Նոր մոտեցմամբ կներկայացվի Bella ciao-ն, «Ազգային երգչի» մասնակիցներն էլ կերգեն իտալերեն ու իսպաներեն․ ի՞նչ սպասել վաղը «Շանթի» տոնական եթերում

«Շանթ» հեռուստաընկերությունն առաջարկում է Եվրոպայի միության օրն այս տարի նշել «Շանթի» հին ու նոր դեմքերի, սիրված արտիստների հետ։ Տոնին, որը խորհրդանշում է խաղաղություն և միասնություն, իրենց կատարումներով միացել են Գոռ Սուջյանը, Նարինե Դովլաթյանը, Նարե Գևորգյանը, Սյուզաննա Մելքոնյանը, Տյոմը, ինչպես նաև «Ազգային երգիչ» նախագծի մասնակիցներ Հարություն Մկրտչյանը, Էդգար Ավետյանը, Անժելա Ավետիսյանը, Աննա Գրիգորյանը։

Ի թիվս արդեն իսկ սիրված կատարումների, «Ազգային երգիչ» նախագծի մասնակիցներն այս անգամ նորությամբ կներկայանան․ հեռուստադիտողը, օրինակ՝ Հարությունի և Էդգարի մատուցմամբ կկարողանա վայելել իտալերեն և իսպաներեն հայտնի ու սիրված գործեր։

Հարությունի խոսքերով՝  բացի ազգային և ժողովրդական երգերից, իր համար միշտ էլ հետաքրքրական է եղել դասական երաժշտությունը․ երգի ընտրությունն իր առաջարկն է եղել, ինչն ընդունվել է:

«Երգը սովորելու հետ կապված դժվարություններ չեն եղել, բայց անկեղծ ասած՝ մի փոքր լարվածություն կար, թե արդյոք կստացվի այնպես, ինչպես պատկերացնում եմ, արդյոք կկարողանամ զգացմունքներս ու ապրումներս լիարժեք փոխանցել հանդիսատեսին»,- խոստովանում է Հարությունը։

Հարցին, թե ստացվել է փոխանցել էմոցիաները, Հարությունը չի շտապում միանշանակ կարծիք հայտնել․ ասում է՝  իր համար ամենակարևոր գնահատականը միշտ էլ  հանդիսատեսի կարծիքն է եղել, այս անգամ էլ կսպասի, մինչ հեռուստադիտողը տեսնի ելույթն ու արձագանքներից կհասկանա՝ որքանով է հաջողել։

ԵՄ-ի օրվա տոնական համերգին հնչել է նաև վերջին ժամանակներում ամենաակտուալ սերիալներից մեկի՝ իսպանական La Casa De Papel-ից հայտնի Bella ciao երգը։ Օրեր առաջ Տյոմը ֆեյսբուքյան իր էջում կիսվել էր հումորային մի տեսանյութով, որտեղ իրեն էր զանգահարում սերիալից հայտնի Պրոֆեսորը և կարգադրում մայիսի 16-ին՝ ժամը 22։30-ին, գնալ «Շանթ» և կատարել այս երգը։

Իսկ իրականում Տյոմն ու համերգի պրոդյուսերը երկար քննարկումներից հետո են ընտրել երգը՝ հատկապես այս գործիքավորմամբ։ Տյոմի խոսքով՝ երգի գործիքավորումը Աննա Սահակյանին ու Գոռ Սուջյանինն է, պրոդյուսերի՝ Աննա Թադևոսյանի առաջարկով և իր ադապտացմամբ էլ այն ներկայացվել է քանոնի համադրությամբ:

«Քանոնների առկայությունը կատարումը հայկականացրել է, ու չնայած «Մեծ փոքրիկների» տաղանդավոր երեխաների կատարումներին արդեն իսկ ծանոթ էի, բայց անկեղծորեն ապշած էի, թե ոնց կարող են այդպես ներկայանալ։ Ստեղծված իրավիճակով պայմանավորված՝ փորձերը տանից են եղել, ու միայն համերգի օրն ենք կարողացել տեղում միասին աշխատել։ Ու անգամ այդ էքստրեմալ պայմաններում երեխաների հետ աշխատանքը շատ հաջող ստացվեց»,- մանրամասնեց երգիչն ու հավելեց, որ կլինի նաև փոքրիկ շոու՝ բեմում իրենք կլինեն սերիալից հայտնի կոստյումներով ու դիմակներով։

Տյոմի խոսքերով՝ La Casa De Papel սերիալը դիտել է դեռ այն ժամանակ, երբ այն Հայաստանում չուներ ներկայիս մասսայականությունը։

Երգչի կարծիքով՝ իր սիրելի երգի կատարումը հաջողություն կունենա, քանի որ Հայաստանում դեռ հեռուստատեսությամբ ու մեծ բեմերից չի հնչել այն՝ հատկապես այս մոտեցմամբ։