետ մեկտեղ հանձնաժողովը պետք է տա այնպիսի եզրակացություն, որը ներառում է նաև ձեզ հուզող հարցերը: Մեզ համար կարևոր է՝ ինչ հանձնարարություններ է տվել այդ ժամանակվա վարչապետը: Կարապետյանը այդ տեսակետը հայտնել է 2017 թ. մարտի 1-ին և մարտի 13-ին, մեզ հետաքրքիր էր՝ կառավարությունն այդ տեսակետների հետ կապված ինչ հանձնարարական է իջեցրել իրավապահներին»,- ասաց նա:

Արդյո՞ք հանձնաժողովը հրավիրելու է գլխավոր դատախազին, Քոչարյանը պատասխանեց՝ գլխավոր դատախազին կհրավիրեին, եթե տեղեկատվության բազայի վրա ավելացնելու բան ունենային: Հանձնաժողովի նախագահը նշեց՝ հրավիրյալների ցանկի մեջ ունեին նաև Հովիկ Աբրահամյանի անունը:

«Այսօրվա կտրվածքով չեմ կարծում, թե այն ժամանակվա կառավարության գործողությունները լրացուցիչ մի բան ավելացնելու են, բայց եթե շատ եք ցանկանում, մենք աշխատանքի վերջում եթե ունենանք ժամանակ, կհրավիրենք: Բայց Հովիկ Աբրահամյանի մասով որոշում չունենք: Կարեն Կարապետյանի կառավարությունը ձևավորվել է Ապրիլյան դեպքերից հետո, ուստի, բացի տնտեսականից, նաև անվտանգային խնդիրները պետք է լինեին առաջնահերթություն»,- նշեց նա:

Քոչարյանը նկատեց՝ հանձնաժողովի նկատմամբ այլ վերաբերմունք է ձևավորվել նաև նախկին պաշտոնյաների շրջանում, քանի որ պարզ է՝ այն քաղաքական նպատակներ չի հետապնդում: