Բասեն ու Ախուրյան գյուղերում չեն կարողանում կիսել համայնքապատկան հողերը

Ախուրյանի և Բասենի բնակիչները չեն կարողանում կիսել համայնքապատկան հողերը: Խոսքը մոտ 890 հեկտար վարելահողի և արոտների մասին է, որոնք գտնվում են Բասեն գյուղի տարածքում, իսկ համայնքների խոշորացումից հետո օգտագործելու ցանկություն են հայտնել նաև ախուրյանցիները:

Հողերի մի մասը վարձակալության է տրվել, մնացածը երկու գյուղով չեն կարողանում համատեղ օգտագործել: Արոտներն ու վարելահողերը իրենց վերադարձնելու բողոքով այսօր Բասեն գյուղի բնակիչները մարզպետարան են գնացել, որտեղ նրանց բացատրվել են հողերի օրինական օգտագործման եղանակներն ու այն, թե ինչպես է պետք տնօրինել վիճահարույց հողակտորները:

Բասեն գյուղի բնակիչները մարզպետարանի դիմաց հավաքվել էին անվտանգության կանոնները պահպանելով: Գյուղատնտեսական աշխատանքների թեժ սեզոնին գյուղից դուրս գալ ստիպել է հողերի պակասը: Բասենցիներին վարելահողերն ու արոտները չեն բավականացնում, իսկ գյուղում ազատ հողակտորներ կան:

Խոսքը Բասենի հեռագնա արոտների մասին է, որոնք տարիներ առաջ Ախուրյանին են պատկանել: 2009 թվականին, վարչատարածքային բաժանման մասին օրենքի համաձայն՝ վարելահողերն ու արոտները տրվեցին այն գյուղերին, որոնց ամենամոտն էին դրանք գտնվում: Այդ ժամանակ շուրջ 890 հեկտար արոտ ու վարելահող դարձել է Բասենի սեփականությունը: Համայնքների խոշորացումից հետո, երբ Բասենը մաս կազմեց Ախուրյան խոշորացված համայնքի, հողատարածքները օգտագործելու ցանկություն նաև ախուրյանցիներն են հայտնել:

«Դրանք եղել են հեռագնա արոտավայրեր: Նախկինում պետական պահուստային հողեր են: 2009 թվականին կառավարության որոշմամբ «Վարչատարածքային բաժանման մասին» օրենքում փոփոխություններ կատարելու միջոցով այդ տարածքները մտել են Բասենի տարածք՝ 890 հեկտար: Այն հատվածները, որտեղ վարձակալական պայմանագիր կա, բնականաբար, վարձակալը չի թույլատրելու այլ բնակչի իր արոտը կամ վարելահողը օգտագործել:

Կան նաև ազատ տարածքներ՝ մոտ 600 հեկտար, որոնց համար վարձակալության պայմանագրեր կնքված չեն, ու բնակիչները ցանկանում են վարձակալել: Ախուրյանի բնակիչներն էլ են ցանկանում, որովհետև իրենք արոտների խնդիր ունեն, խնդիրը երկու համայնքների բնակիչների մեջ է»,- SHANTNEWS.am-ի հետ զրույցում ասել է Բասեն գյուղի վարչական ղեկավար Ռոման Համայակյանը:

890 հեկտարից 250-ը վարձակալությամբ է տրվել: Վարձակալները Ախուրյանից, Կառնուտից ու Արթիկից են: Վարձակալված հողերի նկատմամբ գյուղացիները որևէ իրավունք չեն կարող ունենալ: Մնացած 640 հեկտարն է վիճելի, որը համայնքային սեփականություն է և մինչ այս միայն բասենցիներն են օգտագործել: Հիմա էլ պահանջում են տնօրինելու իրավունքը միայն իրենց տալ: Ախուրյանում էլ անասնագլխաքանակն է ավելացել, արոտները չեն բավականացնում:

«Հողի օգտագործման որոշումը տեղի է ունենում համայնքում, ավագանու կողմից, մարզպետարանում չի որոշվում: Այդ հողը համայնքինն է, դուք ձեր մեջ պետք է որոշեք: Եթե չեք կարող որոշել, ձեր համայնքն ի վիճակի չէ որոշել, ուրեմն համայնքապետը տեղում չէ, ուրեմն ավագանին տեղում չէ: Վարչական ղեկավարին մի քանի անգամ ասվել է, թե ինչ լուծում պետք է խնդիրը ունենա: Դրեք ավագանու քննարկմանը, հողը բաշխեք այն տենդերներով, որով ձեզ հասնում է»,- գյուղացիներին ասել է Շիրակի մարզպետ Տիգրան Պետրոսյանը:

Շիրակի մարզպետը գյուղացիներին բացատրեց, որ նախորդ տարիներին հողերի անօրինական օգտագործում է եղել: Բասենցիները վարելահողերը մշակել են ու արոտներն օգտագործել առանց իրավական հիմքի, այսինքն՝ առանց վարձակալության պայմանագրերի: Հիմա հարցի լուծումը ազատ հողակտորները մրցութային կարգով վարձակալության տալն է:

Խնդիրը, ըստ գյուղացիների, համայնքների խոշորացման հետևանք է: Ու քանի առիթ էր, մարզպետարան էին եկել ու մարզպետին հանդիպել, նաև խոշորացումից իրենց դժգոհությունն արտահայտեցին: Ախուրյան համայնքը ներառում է 7 գյուղ։

«Քաղաքական քննարկում կա միավորման հետ կապված, մարդկանց հնարավորություն տալ տեղում անել ռեֆերենդում, որոշել` ուզո՞ւմ են մնալ համայնքում, թե՞ չեն ուզում: Այս պահին այդ խնդիրը չի կարող քննարկվել, բայց շուտով, նաև հաշվի առնելով այս տեսակ խնդիրները, քննարկման առարկա կդառնա այս խնդիրը: Այդ ժամանակ, եթե կորոշեք ձեզ տեսնել որպես առանձին համայնք, պետությունը քաղաքական կամք ու գործիք կտա ձեզ տեղում որոշելու»,- ասել է Տիգրան Պետրոսյանը:

Անկախ նրանից, թե հետո Բասենը կմնա՞ Ախուրյան համայնքի կազմում, թե՞ կառանձնանա, հողօգտագործումը վարձակալությամբ ու մրցույթով է լինելու:

Մրցույթն աշնանն են հայտարարելու, իսկ մինչ այդ բասենցիներն ու ախուրյանցիները հողերը համատեղ պետք է օգտագործեն: