Ինչպե՞ս են տարբեր երկրների վրա ազդել կարանտինային ռեժիմի մեղմացումները

Ամբողջ աշխարհում կորոնավիրուսի պաշտոնապես հաստատված դեպքերի թիվը գերազանցել է 4 մլն-ը, հիվանդությունն ավելի քան 280 հազար մարդու կյանք է խլել: Կարանտինային ռեժիմի մեղմացումներ հայտարարած մի շարք երկրներում վարակվածների թվի աճ է նկատվել: Այդուհանդերձ, որոշ երկրներ շարունակում են սահմանափակումների մեղմացումը: Մի շարք երկրներ էլ նախընտրում են զգուշավորություն պահպանել:

Գերմանիա

Գերմանիայում սահմանափակումների մեղմացումից օրեր անց կորոնավիրուսով վարակման դեպքերն ավելացել են: CNN-ը հաղորդում է, որ ըստ Ռոբերտ Կոխի անվան ինստիտուտի՝ յուրաքանչյուր հաստատված հիվանդ միջինում վարակում է 1.1 մարդու. օրեր առաջ այդ թիվը 1-ից ցածր էր:

Չնայած Գերմանիայում վարակվածների թիվը գերազանցում է 170 հազարը` երկրում բացվել են բոլոր խանութները, աշակերտներն աստիճանաբար վերադառնում են դպրոց, վերսկսվում են Բունդեսլիգայի խաղերը:

Սահմանափակումների այս մեղմացումը, սակայն, չի բավարարում գերմանացիներին: Քյոլնում կարանտինային ռեժիմի դեմ բողոքի ակցիա է կազմակերպել: Ցուցարարների պնդմամբ՝ սահմանափակումները ոտնահարում են իրենց հիմնական սահմանադրական իրավունքները:

Հարավային Կորեա

Հարավային Կորեայում նույնպես սահմանափակումների մեղմացումից հետո արձանագրվել է կորոնավիրուսի նոր դեպքերի թվի աճ: Երկրում արձանագրված 35 նոր դեպքերից 29-ը կապված է գիշերային ակումբների հետ, ուր այցելել էր կորոնավիրուսով վարակված մի երիտասարդ: Վարակման այս նոր օջախի ի հայտ գալուց հետո Հարավային Կորեայի իշխանությունները կրկին փակել են բոլոր գիշերային ակումբները, բարերը և ռեստորանները: Reuters լրատվական գործակալության փոխանցմամբ՝ երկիրն արդեն որոշել էր լիովին բացել դպրոցներն ու ձեռնարկությունները, սակայն այդ որոշումը կարող է փոխվել:

Չինաստան

Վերջին 5 շաբաթների ընթացքում առաջին անգամ կորոնավիրուսով վարակման 5 նոր դեպք է գրանցվել վիրուսի օջախ հանդիսացող Չինաստանի Ուհան քաղաքում: TASS գործակալության փոխանցմամբ՝ Ուհանի իշխանությունները հայտարարել են, որ թույլ չեն տա կորոնավիրուսի երկրորդ ալիք, և վարակաբանական վերահսկողության խիստ միջոցները կպահպանեն:

Ընդհանրապես, Չինաստանում կորոնավիրուսի 17 նոր դեպք կա, ինչը ամենամեծ թիվն է վերջին 2 շաբաթների ընթացքում: Նոր դեպքերի մեծ մասը բաժին է ընկնում Չինաստանի հյուսիսարևելյան Շուլան քաղաքին: CNN-ը հաղորդում է, որ տեղի իշխանությունները դեղատներին և հիվանդանոցներին արգելել են հարբուխի դեմ որևէ դեղամիջոց վաճառել, որպեսզի հիվանդները դիմեն համապատասխան մասնագետների:

Լիբանան

Լիբանանը նույնպես խստացրել է կորոնավիրուսով պայմանավորված սահմանափակումները: Երկրի ներքին գործերի նախարարությունը փոխել է պարետային ժամը հանելու որոշումը, քանի որ մարդիկ չեն հետևում անվտանգության կանոններին, իսկ կորոնավիրուսի դեպքերի թիվն աճում է: Ավելին, Լիբանանում պարետային ժամը կսկսվի 2 ժամ շուտ՝ երեկոյան ժամը 7-ին և կտևի մինչև առավոտյան ժամը 5-ը:

Մեծ Բրիտանիա

Իսկ որոշ երկրներ, չնայած վիրուսի նոր ալիքի վտանգին, որոշ չափով մեղմել են սահմանափակումները: Այդպիսի քայլի է գնացել, օրինակ, Մեծ Բրիտանիան: Մայիսի 13-ից բրիտանացիները կարող են այգում զբոսնել, մարզվել և մեքենայով այցելել ընտանիքի անդամներին: Իսկ մայիսի 11-ից կարող են աշխատանքի վերադառնալ շինարարության և արտադրության ոլորտի աշխատողները:

Մեծ Բրիտանիայի վարչապետը միևնույն ժամանակ նշել է, որ սահմանափակումները լիովին չեն վերացվի:

«Խելագարություն կլիներ մի կողմ նետել մեր ձեռքբերումները և թույլ տալ վիրուսի երկրորդ ալիք: Մենք պետք է աչալուրջ մնանք: Պետք է շարունակենք վերահսկել վիրուսը և կյանքեր փրկենք: Դուք պետք է ենթարկվեք սոցիալական հեռավորության պահպանման կանոններին: Այդ կանոնները խախտողների նկատմամբ սահմանված տուգանքի չափը կավելանա»,- ասել է Ջոնսոնը:

Մեղմացումներին դեմ է արտահայտվել Շոտլանդիայի առաջին նախարար Նիկոլա Սթերջենը: Նա Բրիտանիայի կառավարության ղեկավարի ուղերձը բնութագրել է որպես «աղոտ և ոչ հստակ» և շոտլանդացիներին կոչ է արել մնալ տանը:

Ֆրանսիա

Ֆրանսիայում 8 շաբաթվա ընթացքում առաջին անգամ մարդիկ կարող են տնից դուրս գալ՝ առանց թերթիկ լրացնելու, կբացվեն տարրական դպրոցները, վարսավիրանոցները: Guardian պարբերականի փոխանցմամբ՝ ռեստորանները, թատրոններն ու կինոթատրոններն առայժմ փակ կմնան:

Շվեյցարիա

Շվեյցարիայում 15 տարեկանից ցածր աշակերտներն այսօր վերադարձել են դպրոց: Համապատասխան անվտանգության միջոցառումներ ձեռնարկելու դեպքում կարող են բացվել խանութները, շուկաները, թանգարանները, գրադարաններն ու ռեստորանները:

Թուրքիա

Թուրքիան սահմանափակումների մեղմացման շրջանակներում 65 տարեկանից բարձր մարդկանց թույլ է տվել տնից դուրս գալ:

Նոր Զելանդիա

Նոր Զելանդիայի վարչապետ Ջասինդա Արդերնը նույնպես հայտարարել է սահմանափակումները մի քանի փուլերով մեղմացնելու մասին: Առաջիկա օրերին նախ կբացվեն սրճարանները, ռեստորանները, կինոթատրոնները և խանութները, այնուհետև նաև՝ դպրոցները: Նոր Զելանդիայի բնակիչները կկարողանան ճանապարհորդել երկրի ներսում:

Միացյալ Նահանգներ

ԱՄՆ-ը նույնպես շարունակում է քայլեր կատարել երկիրը վերաբացելու ուղղությամբ: Չնայած երկիրը կորոնավիրուսի վարակակիրների և մահվան դեպքերի թվով առաջին տեղում է գտնվում՝ նահանգների մեծ մասն արդեն մեղմացրել են են սահմանափակումները: CNN-ի փոխանցմամբ՝ Վաշինգտոնի համալսարանի մասնագետները կանխատեսել են, որ մինչև օգոստոսի սկիզբը ԱՄՆ-ում կորոնավիրուսի զոհերի թիվը կհասնի 137 հազարի: Այժմ այդ թիվը գերազանցում է 80 հազարը:

Ռուսաստան

Ռուսաստանում նույնպես օրեցօր աճում է նոր վարակվածների թիվը: Երկիրն այժմ գտնվում է երրորդ հորիզոնականում՝ զիջելով միայն ԱՄՆ-ին և Իսպանիային: Միևնույն ժամանակ, Մոսկվայում վերջին 1 օրվա ընթացքում բուժվել է ռեկորդային թվով հիվանդ՝ 4032 հոգի:

Աշխարհում կորոնավիրուսով վարակվածների և մահվան դեպքերի թիվը՝ ըստ երկրների, կարող եք տեսնել այստեղ: