Բուհերում պետական ավարտական քննություններն ու դիպլոմայինների պաշտպանություններն անցկացվում են հեռավար

Համավարակի պարտադրած խիստ սահմանափակումներն ու կանխարգելիչ միջոցառումներն անցած երկու ամիսներին կրթության համակարգի համար եղան դասավանդման նոր մեթոդների կիրառության փորձաշրջան:

Հեռավար դասերի անցան դպրոցները, բուհերն ու կրթական մյուս հաստատությունները:

Մի ամբողջ կիսամյակի դասերը չձախողվեցին, բայց դպրոցներում ավարտական ու փոխադրական քննությունները չեղարկվեցին, իսկ բուհերի   ուսանողներն այս օրերին պետական ավարտական քննություններն ու դիպլոմային աշխատանքները հանձնում են հեռավար կարգով։

Շիրակի պետական համալսարանում ուսանողներ չկան, քննական շրջանին բնորոշ եռուզեռը՝ ևս: Ինչպես դասերն ու գործնական աշխատանքները, այնպես էլ դիպլոմայինների պաշտպանություններն ու ավարտական պետական քննությունները ուսանողները հանձնում են հեռավար։

ՇՊՀ ռեկտորի պաշտոնակատարն իր աշխատասենյակից հեռավար հետևում է քննության ընթացքին: Ասում է՝ ավարտական ամեն մի պետական քննության ավարտից հետո հանձնաժողովի անդամների գնահատումն ու ուսանողների բողոքարկումը ևս հեռավար կարգով է: Նոր մեթոդով աշխատանքին հարմարվել են, առանձնացրել հեռավար կրթության դրական ու բացասական կողմերը:

«Սա պարզապես գործընթաց է, որը նոր ենք սկսում, մեզ թվում է, թե դեռ էկրանի հետ ենք խոսում, բայց ունի նաև դրական կողմ։ Օրինակ՝ մագիստրոսների և հեռակա ուսանողների ներկայությունը դասերին զգալիորեն մեծացել է»,- նշում է ՇՊՀ ռեկտորի պաշտոնակատար Երվանդ Սերոբյանը։

«Բոլոր դեպքերում ես կողմ եմ կենդանի շփման, որովհետև երբ մարդուն տեսնում ես, զգում ես իրեն, դա շատ մեծ նշանակություն ունի կոնկրետ մեր մասնագիտության մեջ»,- իր կարծիքն է հայտնել հեռավար կրթության մասին ԵՊՀ թարգմանության տեսության և պրակտիակայի  ամբիոնի դոցենտ Գայանե Գրիգորյանը։

Հայաստանի պետական տնտեսագիտական համալսարանի Գյումրիի մասնաճյուղում ֆինանսներ բաժնի ավարտական կուրսի ուսանողների    դիպլոմայինի հեռավար պաշտպանությունն է:

«Զում» հարթակում քննությանը հետևելու հնարավորություն ունեն համալսարանի բոլոր ուսանողները, իսկ քննական հանձնաժողովի  դասախոսներից մի քանիսն առցանց քննությանը միացել էին համալսարանի տարբեր լսարաններից:

Քննություններն ու դիպլոմային աշխատանքները հեռավար հանձնող ավարտական կուրսերի ուսանողների համար գործընթացը սկզբնական փուլում դժգոհելու առիթներ է տվել, բայց տանը մնալու երկամսյա ժամանակահատվածի դրական կողմը հետո են գնահատել, քննություններին  պատրաստվելու ժամանակն են շահել:

Իսկ ինչպե՞ս են դասախոսներն ու հանձնաժողովի անդամները համոզվում, որ հեռավար քննության  ընթացքում ուսանողները չեն արտագրում կամ օգտվում այլ հնարքներից:

«Գնահատման ժամանակ մենք մեծ կշիռ ենք սահմանում բլից հարցերին, այսինքն՝ ուսանողը հարցատոմսով պատասխանելուց հետո այդ հարցաշարի շրջանակներում ստանում է լրացուցիչ հարցեր, արագ հարցեր, որը ժամանակ չունի գտնել և պատասխանել»,- իրենց գնահատման մեխանիզմն է ներկայացրել ՀՊՏՀ-ի Գյումրիի մասնաճյուղի տնօրենի պաշտոնակատար Կարեն Պետրոսյանը։

Բուհերում այս տարի բոլոր ավարտական քննություններն ու դիպլոմայինների պաշտպանությունները կանցկացվեն հեռավար։ Հետո կհետևեն  ընդունելության քննությունները:

Դիմորդները ընդամենը մեկ քննություն են հանձնելու, որը կարող է լինել ներբուհական, իսկ դրա համար բուհերում քննասենյակները կունենան հատուկ դասավորվածություն։