Ես չէի կարող մեր հասարակության անդամների մեծ մասին վիրավորել. Թունյանը՝ շահարկումների տեղիք տված իր հայտարարությունների մասին

Այսօր ԱԺ-ում «իմ քայլը» խմբակցության պատգամավոր Բաբկեն Թունյանն անդրադարձել է իր՝ վերջին օրերին արած ու շահարկումների տեղիք տված հայտարարություններին:

«Բանկային գաղտնիքի մասին է հիմնական ասելիքս, երբ վարչապետը հայտարարեց, որ 9-րդ ծրագրով կառավարության, որով պետք է աջակցություն ստանան խոցելի խմբերը, աջակցություն են ստացել մարդիկ, որոնք իրենց բանկային հաշիվների վրա ունեին 20 մլն դրամից ու 1 մլրդ-ից ավելի ավանդ ու կոնկրետ թիվը հիշեց, դա թույլ տվեց ենթադրելու, որ խախտվել է բանկային գաղտնիքը, դրա հիման վրա սկսեցին արվել երակացություններ, որ բանկային գաղտնիքը պաշտպանված չէ: Իրոք նման կասկած կարող է լինել մարդկանց մոտ, որովհետև ընթացակարգերին չեն տիրապետում, բայց արվում է միտումնավոր, որ մարդկանց մոտ տպավորություն լինի, թե իշխանությունը զբաղված է օրենքը խախտելով»,- ասել է նա:

Թունյանը պարզաբանել է, թե ինչպես իշխանությունը իմացավ թիվը՝ առանց բացահայտելու անձանց բանկային գաղտնիքը: Նշել է, որ յուրաքանչյուր անձի ունեցած ավանդի մեծությունը, հաշիվների շարժը, վերցրած վարկերի ծավալը բանկային գաղտնիք է, բայց ամփոփ տվյալներ պետական մարմինները կարող են ստանալ հարցման միջոցով:

«Տվյալ պարագայում բանկային համակարգը կարող է ամփոփ տեղեկանք պատրաստել և իմանալ, թե ինչպես է իքս բանկի միջոցով 30 հզր շահառու աջակցություն ստացել, կարող է հարցում անել և իմանալ, թե իքս թվով շահառուների մեջ քանի հոգի ունեն 1 մլն դրամից ավելի ավանդ՝ առանց կոնկրետ անձանց մասին տեղեկություն ստանալու: Ավանդատուների ընդհանուր թիվն անհրաժեշտ ինֆորմացիա է, որ պետությունը կարողանա ճիշտ քաղաքականություն վարել»,- ասել է Թունյանը:

Նա նաև հայտարարությամբ է հանդես եկել՝ խոսելով իր արտահայտությունների ու հասարակության շրջանում դրանց ընկալման մասին, ասել է.

«Ինչ վերաբերում է իմ հայտարարությանը, ովքեր չեն հասկանում, խոսքը վերաբերում է ոչ թե այն մարդկանց, ովքեր էդպես մտածում են, այլ նրանց, որոնք միտումնավոր մեղադրանք են հնչեցնում գործող իշխանությունների հասցեին, խոսքը վերաբերում է կոնկրետ էն մարդկանց, ովքեր անում են միտումնավոր: Նշածս բացատրությունից հետո, եթե մեկը կապացուցի, որ սխալ եմ ասում, էդ ժամանակ եթե ապացուցեն, կընդունեմ, որ սխալ եմ, եթե մարդն այս ամենից հետո անում է հայտարարություններ՝ շահեր հետապնդելով, խոսքս վերաբերում է նրանց, ոչ թե բոլոր քաղաքացիներին:

Ինչ վերաբերում է գործընկերներին, որ առանձին հոլովակներ են նկարում, ես խոստացել եմ իմ ժամանակը չծախսել այնպիսի թեմաների վրա, որոնք կառուցողական արդյունքի չեն տանում, մեր հարկատուների փողերը, որոնցով վճարվում ենք՝ որպես ԱԺ պատգամավորներ, օգտագործելու եմ կառուցողական նպատակների համար, իսկ էն մարդիկ, ովքեր ընկալել են այնպես, ինչպես ասում են, իրենցից ներողություն եմ խնդրում, ես չէի կարող մեր հասարակության անդամների մեծ մասին վիրավորել»: